ភ្នំពេញៈ លោកនាយករដ្ឋមន្ដ្រី ហ៊ុន សែន កាលពីថ្ងៃចន្ទបានអះអាងចំពោះក្រុមវិនិយោគិនអាមេរិកថា ទោះបីជាការរីករាលដាលជំងឺកូវីដ ១៩ ដែលប៉ះពាល់ដល់កំណើនសេដ្ឋកិច្ចរបស់ប្រទេសកម្ពុជាក៏ដោយ ក៏រដ្ឋាភិបាលកម្ពុជាបានចាត់វិធានការយ៉ាងសកម្ម ដើម្បីរក្សាសកម្មភាពអាជីវកម្មឲ្យដំណើរការទៅមុខដោយធានាថា កម្ពុជាគឺជាទីតាំងដ៏ទាក់ទាញសម្រាប់វិនិយោគិនអាមេរិក។
ថ្លែងក្នុងជំនួបពិភាក្សាការងារជាមួយនឹងក្រុមប្រឹក្សាធុរកិច្ចសហរដ្ឋអាមេរិក-អាស៊ាន តាមប្រព័ន្ធវីដេអូ លោកនាយករដ្ឋមន្ដ្រីបានឲ្យដឹងថា អស់រយៈពេលជាង ៩ ខែមកហើយ ពិភពលោកបាននិងកំពុងប្រយុទ្ធប្រឆាំងនឹងជំងឺកូវីដ១៩ ដែលបានបង្កជាវិបត្តិដ៏ធ្ងន់ធ្ងរមិនធ្លាប់មានពីមុនមកលើសង្គម និងសេដ្ឋកិច្ច។ សម្រាប់កម្ពុជា រាជរដ្ឋាភិបាលបានគ្រប់គ្រងសភាពការណ៍កូវីដ១៩ ប្រកបដោយប្រសិទ្ធភាពដោយមកដល់ពេលនេះកម្ពុជាមិនមានការឆ្លងជាសហគមន៍ ហើយក៏មិនបានឈានដល់ការបិទជាតំបន់ ឬប្រទេសទាំងមូលនោះទេ។
លោកបានឲ្យដឹងថា ជាការពិតជំងឺកូវីដ ១៩ បាននាំមកនូវបញ្ហាប្រឈមដ៏ស្រួចស្រាល់មួយចំនួន ជាអាទិ៍នៅក្នុងវិស័យវាយនភណ្ឌ វិស័យទេសចរណ៍ វិស័យអាកាសចរណ៍ និងវិស័យសេវាខ្លះទៀត។ ស្ថិតក្នុងស្ថានការណ៍នេះ រាជរដ្ឋាភិបាលកម្ពុជាបានដាក់ចេញនូវវិធានការចំនួន ៥ ជុំរួចមកហើយទាំងវិធានការជួយដល់វិស័យសេដ្ឋកិច្ច និងវិស័យសង្គមកិច្ចសំដៅជួយថែរក្សាលំនឹងពាណិជ្ជកម្ម និងអាជីវកម្មក៏ដូចជាធានាលំនឹងជីវភាពរស់នៅរបស់ប្រជាពលរដ្ឋដែលទទួលរងផលប៉ះពាល់ធ្ងន់ធ្ងរផងដែរ។
លោកថ្លែងថា៖ «ខ្ញុំជឿជាក់ថា ធុរកិច្ចអាមេរិកមួយចំនួនដែលមានវត្តមាននៅកម្ពុជាក៏ទទួលនូវផលប្រយោជន៍ពីវិធានការទាំងនេះ»។
លោកបានឲ្យដឹងថា ទន្ទឹមនឹងនេះទោះបីជាមានបញ្ហាជំងឺកូវីដកំពុងប៉ះពាល់ដល់សេដ្ឋកិច្ចក៏ដោយ ក៏កំណើនពាណិជ្ជកម្មរវាងប្រទេសទាំង ២ ក្នុងរយៈពេល ៨ ខែឆ្នាំ ២០២០ នេះបានកើនឡើងប្រមាណ ១៧ ភាគរយធៀបនឹងរយៈពេលដូចគ្នាកាលពីឆ្នាំមុន។
លោកថ្លែងថា៖ «ខ្ញុំក៏សូមឆ្លៀតយកឱកាសនេះជម្រាបជូនសមាជិកគណៈប្រតិភូទាំងអស់ថា ទោះបីជាជំងឺរាតត្បាតកូវីដ ១៩ បាននិងកំពុងបង្កការលំបាកជាច្រើនដល់កិច្ចដំណើរការនៃជីវិតសង្គម និងសេដ្ឋកិច្ច ក៏ប៉ុន្តែរាជរដ្ឋាភិបាលកម្ពុជាមិនបន្ថយល្បឿននឹងការងារកំណែទម្រង់នៅក្នុងគ្រប់វិស័យរបស់ខ្លួននោះទេ។ ដើម្បីទាក់ទាញវិនិយោគិនបន្ថែម ជាពិសេសនៅពេលជំងឺកូវីដ ១៩ មានភាពធូរស្រាល កម្ពុជាកំពុងរៀបចំកែលម្អច្បាប់វិនិយោគ និងប្រព័ន្ធលើកទឹកចិត្តថ្មីដែលមានលក្ខណៈគ្រប់ជ្រុងជ្រោយ និងមានភាពទាក់ទាញសម្រាប់ឧស្សាហកម្មប្រភេទអេឡិចត្រូនិក បង្គុំ កសិឧស្សាហកម្ម គ្រឿងបន្លាស់ ឧស្សាហកម្មគាំទ្រ និងឧស្សាហកម្មផ្សេងទៀត»។
លោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជាបានថ្លែងក្នុងអំឡុងវេទិកាពាណិជ្ជកម្ម និងវិនិយោគនៅទីក្រុងភ្នំពេញកាលពីដើមខែកញ្ញាថា ទំនាក់ទំនងសេដ្ឋកិច្ចរវាងកម្ពុជា និងអាមេរិកកំពុងកើនឡើងគួរឲ្យកត់សម្គាល់ក្នុងរយៈពេល ២ ទសវត្សរ៍ចុងក្រោយនេះ ខណៈដែលពាណិជ្ជកម្មទ្វេភាគីមានចំនួន ៨៥០ លានដុល្លារ។ កាលពីឆ្នាំមុន វាបានកើនឡើងដល់ ៥,៩ ពាន់លានដុល្លារ កើនឡើង ៧ ដង។
លោកបានបន្តថា អាមេរិកគឺជាទិសដៅនាំចេញឈានមុខគេរបស់កម្ពុជា ដោយកម្ពុជានាំចេញមានតម្លៃ ៥,៤ ពាន់លានដុល្លារកាលពីឆ្នាំមុន។
លោកលើកឡើងថា៖ «ការនាំចេញរបស់កម្ពុជាក៏ផ្ដល់អត្ថប្រយោជន៍ដល់អតិថិជនអាមេរិកតាមរយៈការផ្ដល់ជម្រើសផងដែរ។ នៅពេលនេះមានផលិតផលកម្ពុជាកាន់តែច្រើននៅក្នុងហាងលក់នៅអាមេរិកកាន់តែច្រើនជាងមុន។ ផលិតផលទាំងនេះមិនត្រឹមតែជាសម្លៀកបំពាក់ និងស្បែកជើងប៉ុណ្ណោះទេ ប៉ុន្តែថែមទាំងផលិតផលកសិកម្មដែលទទួលបានពានរង្វាន់ដូចជាម្រេចកំពត និងអង្ករកម្ពុជាផងដែរ។ លើសពីនេះទៅទៀតអ្នកអាចឃើញទំនិញធ្វើដំណើរដែលផលិតនៅកម្ពុជាកាន់តែច្រើនឡើងៗនៅអាមេរិកផងដែរ»។
ការនាំចេញទំនិញធ្វើដំណើរស្ថិតក្រោមកម្មវិធីប្រព័ន្ធអនុគ្រោះពន្ធ (GSP) បានកើនឡើងពី ៥០ លានដុល្លារ ក្នុងឆ្នាំ ២០១៦ ដល់ជិត ១ ពាន់លានដុល្លារកាលពីឆ្នាំមុន៕ LA
វីដេអូ៖