.jpg)
លោក ត្រាំ និងលោក ម៉ូឌី ក្នុងជំនួប G20 នៅជប៉ុននៅខែមុន។ AFP
ក្រុងញូវដែលីៈ ក្រុមការងារចរចាពាណិជ្ជកម្មរបស់អាមេរិក និងប្រទេស ឥណ្ឌា បានចាប់ផ្ដើមការចរចាកាលពីថ្ងៃសុក្រ ខណៈដែលភាពតានតឹងកើនឡើង ដោយសារតែវិធានការគាំពារនិយមដែលធ្វើឡើងដោយភាគីទាំង ២។
ខណៈដែលឥណ្ឌា និងអាមេរិក មានភាពជិតស្និទ្ធកាន់តែខ្លាំងឡើងក្នុងរយៈពេលប៉ុន្មានឆ្នាំថ្មីៗនេះ។ លោកប្រធានាធិបតីអាមេរិក ដូណាល់ ត្រាំ បានរិះគន់ដោយផ្ទាល់ទៅលើប្រទេសអាស៊ីអាគ្នេយ៍ឈានមុខគេមួយនេះនៅលើ Twitter នៅសប្ដាហ៍នេះ ដោយលើកឡើងថា ពន្ធនាំចូលឥណ្ឌា «លែងទទួលយកបានទៀតហើយ»។
ទីក្រុងវ៉ាស៊ីនតោន បានដកឥណ្ឌាចេញពីបញ្ជីប្រទេសដែលទទួលបានសិទិ្ធរួចពន្ធសម្រាប់ការនាំចេញទំនិញតម្លៃជាង ៦ ពាន់លានដុល្លារ ទៅអាមេរិកកាលពីដើមឆ្នាំនេះ។ វិធានការនេះបានធ្វើឡើងបន្ទាប់ពីអាមេរិកបានចាត់វិធានការដំឡើងពន្ធនាំចូលលើដែកថែប និងអាលុយមីញ៉ូមរបស់ប្រទេស ឥណ្ឌា។
ជាការឆ្លើយតប ទីក្រុងញូវដែលី ដែលមានការខឹងសម្បា បានហូតពន្ធកាន់តែខ្ពស់វិញលើផលិតផលអាមេរិក ២៨ ប្រភេទ ដែលរួមមានផ្លែអាល់ម៉ុង ផែ្លប៉ោម និងផ្លែវ៉ាល់ណាត់ ផងដែរកាលពីខែមុន។
លោក Wilbur Ross រដ្ឋមន្ដ្រីក្រសួងពាណិជ្ជកម្មអាមេរិក កន្លងមកនេះបានរិះគន់គោលនយោបាយពាណិជ្ជកម្មរបស់ប្រទេស ឥណ្ឌា និងវិធានការពន្ធនាំចូល ដោយលើកឡើងថា ពួកគេបានបង្កការរារាំងដ៏ធំមួយក្នុងការទាក់ទាញការវិនិយោគបរទេស។
ខណៈដែលជម្លោះរវាងភាគីទាំង ២ បានឡើងកម្ដៅ លោក ត្រាំ និងលោកនាយករដ្ឋមន្ដ្រីឥណ្ឌា ណារិនដ្រា ម៉ូឌី បានចេញបញ្ជាឲ្យមានការចរចានៅពេលមេដឹកនាំទាំង ២ បានជួបគ្នានៅទីក្រុងអូសាកា ប្រទេស ជប៉ុន នៅក្រៅជំនួបប្រជុំកំពូលនៃកិច្ចប្រជុំរបស់ក្រុមប្រទេសមានសេដ្ឋកិច្ចរីកចម្រើន ទាំង ២០ (G20) ពីខែមិថុនា។
ប្រភពពីក្រសួងពាណិជ្ជកម្មអាមេរិកឲ្យដឹងថា លោក Christopher Wilson ជំនួយការតំណាងពាណិជ្ជកម្មអាមេរិក បានជួបក្រុមមន្ដ្រីពាណិជ្ជកម្មឧស្សាហកម្មរបស់ឥណ្ឌា នៅទីក្រុងដែលី កាលពីថ្ងៃសុក្រ មុនកិច្ចប្រជុំមួយជាមួយលោក Piyush Goyal រដ្ឋមន្ដ្រីក្រសួងពាណិជ្ជកម្មឥណ្ឌា។
ទោះជាយ៉ាងណា លទ្ធផលជំនួបនេះមិនទាន់ត្រូវបានបង្ហើបឲ្យដឹងនៅឡើយទេ។
ពាណិជ្ជកម្មរវាងឥណ្ឌា និងអាមេរិក មានតម្លៃ ១៤២,១ ពាន់លានដុល្លារ នៅឆ្នាំ ២០១៨ ដោយអាមេរិកមានឱនភាព ២៤,២ ពាន់លានដុល្លារ ហើយមានការព្យាករថា ពាណិជ្ជកម្មទ្វេភាគីនឹងកើនដល់ ២៣៨ ពាន់លានដុល្លារ នៅត្រឹមឆ្នាំ ២០២៥៕ AFP/LA
