ភ្នំពេញៈ Cambodian Investors Capital Partners Plc (CIC Capital Partners Plc.) បានក្លាយជាក្រុមហ៊ុន «ក្រុមហ៊ុនគ្រប់គ្រងមូលនិធិ» ដំបូងនៅកម្ពុជា បន្ទាប់ពីទទួលអាជ្ញាប័ណ្ណជាផ្លូវការពីគណៈកម្មការមូលបត្រកម្ពុជា (SECC) កាលពីថ្ងៃទី ៧ ខែ មិថុនា ឆ្នាំ ២០១៩ កន្លងមក។
«ក្រុមហ៊ុនគ្រប់គ្រងមូលនិធិ» មានន័យថា ក្រុមហ៊ុនអាចនឹងកៀរគរទុនពីវិនិយោគិនទាំងជាលក្ខណៈបុគ្គល និងស្ថាប័នពីក្នុងស្រុក និងក្រៅស្រុក និងបង្កើតជាទម្រង់យន្តការវិនិយោគ (Investment Platform) មួយដ៏គួរឲ្យទុកចិត្ត ដែលវិនិយោគិនអាចចូលរួមក្នុងសកម្មភាពជាមួយ ដើម្បីទទួលបានប្រយោជន៍ពីការបណ្តាក់ទុនរួមនោះ។
CIC Capital Partners Plc. គឺជាក្រុមហ៊ុនបុត្រសម្ព័ន្ធរបស់ក្រុមហ៊ុន Cambodian Investors Corporation Plc. ដែលជាក្រុមហ៊ុនប្រមូលផ្តុំដោយក្រុមអ្នកវិនិយោគក្នុងស្រុកប្រមាណ ៣០០ នាក់ ដោយត្រូវបានបង្កើតឡើងកាលពីដើមខែ មេសា ឆ្នាំ ២០១៣។
លោក គុយ វ៉ាត ប្រធានក្រុមប្រឹក្សាភិបាលក្រុមហ៊ុន CIC Capital Partners Plc ក្នុងឱកាសពិធីទទួលអាជ្ញាប័ណ្ណពី SECC កាលពីម្សិលមិញបាននិយាយថា ក្រុមហ៊ុននឹងចូលរួមចំណែកក្នុងការជួយដោះស្រាយការលំបាករបស់សហគ្រាសធុនតូច និងមធ្យមនៅកម្ពុជា ពិសេសទាក់ទងទៅនឹងបញ្ហាប្រឈមក្នុងការទទួលបានហិរញ្ញប្បទានពីគ្រឹះស្ថានហិរញ្ញវត្ថុ។
លោកបន្តថា CIC Capital Partners Plc នឹងបង្កើតនូវយន្តការមួយដែលមានគុណភាព ប្រសិទ្ធភាព និងប្រសិទ្ធផលសម្រាប់អ្នកវិនិយោគ ហើយលោកសង្ឃឹមថា នឹងមានវិនិយោគិនជាច្រើនចូលរួមជាមួយ CIC Capital Partners Plc.។
លោកថ្លែងថា៖ «ការផ្តល់អាជ្ញាប័ណ្ណនេះនឹងរួមចំណែកនៅក្នុងការជួយអភិវឌ្ឍវិស័យមូលបត្រកម្ពុជា ក៏ដូចជារួមចំណែកយ៉ាងធំធេងក្នុងការអភិវឌ្ឍសហគ្រាសធុនតូច និងមធ្យមនៅកម្ពុជាផងដែរ»។
លោកបន្តថា CIC Capital Partners នឹងធានាឲ្យមាននូវប្រតិបត្តិការដែលអនុលោមតាមច្បាប់ ដោយនឹងកៀរគរមូលធនពីសាធារណជនឲ្យបានច្រើន ព្រមទាំងប្រើប្រាស់មូលនិធិនេះប្រកបដោយតម្លាភាព ប្រសិទ្ធភាព ប្រសិទ្ធផលជាមួយនឹងការការពារការវិនិយោគិនពីហានិភ័យផ្សេងៗ» លោក ស៊ូ សុជាតិ អគ្គនាយកគណៈកម្មការមូលបត្រកម្ពុជា បាននិយាយថា នេះជាវឌ្ឍនភាពថ្មីមួយទៀតរបស់វិស័យមូលបត្រនៅកម្ពុជា។ នេះជាទីផ្សារថ្មីនៅកម្ពុជា តែសម្រាប់ប្រទេសរីកចម្រើនដូចជាសហរដ្ឋអាមេរិក គេមានទីផ្សារបែបនេះប្រមាណ ១០០ ឆ្នាំមកហើយ។
លោកបន្តថា បើទោះបីជា CIC Capital Partners ទទួលបានអាជ្ញាប័ណ្ណពី SECC តែគ្រប់សកម្មភាពរបស់ CIC Capital Partners ត្រូវតែធ្វើឡើងក្រោមការត្រួតពិនិត្យរបស់ SECC។
លោក ស៊ូ សុជាតិ បញ្ជាក់ថា៖ «ការទទួលបានអាជ្ញាប័ណ្ណពី SECC នេះមិនមែនមានន័យថា ក្រុមហ៊ុនអាចចាប់ផ្តើមប្រកាសគម្រោងវិនិយោគអ្វីមួយ និងធ្វើការប្រមូលមូលនិធិពីសាធារណជនបាននោះទេ»។ លោកបន្តថា៖ «គ្រប់ប្រតិបត្តិការរបស់ក្រុមហ៊ុន [ក្រុមហ៊ុនគ្រប់គ្រងមូលនិធិ] គឺត្រូវតែមានការរាយការណ៍ ត្រួតពិនិត្យ និងយល់ព្រមពីគណៈកម្មការមូលបត្រកម្ពុជា»។
លោកលើកឡើងថា ការធ្វើបែបនេះ គឺដើម្បីការពារផលប្រយោជន៍របស់អ្នកវិនិយោគ និងបញ្ជាក់ថា ឯកសារដែលក្រុមហ៊ុនរៀបចំមកគឺមានភាពច្បាស់លាស់ មានតម្លាភាព និងមានគ្រប់តួអង្គទាំងអស់ចូលរួម។
បច្ចុប្បន្នមានក្រុមហ៊ុនចំនួន ៣ ផ្សេងទៀតដែលកំពុងដាក់ពាក្យសុំអាជ្ញាប័ណ្ណ «ក្រុមហ៊ុនគ្រប់គ្រងមូលនិធិ» នៅគណៈកម្មការមូលបត្រកម្ពុជា ក្នុងនោះ ២ ជាក្រុមហ៊ុនអន្តរជាតិ។ ដើម្បីអាចដាក់ពាក្យសុំអាជ្ញាប័ណ្ណនេះបានក្រុមហ៊ុនត្រូវបំពេញលក្ខខណ្ឌជាច្រើន និងត្រូវបានទុនយ៉ាងតិច ១ លានដុល្លារ។ នេះបើតាមលោក ស៊ូ សុជាតិ៕ LA