.jpg)
កម្មករ-កម្មការិនី ធ្វើការក្នុងរោងចក្រផលិតនំមួយកន្លែង។ ភ្នំពេញ ប៉ុស្តិ៍
ភ្នំពេញ: លោក ឡី សុភាព ប្រធានសហព័ន្ធវិនិយោគកម្ពុជា និងជាប្រធានសហព័ន្ធពាណិជ្ជកម្មតាមប្រព័ន្ធអេឡិចត្រូនិកកម្ពុជាលើកឡើងថា ការធ្វើពាណិជ្ជកម្មតាមប្រព័ន្ធអេឡិចត្រូនិកគឺជាឱកាសថ្មីសម្រាប់វិស័យសហគ្រាសខ្នាតតូច និងមធ្យមដែលស្របទៅនឹងទស្សនវិស័យរបស់រដ្ឋាភិបាលនៃសេដ្ឋកិច្ចឌីជីថល។
ថ្លែងក្នុងសិក្ខាសាលាស្តីពីពាណិជ្ជកម្មតាមប្រព័ន្ធអេឡិចត្រូនិកកាលពីថ្ងៃអាទិត្យ រៀបចំដោយក្រុមហ៊ុន E-ZONE TRADING PLC លោក សុភាព ឲ្យដឹងថា បដិវត្តន៍ឧស្សាហកម្ម ៤.០ កំពុងជំរុញឲ្យការធ្វើអាជីវកម្មតាមប្រព័ន្ធអេឡិចត្រូនិកកាន់តែខ្លាំង។
ប៉ុន្តែលោកបន្តថា រដ្ឋាភិបាលត្រូវធ្វើការផ្សព្វផ្សាយច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកឲ្យបានទូលំទូលាយ។
លោកថ្លែងថា៖ «អ្នករកស៊ីតាមប្រព័ន្ធអេឡិចត្រូនិកនឹងមានឱកាសក្លាយជាអ្នកមានច្រើន បើការរកស៊ីត្រឹមត្រូវតាមច្បាប់ ដូច្នេះរដ្ឋាភិបាលត្រូវជំរុញឲ្យអ្នកប្រកបរបរអាជីវកម្មតាមប្រព័ន្ធអេឡិចត្រូនិកមកចុះបញ្ជីនៅច្រកចេញចូលតែមួយ ដើម្បីងាយស្រួលគ្រប់គ្រង»។
កាលពីខែតុលាឆ្នាំមុនរដ្ឋសភាបានអនុម័តលើសេចក្តីព្រាងច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក ដែលច្បាប់នេះគេរំពឹងថានឹងផ្តល់លទ្ធភាពយ៉ាងច្រើនដល់សហគ្រាសធុនតូច និងមធ្យមនៅកម្ពុជា ដើម្បីផ្សារភ្ជាប់ខ្លួនទៅនឹងចង្វាក់ផលិតកម្មទៅទីផ្សារក្នុងស្រុក និងក្រៅស្រុក។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានឲ្យដឹងថា៖ «ក្រោយពីយើងមានច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក រដ្ឋាភិបាលនឹងចេញអនុក្រឹត្យដើម្បីអនុវត្តច្បាប់នេះបន្ថែមទៀត»៕LA
