ភ្នំពេញៈ ទីភ្នាក់ងារអភិវឌ្ឍន៍ជប៉ុន (JICA) កាលពីថ្ងៃចន្ទបានចុះកិច្ចព្រមព្រៀងមួយជាមួយក្រសួងឧស្សាហកម្ម និងសិប្បកម្មក្នុងការផ្ដល់ជំនួយពង្រឹងសមត្ថភាពរដ្ឋបាលដល់មន្ដ្រីក្រសួងក្នុងគម្រោងអភិវឌ្ឍន៍ការផ្គត់ផ្គត់ទឹកនៅកម្ពុជា។
កិច្ចព្រមព្រៀងនេះត្រូវបានចុះហត្ថលេខាកាលពីថ្ងៃម្សិលមិញរវាងលោក ឯក សុនចាន់ រដ្ឋលេខាធិការ ក្រសួងឧស្សាហកម្ម និងសិប្បកម្ម និងលោក Yuichi Sugano តំណាងប្រធានរបស់ JICA Cambodia។
លោក ប្រាក់ ប្រាកដ អគ្គនាយកនៃអគ្គនាយកដ្ឋានផ្គត់ផ្គង់ទឹកស្អាតនៃក្រសួងឧស្សាហកម្ម និងសិប្បកម្ម (GDPWS) បានថ្លែងកាលពីម្សិលមិញថា កិច្ចសហប្រតិបត្តិការផ្នែកបច្ចេកទេសរវាង JICA និងក្រសួងនឹងពង្រឹងសមត្ថភាពដល់មន្ដ្រីនៅក្នុងនាយកដ្ឋានរបស់លោក ដើម្បីអភិវឌ្ឍច្បាប់ផ្គត់ផ្គង់ទឹក និងបទប្បញ្ញត្តិជាប់ទាក់ទងការលើកកម្ពស់សមត្ថភាពរបស់មន្ដ្រី និងបង្កើតប្រព័ន្ធការអភិវឌ្ឍធនធានមនុស្សនៅ GDPWS។
លោកថ្លែងថា៖ «ក្រុមអ្នកជំនាញជប៉ុននឹងជួយក្នុងការកែលម្អសមត្ថភាពមន្ដ្រីរបស់យើងខាងជំនាញបច្ចេកទេសជាច្រើនដែលធ្វើការងារសម្រាប់ការអភិវឌ្ឍទឹកស្អាតដូចជាជំនាញរដ្ឋបាល គណនេយ្យការគ្រប់គ្រងប្រព័ន្ធវិក្កយបត្រ និងជំនាញបច្ចេកទេសជាច្រើនផ្សេងទៀត»។
លោកបានបន្ថែមទៀតថាគម្រោងនេះត្រូវបានរំពឹងថានឹងចាប់ផ្ដើមជាផ្លូវការចាប់ពីពាក់កណ្ដាលឆ្នាំនេះហើយនឹងបន្តសម្រាប់រយៈពេល ៤ ឆ្នាំខាងមុខទៀត។
កាលពីថ្ងៃសៅរ៍ទី ៨ ខែមេសាក្រសួងឧស្សាហកម្មបានចាប់ផ្ដើមសាងសង់រោងចក្រទឹកស្អាតនៅក្នុងខេត្តកំពតដោយមានសមត្ថភាពផលិតទឹកស្អាតបាន ២ ០០០ ម៉ែត្រគុបក្នុងមួយថ្ងៃ ដើម្បីផ្ដល់ទឹកស្អាតដល់គ្រួសារប្រហែល ១០ ០០០ ដែលរស់នៅក្នុងឃុំចំនួន ៥ នៅខេត្តកំពត និងឃុំមួយនៅក្នុងខេត្តតាកែវ។
វាជាគម្រោងដែលត្រូវបានវិនិយោគដោយសហគ្រាសរដ្ឋ រដ្ឋាករទឹកស្វយ័តក្រុងភ្នំពេញជាមួយទុនវិនិយោគ ២ លានដុល្លារ ហើយរំពឹងថានឹងបញ្ចប់ដើម្បីដាក់ឲ្យប្រតិបត្តិការក្នុងរយៈពេល ២ ឆ្នាំ៕ LA