ភ្នំពេញៈ Pestech Cambodia Ltd (PCL) ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនមានមូលដ្ឋាននៅប្រទេសម៉ាឡេស៊ី Pestech International Bhd គ្រោងនឹងចុះបញ្ជីនៅផ្សារមូលបត្រកម្ពុជា (CSX) ក្នុងពេលឆាប់ៗនេះ។
លោក Paul Lim Pay Chuan អគ្គនាយក និងជានាយកប្រតិបត្តិក្រុមហ៊ុន Pestech ត្រូវបានដកស្រង់សម្តីដោយ The Edge Weekly ដែលជាកាសែតរបស់ម៉ាឡេស៊ីកាលពីថ្ងៃអង្គារថា ក្រុមហ៊ុនបានកំណត់ក្រុមវិនិយោគិនសំខាន់ៗរបស់ខ្លួន និងការបោះផ្សាយលក់មូលបត្រកម្មសិទ្ធិជាលើកដំបូង (IPO) ដែលបានស្នើឡើងតាំងពីខែកុម្ភៈ ឆ្នាំ ២០១៦ ថាគួរតែសម្រេចបានត្រឹមពាក់កណ្ដាលឆ្នាំ ២០២០ នេះ។
លោកថ្លែងថា៖ «យើងត្រូវការពេលវេលាត្រឹមត្រូវ ដោយសារយើងកំពុងព្យាយាមទទួលក្រុមហ៊ុនឧស្សាហកម្មជាច្រើនដែលអាចផ្តល់តម្លៃបន្ថែមដល់ប្រតិបត្តិការអាជីវកម្មរបស់យើងនៅប្រទេសកម្ពុជានឹងដើម្បីកា្លយជាក្រុមវិនិយោគិនជាជាងគ្រាន់តែជាវិនិយោគិនផ្នែកហិរញ្ញវត្ថុធម្មតា»។
លោកបានបន្ថែមថា បច្ចុប្បន្នឯកសារកំពុងត្រូវបានបញ្ចប់ ហើយ IPO កំពុងរង់ចាំការអនុម័តសា្ថពរ។ គោលបំណងដ៏សំខាន់របស់ IPO មិនមែនគ្រាន់តែប្រមូលមូលនិធិនោះទេ ប៉ុន្តែថែមទាំងបង្កើនមុខមាត់របស់ក្រុមហ៊ុន Pestech (Cambodia) ផងដែរ។
លោកថ្លែងថា៖ «យើងជឿថា ក្រុមវិនិយោគិនសំខាន់ៗទាំងនេះអាចជួយយើងឲ្យរីកចម្រើននៅក្នុងប្រទេសកម្ពុជា និងតំបន់ឥណ្ឌូចិន។ យើងសង្ឃឹមថា រក្សាភាគហ៊ុន ៨០ ភាគរយនៅក្នុងក្រុមហ៊ុន Pestech នៅពេលបញ្ចប់ការចុះបញ្ជីនេះ»។
មន្ត្រីរបស់ក្រុមហ៊ុនផ្សារមូលបត្រកម្ពុជា (CSX) កាលពីថ្ងៃព្រហស្បតិ៍បានបញ្ជាក់ថា ក្រុមហ៊ុននេះនឹងចុះបញ្ជីលើផ្សារហ៊ុនក្នុងពេលឆាប់ៗ។
នៅពេលចុះបញ្ជីក្រុមហ៊ុន Pestech ត្រូវបានរំពឹងថា នឹងមានតម្លៃប្រហែល ៦០ លានដុល្លារ។ ក្រុមហ៊ុនគ្រោងនឹងប្រមូលទុនថ្មីមានចំនួនមិនលើសពី ១០ លានដុល្លារ។ នេះបើតាមកាសែត The Edge៕LA