.jpg)
លោក Tran Minh Trung នាយកប្រតិបត្តិ VinSmart ក្នុងពេលបង្ហាញទូរស័ព្ទ។ AFP
ក្រុងហូជីមិញៈ ក្រុមហ៊ុន Vingroup ដែលគ្រប់គ្រងដោយមហាសេដ្ឋីវៀតណាម កាលពីចុងសប្តាហ៍មុនបានបង្ហាញមហិច្ឆតាបច្ចេកវិទ្យារបស់ខ្លួនជាមួយនឹងការដាក់បង្ហាញទូរស័ព្ទ ស្មាតហ្វូនលើកដំបូងដែលក្រុមហ៊ុននេះ គ្រោងនឹងលក់នៅជុំវិញពិភពលោក។ នេះបើយោងតាមទីភ្នាក់ងារព័ត៌មាន Reuters។
ធ្លាប់ជាក្រុមហ៊ុនពហុផលិតផលដែលផ្តោតលើអចលនទ្រព្យ និងលក់រាយមួយ ក្រុមហ៊ុន Vingroup បានក្លាយជាក្រុមហ៊ុនផលិតរថយន្តក្នុងស្រុកទី ១ របស់វៀតណាមកាលពី ២ ខែមុនជាមួយនឹងក្រុមហ៊ុនមួយដែលមានឈ្មោះថា Vinfast។
ទូរស័ព្ទស្មាតហ្វូន Vsmart ចំនួន ៤ ម៉ូដែលដែលផលិតដោយក្រុមហ៊ុន Vinsmart ដែលជាក្រុមហ៊ុនបុត្រសម្ព័ន្ធខាងបច្ចេកវិទ្យារបស់ក្រុមហ៊ុន Vingroup កំពុងត្រូវបានផលិតក្នុងរោងចក្ររបស់ខ្លួននៅទីក្រុង Haiphong ភាគខាងជើងនៃប្រទេស វៀតណាម ដោយរោងចក្រនេះមានសមត្ថភាពផលិតទូរស័ព្ទបាន ៥ លានគ្រឿងក្នុងមួយឆ្នាំក្នុងដំណាក់កាលដំបូង។
លោក Nguyen Viet Quang ប្រធានប្រតិបត្តិ និងជាអនុប្រធានក្រុមហ៊ុន Vingroup បានថ្លែងថា៖ «ទូរស័ព្ទ Vsmart គឺជាចំណុចចាប់ផ្ដើមសម្រាប់ក្រុមហ៊ុន Vingroup ក្នុងការអភិវឌ្ឍប្រព័ន្ធអេកូឡូស៊ីនៃផលិតផលអេឡិចត្រូនិក និងវៃឆ្លាត»។
ក្រុមហ៊ុននេះ ចង់លក់ទូរស័ព្ទស្មាតហ្វូនរបស់ខ្លួន និងផលិតផលវៃឆ្លាតផ្សេងទៀតទៅកាន់ទ្វីបទាំងអស់ និងបានកំណត់ប្រទេស រុស្ស៊ី និងអេស៉្បាញថាជាទីផ្សារដ៏មានសក្ដានុពលនៅអឺរ៉ុប។
នៅវៀតណាម ដែលមានប្រជាជន ៩៥ លាននាក់ ក្រុមហ៊ុន Vingroup នឹងព្យាយាមប្រជែងយកចំណែកទីផ្សារពីក្រុមហ៊ុន Samsung និងក្រុមហ៊ុន Apple ជាមួយនឹងទូរស័ព្ទស្មាតហ្វូនថ្មីៗរបស់ខ្លួន។
វៀតណាមគឺជាមូលដ្ឋានផលិតទូរស័ព្ទស្មាតហ្វូនឈានមុខគេសម្រាប់ក្រុមហ៊ុន Samsung ខណៈដែលក្រុមហ៊ុន Foxconn ដែលជាក្រុមហ៊ុនផ្គត់ផ្គង់របស់ក្រុមហ៊ុន Apple ដ៏សំខាន់ កំពុងពិចារណាបង្កើតរោងចក្រក្នុងប្រទេសនេះផងដែរ។
ទូរស័ព្ទ Vsmart ចំនួន ៤ ម៉ូដែលដែលត្រូវបានដាក់បង្ហាញកាលពីថ្ងៃសុក្រ ប្រើប្រាស់បន្ទះឈីប Snapdragon 435, Snapdragon 430 និង Snapdragon 660 របស់ក្រុមហ៊ុន Qualcomm និងប្រព័ន្ធប្រតិបត្តិការ Android របស់ Google។
ទូរស័ព្ទទាំងនោះនឹងដាក់លក់នៅក្នុងប្រទេស វៀតណាម ចាប់ពីថ្ងៃសៅរ៍ ដោយមានតម្លៃចាប់ពី ១២០ ទៅ ២៨០ ដុល្លារ)៕ LA
