.jpg)
ក្រាហ្វិច អំពីទំហំ និងបរិមាណជួញដូរជាមធ្យមប្រចាំថ្ងៃនៃទីផ្សារភាគហ៊ុន ១០ ថ្ងៃមុន និង១០ថ្ងៃកំឡុងពេលបិទខ្ទប់ របស់ផ្សារមូលមត្រកម្ពុជា ។ ហ៊ាន រង្សី
សន្ទស្សន៍ភាគហ៊ុនរបស់ក្រុមហ៊ុនផ្សារមូលបត្រកម្ពុជា (CSX) បានកើនឡើងខ្ពស់បំផុតរហូតដល់ ៦៤៨,៣៣ ពិន្ទុ នៅពាក់កណ្ដាលពេលបិទខ្ទប់មុនពេលដាំក្បាលចុះ ដែលផ្ទុយពីរយៈពេលមុនពេលបិទខ្ទប់ដែលមិនសូវមានចលនាឡើងចុះ។
យោងតាមសេចក្ដីប្រកាសព័ត៌មានបានពី CSX កាលពីចុងសប្ដាហ៍មុន សកម្មភាពជួញដូរក្នុងទីផ្សារមូលបត្រក្នុងអំឡុងពេលបិទខ្ទប់ជាមួយនឹងកំណើនទំហំជួញដូរ និងបរិមាណជួញដូរជាមធ្យមប្រចាំថ្ងៃប្រមាណ ១៣ ភាគរយ និង ១៩ ភាគរយរៀងគ្នា ផ្អែកតាមការប្រៀបធៀបទិន្នន័យនៅ ១០ ថ្ងៃមុន និង ១០ ថ្ងៃក្នុងអំឡុងពេលបិទខ្ទប់។
ទិន្នន័យបង្ហាញថា សកម្មភាពជួញដូរភាគហ៊ុនជារួមបានកើនឡើងពេញមួយរយៈពេលនៃការបិទខ្ទប់នេះ។ ទំហំជួញដូរភាគហ៊ុនសរុបជាមធ្យមប្រចាំថ្ងៃបានឈានដល់ ២៤១,៦៣ លានរៀល (ប្រមាណជា ៦០ ពាន់ដុល្លារអាមេរិក) ដែលមានការកើនឡើងប្រមាណ ១៣ ភាគរយ បើធៀបនឹងចំនួនជាមធ្យម ២១៤,៥៩ លានរៀល (ប្រហែលជា ៥៤ ពាន់ដុល្លារអាមេរិក) កាលពីរយៈពេល ១០ ថ្ងៃមុនការបិទខ្ទប់។
ស្រដៀងគ្នានឹងនេះដែរ បរិមាណនៃការជួញដូរជាមធ្យមមានប្រមាណ ៤៤,៣១៨ ហ៊ុនក្នុងមួយថ្ងៃក្នុងអំឡុងពេលនៃការបិទខ្ទប់នេះ បើធៀបនឹងចំនួនជាមធ្យម ៣៧,៣៥៨ ហ៊ុន ដោយមានការកើនឡើងប្រហែល ១៩ ភាគរយ។
ទំហំជួញដូរភាគហ៊ុនក្នុងមួយថ្ងៃដែលខ្ពស់បំផុតក្នុងរយៈពេលបិទខ្ទប់មានចំនួនរហូតដល់ ៥៣១,៧៣ លានរៀល (ប្រមាណជា ១៣៣ ពាន់ដុល្លារអាមេរិក) បើធៀបនឹងចំនួនត្រឹម ៤២០,២១ លានរៀល (ប្រមាណជា ១០៥ ពាន់ដុល្លារអាមេរិក) ជាតួលេខខ្ពស់បំផុតក្នុងរយៈពេល ១០ ថ្ងៃមុនការបិទខ្ទប់។
CSX បានឲ្យដឹងថា៖ «កំណើននៃសកម្មភាពជួញដូរនេះ ក៏បានផ្ដល់ឥទ្ធិពលល្អ ដោយផ្ទាល់ផងដែរមកលើសន្ទស្សន៍ CSX ដែលបានធ្វើឲ្យពិន្ទុនៃសន្ទស្សន៍នេះឡើងមកដល់ចំណុចខ្ពស់ជាងគេសម្រាប់ឆ្នាំ ២០២១ គិតត្រឹមពេលបច្ចុប្បន្ននេះ»។ CSX បន្តថា ចាប់តាំងពីថ្ងៃជួញដូរដំបូងនៃការបិទខ្ទប់ សន្ទស្សន៍ CSX បានកើនឡើងជាបន្តបន្ទាប់រហូតដល់កម្រិតខ្ពស់បំផុត គឺ ៦៤៨,៣៣ ពិន្ទុ កាលពីថ្ងៃពុធទី ២៨ ខែមេសា ហើយក្រោយមកដាំក្បាលចុះមកវិញយ៉ាងខ្លាំងនៅ ២ ថ្ងៃបន្ទាប់មុនពេលងើបឡើងវិញបន្តិចមកវិញដល់ទីតាំងដើម។ ផ្ទុយទៅវិញ សន្ទស្សន៍កាលពី ១០ ថ្ងៃមុនការបិទខ្ទប់ ហាក់នៅនឹងមានការប្រែប្រួលតិចតួចក្នុងរង្វង់ពី ៦៣៨ ទៅត្រឹម ៦៤២ ពិន្ទុប៉ុណ្ណោះ។
លោក ហុង សុហួរ អគ្គនាយក CSX បានបញ្ជាក់ថា ការកើនឡើងនៃសកម្មភាពជួញដូរក្នុងទីផ្សារភាគហ៊ុនក្នុងអំឡុងពេលបិទខ្ទប់បានបង្ហាញថា វិនិយោគិនងាកមកចាប់អារម្មណ៍ជួញដូរភាគហ៊ុនច្រើន ដោយសារតែវាជាវិស័យដែលអនុញ្ញាតឲ្យពួកគាត់នៅតែអាចធ្វើការវិនិយោគបាន ដើម្បីទទួលបានប្រាក់ចំណូលបន្ថែម ទោះបីគាត់នៅតែក្នុងផ្ទះមិនអាចចេញទៅណាបានក៏ដោយ។
លោកថ្លែងថា៖ «វាបានបង្ហាញយ៉ាងច្បាស់ពីចំណុចពិសេសនៃការវិនិយោគក្នុងទីផ្សារភាគហ៊ុន សម្រាប់ប្រជាជនទូទៅ ដែលពួកគាត់អាចក្លាយជាម្ចាស់ហ៊ុននៃក្រុមហ៊ុនល្អៗជាច្រើន ដោយមិនបាច់ចំណាយពេលខ្លួនឯង ដើម្បីបង្កើតអាជីវកម្ម។
កាលពីថ្ងៃទី ៧ ខែឧសភា ភាគហ៊ុន PPAP បានបំបែកកំណត់ត្រាថ្មី ដោយឡើងរហូតដល់ថ្លៃខ្ពស់បំផុត គឺ ១៥.២៦០៛ ដែលពុំធ្លាប់មានពីមុនមក។ គួររំឭកផងដែរថា ថ្លៃ IPO របស់ភាគហ៊ុននេះ គឺត្រឹម ៥.១២០៛ ក្នុងមួយហ៊ុន តែប៉ុណ្ណោះ។
ទន្ទឹមនឹងនេះ ភាគហ៊ុនផ្សេងទៀតនៅលើទីផ្សារក្នុងថ្ងៃដដែលនេះ ក៏មានការកើនឡើងគួរឱ្យកត់សម្គាល់ផងដែរ។ ភាគហ៊ុន PWSA GTI PPSP PAS ABC និង PEPC មានការកើនឡើងរហូតដល់ ៨.២៤០៛ ៤.៤២០៛ ១.៩៧០៛ ១៣.៨៨០៛ ១៦.៦០០៛ និង ៣.២០០៛ រៀងគ្នា ដោយមានកំណើនចន្លោះពី ២០៛ ដល់ទៅ ៥៤០៛ ក្នុងមួយហ៊ុន។
សន្ទស្សន៍ ផ.ម.ក. មានកំណើន ១,៣១% បន្ថែមទៀត ដោយឡើងរហូតដល់ ៦៥៧,៤៦ ពិន្ទុ។ រីឯទំហំជួញដូរភាគហ៊ុនសរុបក៏មានកំណើនដល់ជាងមួយប៊ីលានរៀលផងដែរ ពោលគឺឡើងដល់ ១.០៤២,៣៨ លានរៀល ហើយភាគហ៊ុន PWSA បានគ្របដណ្តប់ដល់ទៅប្រមាណ ៤០% នៃទំហំជួញដូរភាគហ៊ុនសរុប។
CSX ក៏បានចង្អុលបង្ហាញថា ៩៩ ភាគរយនៃការបញ្ជាទិញទាំងអស់ក្នុងអំឡុងពេលបិទខ្ទប់ត្រូវបានទទួលតាមរយៈប្រព័ន្ធជួញដូរចល័ត (MTS)៕LA
