.jpg)
ភ្ញៀវកំពុងទស្សនាការតាំងបង្ហាញរបស់ក្រុមហ៊ុន Boeing កាលពីពេលថ្មីៗនេះ។ AFP
ក្រុងវ៉ាស៊ីនតោនៈ ក្រុមហ៊ុនផលិតយន្តហោះអាមេរិក Boeing បានឲ្យដឹងកាលពីថ្ងៃពុធថា ខ្លួនគាំទ្រការកែទម្រង់ពន្ធនៅក្នុងរដ្ឋវ៉ាស៊ីនតោនដែលនឹងលុបចោលការលើកលែងពន្ធ ដើម្បីដោះស្រាយជម្លោះរយៈពេលយូរជាមួយសហភាពអឺរ៉ុប (EU)។
រដ្ឋបាលរបស់លោកប្រធានាធិបតី ដូណាល់ ត្រាំ បានហូតពន្ធពិន័យរួចហើយលើផលិតផល EU តម្លៃ ៧,៥ ពាន់លានដុល្លារក្នុងជម្លោះជុំវិញការឧបត្ថម្ភធនរបស់រដ្ឋាភិបាលដល់ក្រុមហ៊ុនផលិតយន្តហោះ Airbus។
កាលពីថ្ងៃសុក្រ លោក ត្រាំ បានបង្កើនពន្ធនាំចូលយន្តហោះដល់ ១៥ ភាគរយ ពី ១០ ភាគរយដែលជាផ្នែកមួយនៃការដាក់ទណ្ឌកម្មទាំងនោះ។
សហភាពអឺរ៉ុបបានគំរាមថា នឹងអនុវត្តប្រឆាំងនឹងអាមេរិកសម្រាប់ការគាំទ្រដែលខ្លួនបានផ្ដល់ដល់ក្រុមហ៊ុន Boeing ដូចគ្នា ប៉ុន្តែក្រុមហ៊ុនអាមេរិកមួយនេះបានឲ្យដឹងថា ការកែទម្រង់ពន្ធរដ្ឋនឹងដោះស្រាយបញ្ហានេះ។
ក្រុមហ៊ុន Boeing បានឲ្យដឹងនៅក្នុងសេចក្ដីប្រកាសព័ត៌មានថា៖ «យើងគាំទ្រយ៉ាងពេញលេញ និងបានគាំទ្រសម្រាប់វិធានការនេះ»។ ក្រុមហ៊ុនបន្តថា៖ «នៅពេលយើងបានអនុម័តច្បាប់នេះ វានឹងក្លាយជាដំណោះស្រាយតែមួយគត់ដែលយើងរកឃើញនៅក្នុងជម្លោះពាណិជ្ជកម្មរយៈពេលវែងរវាងអឺរ៉ុប និងអាមេរិក និងជុំវិញការគាំទ្ររបស់រដ្ឋាភិបាលសម្រាប់ការផលិតយន្តហោះពាណិជ្ជកម្មខ្នាតធំ»។ ក្រុមហ៊ុនបញ្ជាក់ថា៖ «ការផ្លាស់ប្តូរដែលលុបចោលការកាត់បន្ថយពន្ធ ៤០ ភាគរយសម្រាប់ក្រុមហ៊ុនផលិតយន្តហោះនឹងបង្ហាញការប្ដេជ្ញាចិត្តរបស់អាមេរិក ដើម្បីពាណិជ្ជកម្មស្មើភាព និងផ្អែកតាមច្បាប់ និងដើម្បីគោរពតាមសេចក្ដីសម្រេចរបស់អង្គការពាណិជ្ជកម្មពិភពលោក»។
ក្រុមហ៊ុន Boeing ដែលមានរោងចក្រផលិតសំខាន់ៗរបស់ខ្លួននៅភាគពាយព្យរដ្ឋវ៉ាស៊ីនតោនអាមេរិកបានសន្សំប្រហែល ២៣០ លានដុល្លារកាលពីឆ្នាំ ២០១៨ ពីការលើកលែងពន្ធនេះ និងការលើកលែងពន្ធផ្សេងទៀត។
ក្រុមហ៊ុន Boeing បានឲ្យដឹងថា ទន្ទឹមនឹងនេះក្រុមហ៊ុន Airbus បានទទួលអត្ថប្រយោជន៍ពីការដំណើរការជំនួយ និងការឧបត្ថម្ភធនខុសច្បាប់រាប់ពាន់លានដុល្លារដែល WTO បានរកឃើញម្ដងហើយម្ដងទៀតថា រំលោភលើច្បាប់ពាណិជ្ជកម្មពិភពលោក» ហើយបញ្ហានេះនៅតែមិនទាន់ត្រូវបានដោះស្រាយ។
ក្រុមហ៊ុនបន្តថា៖ «នៅពេលនេះជាពេលវេលាសម្រាប់ក្រុមហ៊ុន Airbus និងសហភាពអឺរ៉ុបត្រូវគោរពច្បាប់តាមរយៈការបញ្ចប់ការឧបត្ថម្ភធនជំនួយដែលធ្វើឡើងដោយខុសច្បាប់ នៅពេលនេះ និងជាលើកចុងក្រោយបំផុត និងដោះស្រាយបញ្ហាដែលពួកគេបានបង្កដល់ឧស្សាហកម្មយន្តហោះអាមេរិក និងកម្មកររបស់ខ្លួន»។
សង្គ្រាមផ្លូវច្បាប់រយៈពេលវែងរវាងក្រុមហ៊ុន Airbus និងក្រុមហ៊ុន Boeing នៅ WTO បានចាប់ផ្ដើមកាលពីឆ្នាំ ២០១៤ នៅពេលទីក្រុងវ៉ាស៊ីនតោនបានចោទប្រកាន់ចក្រភពអង់គ្លេស បារាំង អាល្លឺម៉ង់ និងប្រទេសអេស្ប៉ាញពីបទផ្ដល់ការឧបត្ថម្ភធនខុសច្បាប់ និងផ្ដល់ការគាំទ្រដល់ការផលិតផលិតផលជាច្រើនរបស់ក្រុមហ៊ុន Airbus។
១ ឆ្នាំក្រោយមក EU បានចោទប្រកាន់ថា ក្រុមហ៊ុន Boeing បានទទួលការឧបត្ថម្ភធនដែលហាមឃាត់តម្លៃ ១៩,១ ពាន់លានដុល្លារចាប់ពីឆ្នាំ ១៩៨៩ ដល់ឆ្នាំ ២០០៦ ពីសាខាផ្សេងៗរបស់រដ្ឋាភិបាលអាមេរិក។
ករណី ២ នេះបន្ទាប់មកត្រូវបានជាប់ពាក់ព័ន្ធក្នុងផ្លូវច្បាប់ ដោយភាគីនីមួយៗត្រូវផ្ដល់នូវភាពត្រឹមត្រូវមួយផ្នែក បន្ទាប់ពីបណ្ដឹងឧទ្ធរណ៍ និងបណ្ដឹងតបជាបន្តបន្ទាប់៕ LA
