.jpg)
បុគ្គលិកនៅព្រលានយន្តហោះកំពុងធ្វើសញ្ញាបញ្ជាពេលយន្តហោះចុះចតនៅព្រលានយន្តហោះអន្តរជាតិភ្នំពេញកន្លងមក។ ភ្នំពេញ ប៉ុស្តិ៍
ភ្នំពេញៈ ក្រុមហ៊ុនអាកាសចរណ៍ថ្មី ២ បន្ថែមទៀតគ្រោងនឹងបើកដំណើរការសេវាហោះហើរក្នុងទីផ្សារអាកាសចរណ៍កម្ពុជានៅចុងឆ្នាំនេះ ខណៈក្រុមហ៊ុន ៤ ផ្សេងទៀតកំពុងស្ថិតក្នុងដំណាក់កាលសុំវិញ្ញាបនបត្រហោះហើរ (AOC)។ នេះបើតាមលោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល។
លោកថ្លែងថាក្រុមហ៊ុនអាកាសចរណ៍ MJ airline និង ដំរីអង្គរអ៊ែរឡាញទទួលបានការយល់ព្រមពីរដ្ឋាភិបាលសម្រាប់ការចូលនៅក្នុងឧស្សាហកម្មអាកាសចរណ៍កម្ពុជា បន្ទាប់ពីបានដាក់ពាក្យសុំ AOC ដែលតាមការគ្រោងទុក ក្រុមហ៊ុននេះគ្រោងនឹងប្រតិបត្តិការនៅចុងឆ្នាំនេះ ខណៈក្រុមហ៊ុនអាកាសចរណ៍ ៤ ផ្សេងទៀតកំពុងស្ថិតលើដំណើរការសុំ AOC ផងដែរ។
លោកបន្តថាក្រុមហ៊ុនអាកាសចរណ៍ MJ airline និង ដំរីអង្គរអ៊ែរឡាញ គឺជាការវិនិយោគរួមជាមួយវិនិយោគិនកម្ពុជា និងចិន។ ក្រុមហ៊ុនអាកាសចរណ៍នេះនឹងពឹងផ្អែកលើទីផ្សារប្រទេសចិនជាសំខាន់។
លោកថ្លែងថា៖ «តាមការគ្រោងទុកក្រុមហ៊ុន MJ airline នឹងប្រតិបត្តិការនៅចុងឆ្នាំនេះ ហើយក្រុមហ៊ុនអាកាសចរណ៍ ដំរីអង្គរអ៊ែរឡាញនឹងប្រតិបត្តិការនៅដើមឆ្នាំក្រោយ»។ លោកបានបន្តថា៖ «ក្រុមហ៊ុនអាកាសចរណ៍ទាំង ២ នេះនឹងទាក់ទាញការមកដល់ភ្ញៀវទេសចរជនជាតិចិនមកកម្ពុជា»។ លោកបន្ថែមថា ក្រុមហ៊ុនអាកាសចរណ៍ទាំង ២ គឺជាក្រុមហ៊ុនហោះហើរទៀងទាត់។
លោកបញ្ជាក់ថាបច្ចុប្បន្នមានក្រុមហ៊ុនអាកាសចរណ៍ក្នុងស្រុកចំនួន ៧ កំពុងប្រតិបត្តិការ ។
លោកបន្តថា៖ «តាមចំនួននៃការចូលមករបស់ក្រុមហ៊ុនអាកាសចរណ៍ វាច្រើនបន្តិចក្នុងការដោះស្រាយសម្រាប់ទីផ្សារអាកាសចរណ៍ ប៉ុន្តែវាល្អដែលយើងមានការប្រកួតប្រជែងដ៏ល្អ និងផ្ដល់ជម្រើសកាន់តែច្រើនសម្រាប់អតិថិជន»។
រដ្ឋមន្ត្រីក្រសួងទេសចរណ៍កាលពីចុងសប្តាហ៍មុនក៏បានអះអាងថាក្នុងរយៈពេល ៣ ខែខាងមុខទៀតនឹងមានការហោះហើរត្រង់ពីឥណ្ឌូនេស៊ីមកប្រទេសកម្ពុជា ប៉ុន្តែលោកមិនបានបញ្ជាក់ពីកាលបរិច្ឆេទច្បាស់លាស់ទេ។ ដំណឹងនៃការហោះហើរត្រង់រវាងកម្ពុជា និងឥណ្ឌូនេស៊ីត្រូវបានគេលើកឡើងជាច្រើនដងមកហើយ។
របាយការណ៍បានពីមជ្ឈមណ្ឌលអាកាសចរណ៍អាស៊ីប៉ាស៊ីហ្វិកដែលបានចេញផ្សាយកាលពីថ្ងៃសុក្របានឲ្យដឹងថា ខណៈវិស័យអាកាសចរណ៍របស់កម្ពុជាកំពុងរីកចម្រើនយ៉ាងរហ័ស «វាពិបាកក្នុងការគិតពីទំហំទីផ្សាររបស់ប្រទេសកម្ពុជា ដែលគាំទ្រក្រុមហ៊ុនអាកាសចរណ៍ច្រើនជាង ៥ ណាស់ កុំថាឡើយទៅដល់ ១០ ក្រុមហ៊ុនក្នុងរយៈពេលយូរនោះ»។
នៅត្រីមាសទី ១ ឆ្នាំ ២០១៨ មានអ្នកដំណើរប្រហែល ៣ លាននាក់បានធ្វើដំណើរឆ្លងកាត់ព្រលានយន្តហោះនៅភ្នំពេញ សៀមរាប និងក្រុងព្រះសីហនុ កើនឡើង ២៥ ភាគរយនៅត្រីមាសទី ១ កាលពីឆ្នាំ ២០១៧។ នេះបើយោងតាមលោក ខែក នរិន្ទដា នាយកផ្នែកគមនាគមន៍ និងទំនាក់ទំនងសាធារណៈនៅក្រុមហ៊ុន Cambodia Airports។
លោកថ្លែងថា៖ «យើងអាចត្រូវការពេលវេលាបន្ថែមទៀត និងចក្ខុវិស័យក្នុងការមើលទីផ្សារកម្រិតណាដែលនឹងអាចស្រូបយកក្រុមហ៊ុនក្នុងស្រុកថ្មីៗទាំងអស់នោះ»។
លោកបានបន្តថា៖ «និន្នាការនេះអាចធ្លាក់ចុះឆ្ពោះទៅរកការច្របាច់បញ្ចូលគ្នានៅពេលណាមួយ»៕ LA
