រថភ្លើងដែលរត់កណ្តាលក្រុងទៅអាកាសយានដ្ឋានអន្តរជាតិភ្នំពេញ ដែលដាក់ដំណើរការម្សិលមិញ។ ហេង ជីវ័ន
ភ្នំពេញៈ អ្នកបើកតាក់ស៊ី និងអ្នករត់រឺម៉កម៉ូតូ បានបង្ហាញពីក្តីបារម្ភពីផលប៉ះពាល់ដល់មុខរបររបស់ពួកគេនៅពេលសេវារថភ្លើងពីព្រលានយន្តហោះអន្តរជាតិភ្នំពេញ ទៅកណ្តាលទីក្រុង ដំណើរការពេញលេញ។
ការព្រួយបារម្ភនេះកើតមានឡើង ខណៈសេវារថភ្លើងពីស្ថានីយរថភ្លើងទៅព្រលានយន្តហោះអន្តរជាតិភ្នំពេញបានបើកដំណើរការ នៅថ្ងៃនេះ។
មានរថភ្លើង ២ គ្រឿងដែលបានដាក់ដំណើរការក្នុងដំណាក់កាលដំបូង ដែលរថភ្លើងនីមួយៗអាចផ្ទុកអ្នកដំណើរបាន ១០០ នាក់។ ប៉ុន្តែនេះហាក់ជាដំណឹងមិនល្អសម្រាប់អ្នករត់តាក់ស៊ី និងរឺម៉កម៉ូតូ នៅព្រលានយន្តហោះ ដោយពួកគេនិយាយថានឹងប៉ះពាល់ដល់មុខរបរពួកគេនៅថ្ងៃខាងមុខ។
លោក អូន វិចិត្ត អ្នកបើករឺម៉កម៉ូតូដែលប្រចាំការនៅខាងក្រៅព្រលានយន្តហោះអន្តរជាតិភ្នំពេញ និយាយថា ប្រសិនបើសេវារថភ្លើងនេះកាន់តែពេញនិយម លោកនឹងបាត់បង់អតិថិជនជាមិនខាន។ លោកបន្តថា៖ «ពេលនេះវាគ្មានអ្វីប៉ះពាល់ទេ ប៉ុន្តែខ្ញុំគិតថាវានឹងប៉ះពាល់នៅថ្ងៃខាងមុខ»។
ទោះបីយ៉ាងនេះក្តីលោកអះអាងថា លោកចូលរួមសប្បាយចិត្តនឹងអ្នកគ្រប់គ្នាចំពោះសេវានេះ។
លោកថ្លែងថា៖«បើអ្នករាល់គ្នាសប្បាយចិត្ត ខ្ញុំគិតថា ខ្លួនខ្ញុំក៏គួរតែសប្បាយចិត្តដែរ មានកន្លែងផ្សេងទៀតដែលខ្ញុំអាចរកលុយបាន»។
អ្នកបើកបរតាក់ស៊ីម្នាក់នៅក្នុងព្រលានយន្តហោះអន្តរជាតិភ្នំពេញ បានប្រាប់អ្នកយកព័ត៌មានភ្នំពេញ ប៉ុស្តិ៍ថា អតិថិជនរបស់លោកនឹងធ្លាក់ចុះនៅពេលសេវារថភ្លើងនេះដំណើរការពេញលេញ។
លោកបានជំរុញឲ្យអ្នកបើកតាក់ស៊ីទាំងអស់ត្រូវពង្រឹងគុណភាពសេវារបស់ខ្លួន។
លោកថ្លែងថា៖ «ខ្ញុំនឹងប្រឈមនឹងការប្រកួតប្រជែងថ្មីមួយ ប៉ុន្តែខ្ញុំសង្ឃឹមថា នឹងមិនមែនជាបញ្ហាធ្ងន់ធ្ងរទេ ខ្ញុំនឹងផ្តោតកាន់តែខ្លាំងលើសេវាល្អទៅកាន់អតិថិជនរបស់ខ្ញុំ»៕
