ភ្នំពេញៈ Gunung Capital របស់ប្រទេស ម៉ាឡេស៊ី ដែលជាក្រុមហ៊ុនគ្រប់គ្រងការវិនិយោគទៅលើការជួលទ្រព្យសកម្ម និងដឹកជញ្ជូនលើដីគោកកំពុងស្ថិតក្នុងការចរចាដើម្បីទិញយកភាគហ៊ុនប្រហែល ២០ ភាគរយនៅគ្រឹះស្ថានហិរញ្ញវត្ថុមួយនៅក្នុងប្រទេស កម្ពុជា។
យោងតាមប្រព័ន្ធព័ត៌មានរបស់ប្រទេស ម៉ាឡេស៊ី Bernama ដែលរាយការណ៍កាលពីថ្ងៃពុធបានឲ្យដឹងថា ថ្នាក់គ្រប់គ្រងរបស់ក្រុមហ៊ុនត្រូវបានអញ្ជើញចូលរួមក្នុងការពិភាក្សាលើសំណើវិនិយោគលើធនាគារពាណិជ្ជមួយដែលមានគុណវុឌ្ឍិនៅកម្ពុជា។
ក្រុមហ៊ុន Gunung Capital កំពុងស្ថិតក្នុងការចរចាដើម្បីទិញភាគហ៊ុនជាង ២០ ភាគរយ នៅក្នុងធនាគារពាណិជ្ជមួយនៅកម្ពុជាដូចដែលបានរាយការណ៍ដោយអត្ថបទព័ត៌មាន ហើយក្រុមហ៊ុននេះក៏បានឲ្យដឹងថា ថ្នាក់គ្រប់គ្រងរបស់ខ្លួនកំពុងស្ថិតក្នុងការពិភាក្សាក្នុងការចូលរួមភាគហ៊ុនជាមួយនឹងគ្រឹះស្ថានហិរញ្ញវត្ថុមួយ។
ក្រុមហ៊ុនបន្តថា ភាគីទាំង ២ កំពុងស្ថិតក្នុងការពិភាក្សាពីលក្ខខណ្ឌតម្រូវគុណភាព និងបរិមាណផ្សេងទៀតដូចជាការគ្រប់គ្រងដែលបានដាក់ដោយអាជ្ញាធរពាក់ព័ន្ធនៅកម្ពុជា។
Bernama ត្រូវបានដកស្រង់សម្តីនៅក្នុងឯកសារនៅផ្សារហ៊ុន Bursa Malaysia ថា៖ «ក្នុងដំណាក់កាលនៃការវាយតម្លៃ និងពិភាក្សានេះ ក្រុមហ៊ុនមិនអាចបញ្ជាក់ពីចំនួនជាក់លាក់នៃតម្លៃទុនវិនិយោគដែលចូលរួមនេះបានឡើយ»។
កាសែតបន្តថា៖ «នៅពេលបញ្ចប់ការវាយតម្លៃលើសំណើនេះ លទ្ធផលដែលរំពឹងទុកពីការវិនិយោគនោះរួមមានការផ្តល់អត្ថប្រយោជន៍យ៉ាងខ្លាំងដល់ក្រុមហ៊ុន។ បន្ទាប់មកថ្នាក់គ្រប់គ្រងនឹងស្វែងរកការចូលរួមភាគហ៊ុនយ៉ាងហោច ២០ ភាគរយ ដើម្បីទទួលបានឱកាសវិនិយោគច្រើនបំផុត»។
ក្រុមហ៊ុន Gunung មិនបានឆ្លើយតបអ៊ីមែលរបស់កាសែតភ្នំពេញប៉ុស្ដិ៍ទេកាលពីថ្ងៃព្រហស្បតិ៍ ខណៈដែលលោកស្រី ជា សិរី អគ្គនាយិកាធនាគារជាតិនៃកម្ពុជា (NBC) ក៏មិនអាចទាក់ទងសុំការអត្ថាធិប្បាយបានដែរ។
កាសែត Bernama បានរាយការណ៍ទៀតថា ក្រុមហ៊ុននេះក៏កំពុងស្វែងរកសក្ដានុពលនៅក្នុងវិស័យធនាគារតាមរយៈការចុះបញ្ជីលើក្រុមហ៊ុនផ្សារមូលបត្រកម្ពុជាផងដែរ។
កាសែតនេះបន្តថា៖ «ជម្រើសនេះច្បាស់ណាស់ជាយុទ្ធសាស្ដ្ររយៈពេលវែង។ ទោះយ៉ាងណាការវាយតម្លៃដែលមិនទាន់បញ្ចប់នៃសំណើនេះនឹងតម្រូវឲ្យមានការយល់ព្រមជាចាំបាច់ពីអាជ្ញាធរពាក់ព័ន្ធនៅកម្ពុជា»។
គិតត្រឹមឆ្នាំ ២០១៩ កម្ពុជាមានធនាគារពាណិជ្ជ ៤៦ ធនាគារឯកទេស ១៥ និងគ្រឹះស្ថានមីក្រូហិរញ្ញវត្ថុ ៨២ ប្រតិបត្តិករឥណទានជនបទ ២៤៨ ក្រុមហ៊ុនភតិសន្យា ១៥ និងក្រុមហ៊ុនផ្ដល់សេវាទូទាត់ ២០។
កម្ចីនៅធនាគារបានកើនឡើង ២៤,៥ ពាន់លានដុល្លារកាលពីឆ្នាំមុន ខណៈប្រាក់បញ្ញើមានប្រហែល ២៥,៥ ពាន់លានដុល្លារ។ ចំណែកប្រាក់កម្ចីនៅគ្រឹះស្ថានមីក្រូហិរញ្ញវត្ថុមាន ៧,២ ពាន់លានដុល្លារ និងប្រាក់បញ្ញើមាន ៣,៩ ពាន់លានដុល្លារ។ នេះបើតាម NBC៕LA