ភ្នំពេញៈ ព្រលានយន្តហោះអន្តរជាតិទាំង ៣ របស់កម្ពុជាបានរាយការណ៍ពីកំណើនអ្នកដំណើរជាង ១០ ភាគរយ កាលពី ២០១៩ ធៀបនឹង ២០១៨។
ទិន្នន័យចុងក្រោយបានមកពីក្រុមហ៊ុន Cambodia Airports ចេញផ្សាយកាលពីថ្ងៃអង្គារបង្ហាញថា ការធ្វើចរាចរណ៍តាមផ្លូវអាកាសកាលពីឆ្នាំ ២០១៩ របស់កម្ពុជាបានទទួលអ្នកដំណើរប្រហែល ១១,៦ លាននាក់ កើនឡើង ១០,២ ភាគរយ ធៀបនឹងឆ្នាំ ២០១៨។
តួលេខបានបង្ហាញថា ព្រលានយន្តហោះអន្តរជាតិភ្នំពេញទទួលអ្នកដំណើរប្រហែល ៦ លាននាក់ បានកើនឡើង ១១,២ ភាគរយ ព្រលានយន្តហោះអន្តរជាតិសៀមរាបបានស្វាគមន៍អ្នកដំណើរប្រហែល ៣,៩ លាននាក់ បានធ្លាក់ចុះ ១២,៣ ភាគរយ ធៀបនឹងឆ្នាំ ២០១៨ ខណៈដែលព្រលានយន្តហោះអន្តរជាតិព្រះសីហនុបានស្វាគមន៍អ្នកដំណើរ ១,៦ លាននាក់ កើន ១៥៨ ភាគរយ ធៀបនឹងឆ្នាំ ២០១៨។ ប៉ុន្តែនៅត្រីមាសចុងក្រោយឆ្នាំ ២០១៩ អ្នកដំណើររួមគ្នានៅក្នុងព្រលានយន្តហោះទាំង ៣ បានធ្លាក់ចុះ ៣,១ ភាគរយ។
លោក ខែក នរិន្ទដា នាយកទំនាក់ទំនង និងទំនាក់ទំនងសាធារណៈនៅ Cambodia Airports បានឲ្យដឹងថាក្នុងរយៈពេលពេញ ១ ឆ្នាំ ២០១៩ កំណើនអ្នកដំណើរសរុបនៅក្នុងព្រលានយន្តហោះទាំង ៣ រួមបញ្ចូលគ្នាមានចំនួនជាង ១០,២ ភាគរយ ខណៈការធ្លាក់ចុះនៅក្នុងរយៈពេល ៣ ខែចុងក្រោយ (ត្រីមាសទី ៤) ឆ្នាំ ២០១៩ ចំនួន ៣,១ ភាគរយ គឺដោយសារតែភាពមិនច្បាស់លាស់នៃសេដ្ឋកិច្ចពិភពលោក។
លោកថ្លែងថា៖ «ការធ្លាក់ចុះដែលបានជួបប្រទះនៅត្រីមាសចុងក្រោយឆ្នាំ ២០១៩ បានឆ្លុះបញ្ចាំងពីភាពមិនច្បាស់លាស់នៃសេដ្ឋកិច្ចពិភពលោក ការធ្លាក់ចុះភ្ញៀវទេសចរជាប្រចាំនៅសៀមរាបអាស្រ័យហេតុនេះតម្រូវការការធ្វើដំណើរ និងការផ្ដល់ជូនតាមផ្លូវអាកាសកាន់តែតិច»។ លោកបន្តថា៖ «យើងនឹងសម្លឹងមើលដោយប្រុងប្រយ័ត្នលើតួលេខការធ្វើចរាចរនៅដើមឆ្នាំ ២០២០ មុនពេលយើងអាចមាននិន្នាការទូទៅ និងការបញ្ចប់»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានឲ្យដឹងថា ប្រទេសកម្ពុជាមានការកែលម្អច្រើនក្នុងវិស័យអាកាសចរណ៍កាលពីឆ្នាំមុន ដោយសារក្រុមហ៊ុនអាកាសចរណ៍ជាច្រើនកំពុងបើកដំណើរការជាពិសេសជាមួយប្រទេសចិន។
លោកស្រី ស៊ីវលីន បានឲ្យដឹងថា ទោះបីជាចំនួនភ្ញៀវទេសចរធ្លាក់ចុះនៅក្នុងខេត្តសៀមរាបក៏ដោយ តែវានឹងមានផលប៉ះពាល់ធ្ងន់ធ្ងរដល់ឧស្សាហកម្មទេសចរណ៍ទាំងមូល ខណៈកម្ពុជាបានធ្វើពិពិធកម្មទិសដៅទេសចរណ៍។ លោកស្រីបន្តថា៖ «នៅពេលនេះយើងកំពុងរួមដៃគ្នាពីវិស័យឯកជន និងស្ថាប័នរដ្ឋាភិបាល ដើម្បីលើកកម្ពស់ឧស្សាហកម្មរបស់យើង និងដើម្បីកែលម្អសេវា និងធ្វើពិពិធកម្មផលិតផលទេសចរណ៍កាន់តែច្រើន ដើម្បីផ្គត់ផ្គង់ដល់ភ្ញៀវទេសចរ»។
លោក តុប សុភ័ក្ដ អ្នកនាំពាក្យក្រសួងទេសចរណ៍បានឲ្យដឹងថា ការមកដល់ភ្ញៀវទេសចរបរទេសនៅខេត្តសៀមរាបបានធ្លាក់ចុះ ១៥ ភាគរយ កាលពីឆ្នាំមុនធៀបនឹងរយៈពេលដូចគ្នាពីឆ្នាំ ២០១៨។
ប៉ុន្តែលោកសង្ឃឹមថា ជាមួយនឹងកំណើនជើងហោះហើរផ្ទាល់ថ្មីៗមកពីទិសដៅផ្សេងទៀតនឹងជាការបង្កើនផ្សេងដើម្បីទាក់ទាញភ្ញៀវទេសចរកាន់តែច្រើនមកទស្សនាខេត្តនេះ។ កាលពីឆ្នាំមុនកម្ពុជាស្វាគមន៍ភ្ញៀវទេសចរបរទេសប្រហែល ៦,៧ លាននាក់ កើន ៨ ភាគរយ ធៀបនឹងឆ្នាំ ២០១៨៕LA