ភ្នំពេញ: លោក គង់ វិបុល អគ្គនាយកនៃអគ្គនាយកដ្ឋានពន្ធដារ (GDT) បានអះអាងថា ស្ថាប័ននេះនៅតែរក្សាជំហរអនុវត្តពន្ធចំណេញមូលធនតាមការកំណត់របស់រដ្ឋាភិបាលចាប់ពីថ្ងៃទី ១ ខែ មករា ឆ្នាំ ២០២១ តទៅ ទោះបីជាមានការស្នើសុំព្យួរការអនុវត្តក្តី។
ក្នុងកម្មវិធីផ្សាយផ្ទាល់លើទំព័រហ្វេសប៊ុករបស់ GDT ស្តីពីពន្ធលើចំណេញមូលធន កាលថ្ងៃព្រហស្បតិ៍លោក គង់ វិបុល បានលើកឡើងថា ការអនុវត្តពន្ធនេះមិនមែនជាការសង្កត់កប្រជាពលរដ្ឋនោះទេ ប៉ុន្តែការអនុវត្តពន្ធនេះគឺធ្វើឡើងក្នុងគោលបំណងពង្រឹងកាតព្វកិច្ចបង់ពន្ធដោយសមធម៌ ហើយការអនុវត្តពន្ធជួយជំរុញឱ្យក្រុមហ៊ុនអចលនទ្រព្យមកចុះបញ្ជីនៅអគ្គនាយកដ្ឋានពន្ធដារ។
លោកនិយាយថា៖ «យើងយកពន្ធចំពោះតែអ្នកលក់ចំណេញ តែបើគាត់លក់ខាតគាត់អត់ត្រូវបង់ពន្ធនេះទេ។ ពន្ធនេះបង្កើតឡើងមិនមែនសង្កត់ករាស្ត្រនោះទេ វាជាផលប្រយោជន៍ដល់ប្រជាពលរដ្ឋ ដោយយកទៅអភិវឌ្ឍលើហេដ្ឋារចនាសម្ព័ន្ធជាដើម»។
លោកបន្តថា៖ «ខ្ញុំគិតថា ការយកពន្ធចំណេញមូលធននេះមានតម្លៃទាបជាង អ្នកលក់ផ្តល់កម្រៃជើងសាឱ្យក្រុមភ្នាក់ងារអចលនទ្រព្យទៀតផង បើតាមខ្ញុំដឹង កម្រៃជើងសាប្រហែល ៣ ភាគរយ ដូច្នេះការលើកឡើងនេះមិនឆ្លុះបញ្ចាំងការពិតទេ»។
លោកបញ្ជាក់ថា ប្រសិនបើគ្មានការប្រែប្រួលទេនោះ ការអនុវត្តពន្ធចំណេញមូលធននឹងផ្តើមអនុវត្តតាមកាលបរិច្ឆេទកំណត់ដោយប្រកាសរបស់ក្រសួងសេដ្ឋកិច្ច និងហិរញ្ញវត្ថុ។
លោកថ្លែងថា៖ «ខ្ញុំជាអ្នកអនុវត្តច្បាប់ ដូច្នេះច្បាប់ដាក់ឱ្យខ្ញុំអនុវត្តពន្ធចំណេញមូលធននៅថ្ងៃទី ១ ខែ មករា ឆ្នាំ ២០២១ ខ្ញុំត្រូវតែអនុវត្ត ប៉ុន្តែលើកលែងតែមានការកែប្រែនៃកាលបរិច្ឆេទឱ្យពន្យារពីរដ្ឋាភិបាល»។
លោក វ៉ាន់ ពុទ្ធិពល អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានថ្លែងក្នុងកម្មវិធីនោះថា ការអនុវត្តពន្ធនេះនឹងមិនប៉ះពាល់ដល់ប្រជាពលរដ្ឋនោះទេ ដោយអ្នកដែលបង់ពន្ធច្រើនជាង ៩០ ភាគរយគឺអ្នករកស៊ីលើវិស័យអចលនទ្រព្យ។
ពន្ធចំណេញមូលធននឹងត្រូវអនុវត្តចំពោះការលក់ ឬផ្ទេរ ឬក៏បង្កើតឱ្យមានសិទ្ធិគ្រប់គ្រងលើទ្រព្យ ឬចុះបញ្ជីសម្រាប់ការផ្ទេរកម្មសិទិ្ធ ឬសិទ្ធិកាន់កាប់ទ្រព្យ។ យោងប្រកាសរបស់ក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ១ ខែ មេសា ឆ្នាំ ២០២០។
ការតម្រូវឱ្យបង់ពន្ធចំណេញមូលធនគឺបានមកពីការលក់នៃអចលនទ្រព្យមួយចំនួនដូចជា ដី អគារ ភាគហ៊ុន អាជ្ញាប័ណ្ណ ប៉ាតង់ សញ្ញាបណ្ណបំណុល និងរូបិយប័ណ្ណក្នុងអត្រា ២០ ភាគរយ។
កាលពីសប្តាហ៍មុន សមាគមអ្នកអភិវឌ្ឍន៍លំនៅឋានកម្ពុជាបានដាក់លិខិត ១ ច្បាប់ទៅក្រសួងសេដ្ឋកិច្ច និងហិរញ្ញវត្ថុដោយស្នើសុំរដ្ឋាភិបាលពន្យារពេលការអនុវត្តពន្ធលើប្រាក់ចំណេញមូលធនរហូតដល់ស្ថានភាពនៃការរាតត្បាតជំងឺកូវីដ ១៩ មានភាពធូរស្រាល៕ LA