ភ្នំពេញៈ អ្នកធ្វើដំណើរតាមសេវាដឹកអ្នកដំណើរតាមផ្លូវទឹកនៅក្នុងទីក្រុងភ្នំពេញបានត្អូញត្អែរពីភាពរអាក់រអួលសេវាតាមផ្លូវទឹក ដែលទើបនឹងដំណើរការមួយនេះ និងស្នើអាជ្ញាធរពិនិត្យពីគុណភាពសេវាឡើងវិញ ដើម្បីទាក់ទាញអ្នកដំណើរឲ្យបានកាន់តែច្រើនឡើង។
សេវាដឹកជញ្ជូនសាធារណៈតាមផ្លូវទឹកក្នុងទីក្រុងភ្នំពេញត្រូវបានដាក់ឲ្យដំណើរការកាលពីខែកក្កដា ឆ្នាំ ២០១៨ ដែលមានទិសដៅចេញពីតំបន់ឫស្សីកែវ ឆ្ពោះទៅកាន់ក្រុងតាខ្មៅ។ សេវាកម្មដឹកជញ្ជូនអ្នកដំណើរតាមផ្លូវទឹក មានកាណូតដឹកជញ្ជូនអ្នកដំណើរចំនួន ៤ គ្រឿង ដែលកាណូតនីមួយៗអាចផ្ទុកមនុស្សបាន ៦០ នាក់ ដែលប្រតិបត្តិការប្រចាំថ្ងៃ។ នេះបើតាមកាលវិភាគនៃការធ្វើដំណើរនៃសេវានេះ។
សេវានេះមានចំណតចំនួន ៥ នៅតាមបណ្តោយផ្លូវទឹកទន្លេសាបក្នុងក្រុងភ្នំពេញ រហូតដល់ទន្លេបាសាក់ក្នុងក្រុងតាខ្មៅ។ ការធ្វើដំណើរតាមផ្លូវទឹកមកដល់ពេលនេះមិនត្រូវបានគិតថ្លៃនោះទេ។
ភ្នំពេញប៉ុស្តិ៍ បានទៅសម្ភាសអ្នកដំណើរនៅចំណតផែផ្សាររាត្រីជាច្រើននាក់កាលពីថ្ងៃម្សិលមិញដោយពួកគេអះអាងថា សេវាតាមផ្លូវទឹកមួយនេះមិនសូវទាក់ទាញអ្នកដំណើរនោះទេ។
លោក កែវ ពៅ ជាមន្ត្រីរាជការបម្រើការនៅខណ្ឌឫស្សីកែវ ដែលធ្វើដំណើរប្រចាំថ្ងៃតាមកាណូតដើម្បីទៅធ្វើការប្រាប់អ្នកយកព័ត៌មានភ្នំពញ ប៉ុស្តិ៍ថា សេវាដឹកជញ្ជូនសាធារណៈផ្លូវទឹកពិតជាមានសារៈសំខាន់ណាស់ការងារប្រចាំថ្ងៃរបស់គាត់។ លោកថ្លែងថា៖ «មានសេវាកម្មដឹកជញ្ជូនផ្លូវទឹកពិតជាល្អណាស់ ខ្ញុំចូលចិត្តជិះកាណូតទៅធ្វើការ វាជួយសម្រួលដល់ខ្ញុំច្រើនណាស់»។
ទោះបីយ៉ាងនេះក្តី លោកបាន សម្តែងការខកចិត្តថា ក្រោយពីដំណើរការបានមួយរយៈ កាលវិភាគធ្វើដំណើរមានការផ្លាស់ប្តូរមិនទៀងទាត់ ដោយគ្មានការជូនដំណឹងដល់អ្នកដំណើរជាមុនទេ។ លោកបន្តថា៖ «ពុំមានការជូនដំណឹងជាមុន វាបានធ្វើឲ្យខកពេលវេលាការងារ ដែលធ្វើឲ្យប៉ះពាល់ដល់អ្នកដំណើរ»។
លោកបន្តថា៖ «ខ្ញុំតែងជិះជាមួយមិត្តភកិ្ដ តែកាលវិភាគកាណូតមានការផ្លាស់ប្តូរ និងមានការខកខានច្រើន ធ្វើឲ្យពួកគាត់ដូរទៅជិះឡានក្រុង និងធ្វើដំណើរដោយខ្លួនឯងវិញ»។
លោក វិ ទូ ដែលរស់នៅតាខ្មៅ កំពុងរង់ចាំកាណូតនៅផ្សារចាស់ដើម្បីទៅផ្ទះវិញ បាននិយាយថា សេវាកម្មដឹកជញ្ជូនពុំមានគុណភាពដូចពីមុនទេ ដោយមិនមានការគោរពពេលវេលាត្រឹមត្រូវ និងមានការខកខានច្រើន។
លោកបានបន្ត៖ «សេវាកម្មដឹកជញ្ជូនល្អហើយ ប៉ុន្តែមានការខកខានច្រើនពេក ជួនកាលខ្ញុំត្រូវដូរទៅជិះឡានក្រុងវិញ ខ្ញុំខាតពេលច្រើនដងហើយ»។ លោកបន្តថា ដើម្បីជំរុញដល់ការធ្វើដំណើរតាមផ្លូវទឹក ដែលវារួមចំណែកកាត់បន្ថយការកកស្ទះក្នុងរាជធានីភ្នំពេញ លុះត្រាតែសេវាកម្មល្អ និងមានកាលវិភាគត្រឹមត្រូវ។
បច្ចុប្បន្ននេះរដ្ឋាភិបាលកំពុងជំរុញការប្រើប្រាស់សេវាដឹកអ្នកដំណើរសាធារណៈដើម្បីកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ ដោយក្នុងនោះរាជរដ្ឋាភិបាលបានដាក់ឲ្យមានសេវារថយន្តក្រុងដឹកជញ្ជូនសាធារណៈ និងរថភ្លើងពីស្ថានីយរាជាយស្ម័យយានភ្នំពេញទៅកាន់ព្រលានយន្តហោះអន្តរជាតិភ្នំពេញជាដើម។
លោក វឿន បញ្ញា អនុប្រធានប្រតិបត្តិការនៃរដ្ឋាករស្វយ័តដឹកជញ្ជូនសាធារណៈរាជធានីភ្នំពេញបានឲ្យដឹងថា រដ្ឋាករស្វយ័តដឹកជញ្ជូនសាធារណៈរាជធានីភ្នំពេញ កំពុងតែសិក្សាពីទីផ្សារ និងបន្តផ្សព្វផ្សាយដើម្បីឲ្យមានការយល់ដឹងពីសេវាកម្មដឹកជញ្ជូន។ លោកបន្តថា៖ «ចំនួនអ្នកជិះកាណូតនៅតែមានការកើនឡើង តែបើធៀបឡានក្រុងនៅមានកម្រិតនៅឡើយ អ្នកជិះកម្សាន្តមានចំនួនច្រើនជាងអ្នកធ្វើការងារ»។
តាមលោក វឿន បញ្ញា បច្ចុប្បន្នអ្នកដំណើរប្រចាំសប្តាហ៍មានចំនួនជាមធ្យម ៤០ ទៅ ៥០ នាក់ ចំណែកចុងសប្តាហ៍មានចំនួនមធ្យម ១០០ នាក់។ លោកបន្តថា៖ «យើងកំពុងតែសិក្សាបន្ថែមលើទីផ្សារ និងតម្រូវការ ដើម្បីទាក់ទាញចំនួនអ្នកជិះឲ្យបានច្រើន»។
បច្ចុប្បន្នរដ្ឋាភិបាលបានដាក់ឲ្យដំណើរការសេវារថយន្តក្រុងសាធារណៈដែលមានខ្សែរត់ចំនួន ៨ ក្នុងការភ្ជាប់តំបន់នានាក្នុងក្រុងភ្នំពេញ និងចេញទៅផ្លូវជាតិទាំង ៦ ពីម៉ោង ៥:៣០ នាទីរហូតដល់ម៉ោង ២០:៣០ នាទីជារៀងរាល់ថ្ងៃជាមួយនឹងរថយន្ត ១៥៥ គ្រឿង ដោយមានមនុស្សជិះជាង ២ ម៉ឺននាក់ក្នុង ១ ថ្ងៃ។ នេះបើតាមទិន្នន័យរបស់អាជ្ញាធរក្រុងកន្លងមក៕