ក្រុងវ៉ាស៊ីនតោនៈ លោកប្រធានាធិបតី ដូណាល់ ត្រាំ បានឲ្យដឹងកាលពីថ្ងៃចន្ទថា លោករំពឹងថានឹងអាចសម្រេចបានកិច្ចព្រមព្រៀងពាណិជ្ជកម្មមួយជាមួយប្រទេស ចិន ដែលកំពុងរងផលប៉ះពាល់ដោយសារការដកហូតពន្ធនាំចូលរបស់អាមេរិក។
លោក ត្រាំ បានប្រាប់ក្រុមអ្នកយកព័ត៌មាននៅសេតវិមានថា៖ «យើងកំពុងធ្វើបានយ៉ាងល្អប្រសើរជាមួយប្រទេស ចិន។ ពួកគេកំពុងមានពេលវេលាដ៏ពិបាកមួយជាមួយនឹងសេដ្ឋកិច្ចរបស់ពួកគេ ដោយសារតែពន្ធនាំចូល»។
លោកមានប្រសាសន៍ថា៖ «ខ្ញុំគិតថា យើងនឹងអាចសម្រេចបានកិច្ចព្រមព្រៀងមួយជាមួយប្រទេស ចិន»។
មន្ដ្រីរបស់អាមេរិកបានធ្វើដំណើរទៅកាន់ទីក្រុងប៉េកាំងកាលពីសប្ដាហ៍មុន ដើម្បីចរចាបញ្ចប់ការប្រឈមមុខដាក់គ្នាផ្នែកពាណិជ្ជកម្មដែលកើតមានកាន់ខ្លាំងឡើងៗ ដែលបានបណ្ដាលឲ្យមានការដកហូតពន្ធនាំចូលក្នុងទឹកប្រាក់ជាង ៣៥០ ពាន់លានដុល្លារនៅក្នុងពាណិជ្ជកម្មទ្វេភាគី។
មន្ដ្រីរបស់ប្រទេស ចិន បានឲ្យដឹងថា ជុំចរចាបន្ទាប់នឹងត្រូវរៀបចំឡើងនៅទីក្រុងវ៉ាស៊ីនតោនចន្លោះពីថ្ងៃទី ៣០ ដល់ថ្ងៃទី ៣១ ខែមករា។
លោក ត្រាំ និងលោក ស៊ី ជីនភីង មេដឹកនាំរបស់ប្រទេស ចិន បានយល់ព្រមកាលពីថ្ងៃទី ១ ខែធ្នូ ដើម្បីបញ្ឈប់ជម្លោះពាណិជ្ជកម្មរយៈពេល ៣ ខែ។
លោក ត្រាំ ថ្លែងថា៖ «ខ្ញុំអាចប្រាប់អ្នកថា យើងនឹងទទួលបានអ្វីៗ ដែលមុនពេលដែលខ្ញុំបានក្លាយជាប្រធានាធិបតី អ្នកនឹងមិនមានឱកាសក្នុង ការទទួលបាននោះទេ»។
ខណៈដែលលោក ត្រាំ បានដាក់សម្ពាធឲ្យទីក្រុងប៉េកាំងបង្កើនការនាំចូលទំនិញអាមេរិកនោះ អតិរេកពាណិជ្ជកម្មរបស់ប្រទេស ចិន ជាមួយអាមេរិក បានកើនឡើងខ្ពស់បំផុតកាលពីឆ្នាំមុន ដល់ចំនួន ៣២៣,៣ ពាន់លានដុល្លារ កើនឡើង ១១ ភាគរយក្នុងឆ្នាំ ២០១៧។ នេះបើយោងតាមទិន្នន័យគយរបស់ប្រទេស ចិន ដែលចេញផ្សាយកាលពីថ្ងៃចន្ទ។
ប៉ុន្តែនៅក្នុងសញ្ញាមួយដែលថា វិធានការពិន័យរបស់សេតវិមាន កំពុងធ្វើឲ្យមានផលប៉ះពាល់នោះ ការនាំចេញរបស់ប្រទេស ចិន ទៅអាមេរិកបានធ្លាក់ចុះកាលពីខែមុន។
ការនាំចេញសរុបរបស់ប្រទេស ចិន បានធ្លាក់ចុះ ៤,៤ ភាគរយកាលពីខែធ្នូ ធៀបទៅនឹងឆ្នាំ ២០១៧ ខណៈពេលដែលការនាំចូលបានធ្លាក់ចុះចំនួន ៧,៦ ភាគរយ ដែលឆ្លុះបញ្ចាំងឲ្យឃើញពីតម្រូវការយឺតយ៉ាវនៅក្នុងស្រុក ព្រមទាំងនៅក្រៅប្រទេស៕ AFP/LA