ភ្នំពេញៈ គណៈកម្មការមូលបត្រកម្ពុជា (SECC) បានឲ្យដឹងថា នឹងមានសហគ្រាសធុនតូច និងមធ្យម (SMEs) ចំនួន ២ មកពីវិស័យសំណង់ និងភតិសន្យាគ្រោងនឹងធ្វើការបោះផ្សាយមូលបត្រកម្មសិទ្ធិលើផ្សារកំណើននៅផ្សារមូលបត្រកម្ពុជា (CSX) នាចុងឆ្នាំ ២០២០ នេះ។
លោក សុខ ដារ៉ា អគ្គនាយករង SECC បានប្រាប់ភ្នំពេញប៉ុស្តិ៍កាលពីចុងសប្តាហ៍មុនថា SECC ចាប់ផ្តើមអនុវត្តគម្រោងឧត្តមភាព (Excellent Program) លើកទី ១ ក្នុងឆ្នាំ ២០១៨ ក្នុងការជួយលើកស្ទួយសមត្ថភាព SMEs ដើម្បីឲ្យពួកគេអាចមានការត្រៀមខ្លួនរួចរាល់មានគុណវុឌ្ឍិសមស្របមានសមត្ថភាពប្រកួតប្រជែងមានផែនការអាជីវកម្មច្បាស់លាស់ ព្រមទាំងមានការរៀបចំរបាយការណ៍ហិរញ្ញវត្ថុដែលមានគុណវុឌ្ឍិអនុលោមតាមក្រុមហ៊ុនបោះផ្សាយមូលបត្រលក់ភាគហ៊ុន។ លោកបន្តថា តាមរយៈនេះពួកគាត់អាចទទួលបានការផ្តល់ប្រឹក្សាពីអ្នកជំនាញដោយពុំគិតថ្លៃផងដែរ។
លោកបន្តថា កម្មវិធី EP ក្នុង ១ ដងមានរយៈពេល ៤ ខែ និងចែកជា ៣ ដំណាក់កាល។ កាលពី EP1 មានក្រុមហ៊ុន ៧៣ បានដាក់ពាក្យក្នុងដំណាក់កាល ទី ១ និងទី ២ SECC បានចុះទៅដល់ក្រុមហ៊ុនចំនួន ៣៨ ហើយក្នុងដំណាក់កាលទី ៣ មានក្រុមហ៊ុនតែ ១៨ ប៉ុណ្ណោះដែលត្រូវបានជ្រើសរើស។
លោកបន្ថែមថាក្នុងចំណោម ១៨ គឺក្រុមហ៊ុន ១០ ទទួលបានរង្វាន់ពី SECC។ ដោយក្នុងចំណោម ១០ ក្រុមហ៊ុននោះមាន ៨ បានដាក់ពាក្យសម្តែងឆន្ទៈក្នុងការបោះផ្សាយលក់មូលបត្រ។
លោក ដារ៉ា បានបន្តថា៖ «មកដល់ពេលនេះមានក្រុមហ៊ុន ៣ ដែលគាត់បានបន្តនីតិវិធីជាប់លាប់ ហើយក្នុងបីនោះគឺមាន ២ ក្រុមហ៊ុនស្ថិតក្នុងនីតិវិធីឆ្ពោះទៅ IPO ធ្វើការបោះផ្សាយលក់មូលបត្រសាធារណៈ។
យើងរំពឹងថា ក្រុមហ៊ុន ២ នេះអាចនឹងបញ្ចប់នីតិវិធីរបស់គាត់នៅចុងឆ្នាំនេះ។ ដោយពួកគេគ្រោងបោះនៅផ្សារកំណើន (Growth Board) ដែលមកពីវិស័យសំណង់ និងភតិសន្យា ប៉ុន្តែយើងនឹងពិនិត្យមើលជាក់ស្តែង ហើយបើតាមការរំពឹងទុករបស់គាត់ គឺចុងឆ្នាំ ២០២០ នេះ»។
យោងតាមគោលនយោបាយអភិវឌ្ឍន៍ឧស្សាហកម្មកម្ពុជាឆ្នាំ ២០១៥-២០២៥ រដ្ឋាភិបាលកម្ពុជាបានកំណត់ទិសដៅពី ៨០-៩៥ ភាគរយនៃ SME នឹងត្រូវចុះបញ្ជីជាផ្លូវការ ហើយក្នុងចំណោមនោះពី ៥០ ទៅ ៧០ ភាគរយមានគណនី និងតារាងតុល្យការច្បាស់លាស់។
លោក Jong Weon Ha អនុប្រធាន CSX ធ្លាប់ប្រាប់ភ្នំពេញប៉ុស្តិ៍ថា មាន SMEs មួយចំនួនកំពុងរៀបចំខ្លួនដើម្បីចុះបញ្ជីលើផ្សារកំណើនក្នុងឆ្នាំនេះ។
លោកថ្លែងថា៖ «ផ្សារកំណើនត្រូវបានបង្កើតឡើងដើម្បីទាក់ទាញឲ្យមានក្រុមហ៊ុនច្រើនជាពិសេសពីសហគ្រាសធុនតូច និងមធ្យម ដើម្បីធ្វើការបោះផ្សាយ និងកៀរគរទុនពង្រីកអាជីវកម្មរបស់ខ្លួន»។
យោងតាមលោក ដារ៉ា SECC គ្រោងធ្វើ EP2 នៅដើមឆ្នាំ ២០២០ នេះ ប៉ុន្តែដោយសារជំងឺកូវីដក៏បានពន្យារពេល។
កាលពីដើមខែមករា ឆ្នាំមុនលោកនាយករដ្ឋមន្ដ្រី ហ៊ុន សែន បានចេញអនុក្រឹត្យមួយដែលផ្ដល់ការលើកទឹកចិត្តពន្ធច្រើនដល់ក្រុមហ៊ុនមានបំណងចុះបញ្ជីនៅផ្សារហ៊ុនដោយមានការកាត់បន្ថយពន្ធលើប្រាក់ចំណូល ៥០ ភាគរយ និងការលុបចោលបំណុលពន្ធទាំងអស់ បើក្រុមហ៊ុនទាំងនោះចុះបញ្ជីនៅផ្សារហ៊ុន។ ការលើកទឹកចិត្តនេះនឹងផ្តល់ជូនរយៈពេល ៣ ឆ្នាំគិតចាប់ពីពេលដែលអនុក្រឹត្យនេះចេញផ្សាយ៕ LA