.jpg)
ក្រុងវែលីងតោនៈ កំណើនសេដ្ឋកិច្ចរបស់ប្រទេស នូវែលសេឡង់ នៅតែទទួលបានកំណើនទាប ០,៦ ភាគរយ នៅក្នុងរយៈពេល ៣ ខែដំបូង ក្នុងឆ្នាំ ២០១៩ នេះ ដែលជំរុញឲ្យមានការរំពឹងថានឹងមានការទម្លាក់អត្រាការប្រាក់បន្ថែមទៀត មុនដំណាច់ឆ្នាំនេះ។ នេះបើយោងតាមទិន្នន័យផ្លូវការកាលពីថ្ងៃម្សិលមិញ។
ការិយាល័យស្ថិតិរបស់នូវែលសេឡង់បានឲ្យដឹងថាកំណើនតិចបំផុតនៃផលិតផលក្នុងស្រុកសរុបសម្រាប់ត្រីមាសទី១ នេះ មានអត្រាដូចគ្នាទៅនឹងអត្រាកំណើននៅត្រីមាសទី៤ ឆ្នាំ ២០១៨ ដែរ។
ការិយាល័យស្ថិតិនេះបានឲ្យដឹងបន្តថា តួលេខប្រចាំត្រីមាសទី១ នេះ ត្រូវបានជំរុញដោយកំណើន ៣,៧ ភាគរយក្នុងវិស័យសំណង់ និងបាននាំឲ្យអត្រាកំណើនប្រចាំឆ្នាំរបស់ប្រទេសនេះសម្រាប់ឆ្នាំ ដែលបានបញ្ចប់នៅថ្ងៃទី ៣១ ខែ មីនា ឆ្នាំនេះ ដល់ ២,៧ ភាគរយ។
ធនាគារកណ្តាលនូវែលសេឡង់ បានទម្លាក់អត្រាការប្រាក់មូលដ្ឋានរបស់ខ្លួនដល់កម្រិតទាបបំផុត ១,៥ ភាគរយ នៅខែឧសភា ក្នុងគោលបំណងជំរុញកំណើនសេដ្ឋកិច្ចដែលកំពុងថមថយសម្ទុះនេះ។
ក្រុមហ៊ុន Capital Economics បានឲ្យដឹងថា តួលេខចុងក្រោយបំផុតនេះ ទំនងជាជំរុញឲ្យមានវិធានការបន្ថែមទៀតពីធនាគារកណ្តាល។
លោក Ben Udy សេដ្ឋវិទូប្រចាំក្រុមហ៊ុននេះ បានថ្លែងថា៖ «យើងគិតថា សកម្មភាពសេដ្ឋកិច្ចជាចុងក្រោយនឹងបង្ហាញពីការអស់សង្ឃឹម ដោយជាមធ្យមមានកំណើនត្រឹមតែ ២,២ ភាគរយប៉ុណ្ណោះ នៅក្នុងឆ្នាំ ២០១៩ ដែលទាបជាងអត្រាកំណើនសក្តានុពលរបស់ប្រទេសដែលមានប្រហែល ២,៨ ភាគរយ»។
លោកមានប្រសាសន៍ទៀតថា៖ «បើយើងគិតត្រូវ ការណ៍នោះអាចជំរុញឲ្យធនាគារកណ្តាលទម្លាក់អត្រាការប្រាក់ម្តងទៀតឲ្យដល់កម្រិតទាបបំផុតថ្មីមួយ ១,២៥ ភាគរយ នៅមុនដំណាច់ឆ្នាំនេះ»៕ AFP/KC
