ភ្នំពេញៈ តំបន់​សេដ្ឋកិច្ច​ពិសេស​ភ្នំពេញ (PPSEZ) ជា​សួន​ឧស្សាហ​កម្ម​ធំ​ជាង​គេ​នៅ​កម្ពុជា ដែល​ប្រជុំ​ដោយ​រោងចក្រ​ធំៗ​លំដាប់​អន្តរជាតិ​គ្រោង​ចុះ​បញ្ជី​ក្នុង​ផ្សារ​ហ៊ុន​កម្ពុជា​នៅ​ដើម​ឆ្នាំ​ក្រោយ​ដើម្បី​កៀរគរ​ដើម​ទុន​សម្រាប់​អភិវឌ្ឍ​តំបន់​សេដ្ឋកិច្ច​មួយ​ទៀត​នៅ​ក្រុង​ប៉ោយប៉ែត។ យោង​តាម​សេចក្តី​ប្រកាស​ព័ត៌មាន​របស់ PPSEZ ដែល​បាន​បង្ហោះ​ភ្ជាប់​នៅ​លើ​គេហទំព័រ​របស់​ក្រុម​ហ៊ុន​បាន​ឲ្យ​ដឹង​ថា ក្រុម​ហ៊ុន​ត្រៀម​ដើម្បី​អាច​ចូល​ផ្សារ​ហ៊ុន​កម្ពុជា​ឲ្យ​បាន​អំឡុង ខែ​មីនា ឬ មេសា ឆ្នាំ​២០១៥ ដើម្បី​ប្រមូល ទុន ១៥ លាន​ដុល្លារ​សម្រាប់​សាង​សង់​តំបន់​ឧស្សាហ​កម្ម​មួយ​មាន​ទំហំ ៥០ ម៉ឺន​ម៉ែត្រ​ការ៉េ ដែល​គ្រោង​នឹង​ដំណើរការ​នៅ ឆ្នាំ​២០១៥។