.jpg)
សកម្មភាពកម្មករកំពុងលើកដាក់ស៊ីម៉ងត៍ បន្ទាប់ពីបានដឹកមកដល់ភ្នំពេញនាពេលកន្លងមក។ ហេង ជីវ័ន
ភ្នំពេញៈ ក្រុមហ៊ុន Siam Cement Group (SCG) ដែលជាក្រុមហ៊ុនពហុផលិតផលឈានមុខគេរបស់ប្រទេសថៃបានរាយការណ៍ពីប្រាក់ចំណូលពីការលក់ដ៏រឹងមាំនៅទីផ្សារកម្ពុជានៅត្រីមាសទី ៣ ឆ្នាំនេះដោយសារតែលទ្ធផលសេដ្ឋកិច្ចរឹងមាំ។
លទ្ធផលហិរញ្ញវត្ថុរបស់ក្រុមហ៊ុនដែលចេញផ្សាយកាលពីសប្ដាហ៍មុនបានបង្ហាញថា នៅក្នុងទីផ្សារកម្ពុជាប្រាក់ចំណូលបានពីការលក់ប្រចាំត្រីមាសទី ៣ ឆ្នាំ ២០១៩ របស់ក្រុមហ៊ុន SCG មានចំនួន ១១១ លានដុល្លារអាមេរិក កើនឡើង ១៤ ភាគរយ ដែលចំណូលនេះភាគច្រើនបានមកពីអាជីវកម្មសម្ភារសំណង់ និងស៊ីម៉ងត៍។ របាយការណ៍នេះបានបង្ហាញថានៅក្នុងរយៈពេល ៩ ខែដំបូងក្នុងឆ្នាំ ២០១៩ ក្រុមហ៊ុន SCG បានកត់ត្រាប្រាក់ចំណូលបានពីការលក់នៅកម្ពុជាចំនួន ៣៣៧ លានដុល្លារអាមេរិក។
លោក Roongrote Rangsiyopash ប្រធាន និងជាអគ្គនាយកក្រុមហ៊ុន SCG បានថ្លែងថា៖ «សេដ្ឋកិច្ចកម្ពុជានៅតែទទួលបានកំណើនដ៏រឹងមាំក្នុងអំឡុងត្រីមាសទី ៣ ឆ្នាំនេះ។ លំហូរចូលការវិនិយោគផ្ទាល់ពីបរទេស ជាពិសេសមកពីប្រទេសចិនកំពុងជំរុញនៅក្នុងឧស្សាហកម្មសំណង់ទាំងមូល»។ លោកបន្ថែមថា៖ «នៅតែមានតម្រូវការស៊ីម៉ងត៍ និងសម្ភារសំណង់រឹងមាំនៅទីក្រុងភ្នំពេញ និងទីក្រុងកំពុងស្ទុះងើបខ្លាំងថ្មីៗមួយចំនួនដូចជាក្រុងព្រះសីហនុ ក្រុងប៉ោយប៉ែត និងក្រុងបាវិត»។
លោក ហ៊ឹម សីហា នាយកផ្នែកស្រាវជ្រាវប្រចាំក្រុមហ៊ុន VTrust Appraisal បានឲ្យដឹងថា កំណើនវិស័យសំណង់បង្កើតឲ្យមានតម្រូវការជាច្រើននូវសម្ភារសំណង់ក្នុងរយៈពេលប៉ុន្មានឆ្នាំថ្មីៗនេះ។
លោកបានមានប្រសាសន៍ថា៖ «យើងមើលឃើញថា វិស័យសំណង់របស់យើងកំពុងរីកដូចផ្សិតគ្រប់ទីកន្លែងនៅពេលនេះ ជាពិសេសនៅក្រុងភ្នំពេញ ដែលមានខុនដូជាច្រើន ផ្ទះល្វែង និងលំនៅឋានដែលជំរុញតម្រូវការជាច្រើនក្នុងទីផ្សារសម្ភារសំណង់»។
របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ដែលចេញផ្សាយនៅពេលថ្មីៗនេះ បង្ហាញថាការវិនិយោគទៅលើសំណង់បានកើនឡើងយ៉ាងខ្លាំងចំនួន ៣៤,៧ ភាគរយ នៅរយៈពេល ៩ ខែដំបូងក្នុងឆ្នាំនេះ កើនឡើងដល់ ៦,៥ ពាន់លានដុល្លារ លើគម្រោងចំនួន ២ ៥៤១ ធៀបនឹង ៤,៨ ពាន់លានដុល្លារក្នុងរយៈពេលដូចគ្នាកាលពីឆ្នាំមុន។
របាយការណ៍ដដែលនេះបានកត់សម្គាល់ថាចាប់ពីឆ្នាំ ២០០០ រហូតដល់ចុងខែកញ្ញាឆ្នាំនេះក្រសួងបានអនុម័តគម្រោងសំណង់ចំនួន ៤៦ ៩៩១ គម្រោង ដែលមានទុនវិនិយោគសរុបចំនួនជាង ៤៨ ពាន់លានដុល្លារ ដែលគ្របដណ្ដប់លើផ្ទៃដី ១២៦ លានម៉ែត្រការ៉េ៕ LA
