ភ្នំពេញៈ ដោយបានចូលប្រឡូកក្នុងវិស័យជំនួញតាំងពីឆ្នាំ ២០១៤ បច្ចុប្បន្នលោក លី វីរៈ ជាប្រធានសាលាអន្តរជាតិ Learning Jungle ដែលផ្តល់ការអប់រំចាប់ពីកម្រិតមត្តេយ្យសិក្សារហូតដល់ថ្នាក់ទី ៦ និងបានពង្រីកសាលាថ្មីមួយទៀតមានឈ្មោះថា Westview ផ្តល់ការសិក្សារហូតដល់ថ្នាក់ទី ១២។
ដោយមើលឃើញពីឱកាសក្នុងការវិនិយោគលើវិស័យអប់រំ ស្របពេល រដ្ឋាភិបាលអំពាវនាវឲ្យវិស័យឯកជនចូលរួមចំណែកក្នុងការអភិវឌ្ឍវិស័យនេះ លោក វីរៈ បានចាប់យកឱកាសនេះបន្ទាប់ពីលោកបានបញ្ចប់ការសិក្សានៅក្រៅប្រទេស។
ខាងក្រោមនេះជាបទសម្ភាសរវាងអ្នកយកព័ត៌មានកាសែតភ្នំពេញប៉ុស្តិ៍ ជាមួយ លោក លី វីរៈ អំពីមុខជំនួញនេះ និងការអភិវឌ្ឍវិស័យអប់រំកម្ពុជានាពេលបច្ចុប្បន្ន។
តើអ្វីជាដំណើរការអាជីវកម្មរបស់លោកកាលពីឆ្នាំមុន?
ឆ្នាំ ២០១៩ ជាឆ្នាំដែលមានការរីកចម្រើនគួរឲ្យកត់សម្គាល់បំផុតសម្រាប់សាលាអន្តរជាតិ Learning Jungle។ យើងបានពង្រីកការអប់រំនៅអនុវិទ្យាល័យក្រោមសាលាថ្មី មានឈ្មោះថា សាលាអន្តរជាតិ Westview ខេមបូឌា ដែលនេះគឺជាការចូលរួមចំណែកមួយទៀតនៅក្នុងការអភិវឌ្ឍវិស័យអប់រំនៅកម្ពុជា និងផ្តល់ជម្រើសកាន់តែច្រើនដល់ឪពុកម្តាយ។
សាលាអន្តរជាតិ Westview ផ្តោតលើការអប់រំអន្តរជាតិប្រកបដោយគុណភាព និងការបញ្ចូលភាសា និងវប្បធម៌ខ្មែរទៅក្នុងកម្មវិធីសិក្សាតែមួយ។ វិស័យអប់រំនៅតែបន្តទទួលបានការលើកលែងពន្ធពិសេសពីរាជរដ្ឋាភិបាលរហូតដល់ឆ្នាំ ២០២៣។
ជាមួយនឹងកំណើនសេដ្ឋកិច្ចរបស់ប្រទេសកម្ពុជានាពេលបច្ចុប្បន្ន និងការគាំទ្ររបស់រដ្ឋាភិបាល វិស័យនេះនឹងបន្តរីកចម្រើនយ៉ាងខ្លាំង។ ជាមួយនឹងការកើនឡើងនៃសាលាអន្តរជាតិចំនួននិស្សិតបញ្ចប់ការសិក្សាពីបរទេសក៏នឹងកើនឡើងនាពេលអនាគតដែរ។ ម្យ៉ាងវិញទៀតសមាហរណកម្មតំបន់ និងអន្តរជាតិក៏នឹងបណ្តាលឲ្យមានអ្នកជំនាញអន្តរជាតិកាន់តែច្រើនឡើងៗដែលកំពុងធ្វើការនៅប្រទេសកម្ពុជា។ ដូច្នេះយើងអាចមើលឃើញថា នឹងមានធនធានមនុស្សដែលមានគុណភាពកាន់តែច្រើនឡើងៗ ត្រឡប់មកពីបរទេសដើម្បីបម្រើជាតិមាតុភូមិ និងអ្នកជំនាញអន្តរជាតិកាន់តែច្រើនឡើងៗកំពុងធ្វើការនៅកម្ពុជា។
តើសាលាថ្មីរបស់លោកក៏បានទិញសិទ្ធិផ្តាច់មុខពីប្រទេសផ្សេងទៀតដែរ ឬទេ?
សាលាអន្តរជាតិ Westview ខេមបូឌា មិនមែនជាសាលាដែលមានសិទ្ធិផ្តាច់មុខនោះទេ។ ទោះយ៉ាងណាខ្ញុំ និងក្រុមការងារបានប្រមូលបទពិសោធក្នុងការបង្កើតសាលាអន្តរជាតិ Learning Jungle ដោយជោគជ័យតាំងពីដំបូងរហូតដល់ពេលនេះអស់រយៈពេលជាង ៥ ឆ្នាំហើយ។
យើងទាញយកបណ្តាញរឹងមាំដែលបានបង្កើតឡើងរួចហើយរបស់យើងក្នុងការជ្រើសរើសគ្រូអន្តរជាតិដែលមានការប្តេជ្ញាចិត្ត និងទទួលស្គាល់ពីសហរដ្ឋអាមេរិក កាណាដា និងបុគ្គលិកក្នុងស្រុក និងអន្តរជាតិដែលមានបទពិសោធខ្ពស់ដើម្បីដឹកនាំសិស្សរបស់យើងឲ្យទទួលបាននូវស្តង់ដាសិក្សាល្អបំផុត និងទទួលបានជោគជ័យនៅក្នុងជីវិតរបស់ពួកគេ។
ដើម្បីអនុញ្ញាតឲ្យនិស្សិតរបស់យើងអាចទទួលបានការចូលរៀននៅមហាវិទ្យាល័យ និងសាកលវិទ្យាល័យកំពូលៗនៅទូទាំងពិភពលោក បច្ចុប្បន្ននេះ Westview កំពុងស្ថិតក្នុងដំណើរការក្លាយជាសាលារៀនដែលមានការទទួលស្គាល់ជាអន្តរជាតិពីអង្គការចំនួន ២ គឺគណៈកម្មការវាយតម្លៃសម្រាប់សាលារៀន និងសមាគមខាងលិចនៃសាលារៀន និងមហាវិទ្យាល័យដែលជាក្រុមប្រឹក្សាសាលាអន្តរជាតិ។ ស្ថាប័នទាំង ២ គឺជាអង្គការដែលមានកេរ្តិ៍ឈ្មោះល្បីល្បាញនៅលើពិភពលោកដែលទទួលស្គាល់ស្ថាប័នអប់រំនៅសហរដ្ឋអាមេរិក និងនៅទូទាំងពិភពលោក។
បច្ចុប្បន្នរដ្ឋាភិបាលតាមរយៈក្រសួងអប់រំកំពុងព្យាយាមផ្តោតលើការអប់រំផ្នែកបច្ចេកវិទ្យា និងការច្នៃប្រឌិត តើសាលារបស់លោកមានផ្តល់ជំនាញនេះដែរ ឬទេ?
ក្រៅអំពីមានសម្ភារ កន្លែងទំនើបនិងបច្ចេកវិទ្យាទំនើបនៅក្នុងថ្នាក់រៀននីមួយៗដើម្បីអនុញ្ញាតឲ្យគ្រូរបស់យើងប្រើឧបករណ៍បច្ចេកវិទ្យាព័ត៌មានវិទ្យា ក្នុងការបង្រៀនរបស់ពួកគេមានប្រសិទ្ធភាព យើងកំពុងធ្វើការលើគម្រោងផ្សេងៗដែលពាក់ព័ន្ធបច្ចេកវិទ្យាអប់រំ និងទិដ្ឋភាពច្នៃប្រឌិតថ្មីនេះ។ ដើម្បីឆ្លើយតបនឹងសំណួររបស់លោកខ្ញុំចង់សង្កត់ធ្ងន់លើការអប់រំ STEM ដែលនេះគឺជាអ្វីដែលយើងកំពុងធ្វើ។
ការអប់រំ STEM ក៏ត្រូវបានបញ្ចូលក្នុងកម្មវិធីសិក្សារបស់យើងផងដែរ។ កម្មវិធីសិក្សាគណិតវិទ្យារបស់យើងលើកទឹកចិត្តដល់វិធីសាស្ត្ររៀនផ្អែកលើសំណួរដែលមានន័យថា ក្រៅពីការរៀនទ្រឹស្តីគណិតវិទ្យា សិស្សរបស់យើងក៏ត្រូវបានបង្រៀនឲ្យដោះស្រាយបញ្ហាគណិតវិទ្យាសាស្ត្រពិតដោយសួរសំណួរសំខាន់ៗ។
នេះអនុញ្ញាតឲ្យសិស្សរបស់យើងមើលឃើញពីការអនុវត្តទ្រឹស្តីគណិតវិទ្យាដែលពួកគេរៀនក្នុងថ្នាក់ ហើយក្នុងពេលតែមួយក្លាយជាអ្នកគិតពិចារណា ដែលអាចទំនាក់ទំនងគំនិតគណិតវិទ្យាបានយ៉ាងស្ទាត់។
នៅក្នុងកម្មវិធីសិក្សាវិទ្យាសាស្ត្រ និងបច្ចេកវិទ្យារបស់យើង យើងផ្តោតលើទិដ្ឋភាពសំខាន់ ៣ គឺគំនិតមូលដ្ឋាន ការស៊ើបអង្កេត និងនិរន្តរភាព។ សិស្សានុសិស្សត្រូវបានណែនាំអំពីគោលគំនិតវិទ្យាសាស្ត្រជាមូលដ្ឋានហើយតាមរយៈការស៊ើបអង្កេត និងពិសោធន៍វិទ្យាសាស្ត្រផ្សេងៗនិស្សិតនឹងមានការយល់ដឹងកាន់តែស៊ីជម្រៅអំពីប្រធានបទវិទ្យាសាស្ត្រដែលត្រូវបានពិភាក្សានៅក្នុងថ្នាក់។
សិស្សានុសិស្សក៏រៀនតាមរយៈការពិភាក្សាជាក្រុម និងការស្រាវជ្រាវតាមអ៊ីនធឺណិតអំពីផលប៉ះពាល់នៃវិទ្យាសាស្ត្រ និងបច្ចេកវិទ្យាទាំងវិជ្ជមាន និងអវិជ្ជមានទៅលើសង្គម និងបរិស្ថានរបស់យើងផងដែរ៕