ភ្នំពេញៈ រោងចក្រផលិតនំស្រួយ LY LY Kameda Co., Ltd តម្លៃជាង ១៦ លានដុល្លារ ដែលជាការវិនិយោគរួមគ្នារវាងក្រុមហ៊ុនក្នុងស្រុក LY LY Food Industry Co., LTD. និងក្រុមហ៊ុនជប៉ុន Kameda Seika Co., Ltd បានបើកដំណើរការជាផ្លូវការកាលពីថ្ងៃសៅរ៍។
រោងចក្រ LY LY Kameda Co., Ltd ដែលមានសមត្ថភាពផលិតនំស្រួយសម្រាប់នាំចេញទៅទីផ្សារអន្តរជាតិបានប្រមាណជាង ៣ ០០០ តោនក្នុង ១ ឆ្នាំ ត្រូវបានគ្រប់គ្រងភាគហ៊ុន ៤៩ ភាគរយ ដោយក្រុមហ៊ុនក្នុងស្រុក និង ៥១ គ្រប់គ្រងដោយវិនិយោគិនជប៉ុន។ រោងចក្រនេះប្រើប្រាស់កម្លាំងពលកម្មប្រមាណ ២៥០ នាក់។
លោកស្រី កែវ មុំ អគ្គនាយិកាក្រុមហ៊ុន LY LY Food Industry Co., LTD បាននិយាយថានេះជាដំណើរវិវឌ្ឍន៍ថ្មីមួយទៀតរបស់ក្រុមហ៊ុនក្នុងស្រុក ក្នុងការបើកដំណើរការរោងចក្រផលិតនំទី២ ដោយសហការជាមួយវិនិយោគិនជប៉ុន ខណៈបច្ចុប្បន្នកំណើននៃការបញ្ជាទិញបានកើនឡើងជាបន្តបន្ទាប់។
លោកស្រីថ្លែងថា៖ «យើងក៏មានផែនការពង្រីកបន្ថែមផងដែរនៅឆ្នាំខាងមុខ ខណៈទីផ្សារនាពេលនេះកំពុងទទួលបានការចាប់អារម្មណ៍ និងការបញ្ជាទិញកាន់តែច្រើន»។
តាមលោកស្រី កែវ មុំ រោងចក្រដែលទើបបើកដំណើរការថ្មីនេះបានបំពាក់ទៅដោយបច្ចេកវិទ្យាទំនើបៗ និងមានការត្រួតពិនិត្យពីបញ្ហាសុវត្ថិភាព និងអនាម័យយ៉ាងល្អផងដែរ។ វត្ថុធាតុដើមសម្រាប់ផលិតស្ទើរទាំងស្រុងជាផលិតផលក្នុងស្រុក ហើយផលិតផលពីរោងចក្រនេះគឺសម្រាប់នាំចេញទៅលក់នៅក្រៅប្រទេសទាំងអស់។
រោងចក្រនេះបានដំណើរការផលិតសាកល្បងចាប់តាំងពីខែ មករា ឆ្នាំ ២០១៩ ដោយបាននាំចេញទៅកាន់ទីផ្សារអូស្ត្រាលី និងនូវែលសេឡង់បាន ១ កុងតឺន័រក្នុង ១ ថ្ងៃ។ នេះបើតាមលោកស្រី កែវ មុំ។
លោកស្រី កែវ មុំ បានឲ្យដឹងថារោងចក្រទី១ របស់ក្រុមហ៊ុន LY LY Food Industry Co., LTD ក៏មានសមត្ថភាពអាចផលិតនំបានជាង ៣ ០០០ តោនផងដែរ។
អ្នកស្រីបន្តថាបច្ចុប្បន្នផលិតផលប្រហែល ៦៥ ភាគរយ របស់រោងចក្រនេះត្រូវបានដាក់លក់ក្នុងទីផ្សារក្នុងស្រុក ខណៈ ៣៥ ភាគរយទៀត សម្រាប់នាំចេញទៅបរទេស។
លោក Michiyasu Tanaka អគ្គនាយកក្រុមហ៊ុន Kameda Seika Co., Ltd បាននិយាយថាបច្ចុប្បន្នក្រុមហ៊ុនរបស់លោកកំពុងបណ្តាក់ទុននៅក្នុងប្រទេសចំនួន ៧ រួមទាំងកម្ពុជាផងដែរ។ កម្ពុជាជាប្រទេសដែលមានសក្តានុពលខ្ពស់ក្នុងការវិនិយោគលើគ្រប់វិស័យ។
លោកថ្លែងថា៖ «នៅពេលខាងមុខឆាប់ៗនេះ ក្រុមហ៊ុនខ្ញុំមានបំណងពង្រីកខ្សែចង្វាក់ផលិតកម្មថ្មីមួយបន្ថែមទៀតនៅក្នុងរោងចក្រដដែលនេះ ហើយជំហានបន្ទាប់អាចនឹងទៅកន្លែងផ្សេង»។ លោកបន្តថាបច្ចុប្បន្នក្រុមហ៊ុនកំពុងសម្លឹងទៅកាន់ទីផ្សារប្រទេសមួយចំនួនដូចជា ចិន អាមេរិក និងកាណាដាផងដែរ។
លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្មបានឲ្យដឹងថា នេះជាមោទនភាពរបស់កម្ពុជាដែលមានក្រុមហ៊ុនលំដាប់អន្តរជាតិរបស់ជប៉ុនឲ្យមកចាប់ដៃគូវិនិយោគ។
លោកបានបន្តទៀតថាតាមរយៈកិច្ចសហការភាពជាដៃគូនេះ លោកសង្ឃឹមថា នឹងមានក្រុមហ៊ុនកម្ពុជាកាន់តែច្រើនទៀតនឹងខិតខំបង្កើនសមត្ថភាពរបស់ខ្លួន និងចាប់ដៃគូសហការជាមួយក្រុមហ៊ុនបរទេសធំៗ៕LA