ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) នៅថ្ងៃទី ១៩ កុម្ភៈ បានរៀបចំសិក្ខាសាលាមួយនៅទីក្រុងតូក្យូ ប្រទេសជប៉ុន ដើម្បីទាក់ទាញវិនិយោគិនជប៉ុនមកកម្ពុជាបន្ថែមទៀត។
សិក្ខាសាលាស្តីពីការវិនិយោគនៅកម្ពុជា ដែលសហការជាមួយនឹងមជ្ឈមណ្ឌល អាស៊ាន-ជប៉ុន និងស្ថានទូតកម្ពុជាប្រចាំទីក្រុង តូក្យូ ត្រូវបានធ្វើឡើងក្នុងគោលបំណងទាក់ទាញការវិនិយោគ ពីសំណាក់វិនិយោគិនជប៉ុនមកកម្ពុជាបន្ថែមទៀត ដែលមានការចូលរួមពីសំណាក់វិនិយោគិនជប៉ុន ចំនួនប្រមាណ ២៨០ នាក់។
យោងតាមការប្រកាសនៅលើទំព័រហ្វេសប៊ុក របស់ខ្លួននៅថ្ងៃនេះ ក្រុមប្រឹក្សាអភិវឌ្ឍន៍កម្ពុជាបានបញ្ជាក់ថា CDC តែងតែ រៀបចំសិក្ខាសាលាស្តីពីការវិនិយោគនៅទីក្រុងនានានៃប្រទេសជប៉ុន ដោយឆ្នាំនេះមានការរៀបចំសិក្ខាសាលាបែបនេះនៅទីក្រុងតូក្យូ និងទីក្រុងសេនដាយ។
គិតមកត្រឹមឆ្នាំ ២០១៧ តាមរយៈក្រុមប្រឹក្សាអភិវឌ្ឍន៍កម្ពុជា កម្ពុជាបានទទួលស្វាគមន៍ និងចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់របស់ជប៉ុន ចំនួន ១៣០ គម្រោង ក្នុងទុនវិនិយោគសរុបប្រមាណ ១,៦ពាន់លានដុល្លារអាមេរិក ក្នុងវិស័យមួយចំនួន រួមមាន ធនាគារ ឧស្សាហកម្ម កសិ-ឧស្សាហកម្ម សេវាកម្ម និងហេដ្ឋារចនាសម្ព័ន្ធ។
ក្នុងឆ្នាំ ២០១៧ កន្លងទៅនេះ មានគម្រោងវិនិយោគជប៉ុនចំនួន ៩ ក្នុងទុនវិនិយោគសរុបប្រមាណ ៦៣ លានដុល្លារអាមេរិក ក្នុងនោះ មានគម្រោងវិនិយោគចំនួន ៨ បានបោះទីតាំងក្នុងតំបន់សេដ្ឋកិច្ចពិសេស ដែលមានទុនវិនិយោគប្រមាណ ៥៩ លានដុល្លារអាមេរិក៕