.jpg)
អ្នកបើកម៉ូតូកង់៣ របស់ TADA Delivery កំពុងដឹកជញ្ជូនទំនិញជូនអតិថិជន។ រូបថត សហការី
ភ្នំពេញៈ ក្រុមហ៊ុន TADA ដែលផ្តល់សេវាកម្មដឹកអ្នកដំណើរដោយប្រើកម្មវិធីតាមទូរស័ព្ទដៃបានហក់ចូលក្នុងវិស័យសេវាដឹកជញ្ជូនដើម្បីបម្រើដល់ក្រុមហ៊ុន និងម្ចាស់អាជីវកម្មដែលមានទីតាំងនៅក្នុងរាជធានីភ្នំពេញ។
ក្រុមហ៊ុនបានឲ្យដឹងកាលពីថ្ងៃពុធនៅខណៈដែលប្រទេសកម្ពុជាកំពុងខិតខំទប់ស្កាត់ការរាតត្បាតនៃវីរុសកូវីដ ១៩ អាជីវកម្មលក់ដូរទាំងឡាយក៏ប្រែជាស្ងាត់ជ្រងំ ដោយហេតុថាអតិថិជនជាទូទៅកំពុងអនុវត្តវិធានការរក្សាគម្លាតពីសង្គម។
«ក្នុងនោះផងដែរ អាជីវកម្មតូចៗដែលត្រូវបានអនុញ្ញាតឱ្យបន្តដំណើរការអាជីវកម្មជាធម្មតានោះក៏កំពុងប្រឈមនឹងការលំបាកច្រើនណាស់ដែរ ក្នុងការរក្សាទំនាក់ទំនង និងផ្គត់ផ្គង់សេវាកម្មរបស់ខ្លួនជូនដល់អតិថិជនជាហេតុនាំឱ្យអាជីវកម្មរបស់ពួកគាត់ត្រូវធ្លាក់ចុះទាំងមិនមានតម្រុយថាតើពេលណាទើបស្ថានការណ៍ត្រឡប់មកប្រសើរដូចដើមវិញ។
ក្រុមហ៊ុន TADA កំពុងផ្ដល់ដំណោះស្រាយមួយជូនដល់អាជីវករចំពោះបញ្ហានេះ ដោយក្រុមហ៊ុនបានបើកឱ្យដំណើរការនូវសេវាដឹកជញ្ជូន TADA Delivery សម្រាប់ជួយឱ្យអាជីវករអាចបន្តផ្គត់ផ្គង់សេវាកម្មជូនដល់អតិថិជនរបស់ខ្លួនបាននៅគ្រប់ទិសទីក្នុងរាជធានីភ្នំពេញ»។ នេះបើយោងតាមការថ្លែងអះអាងរបស់ក្រុមហ៊ុន។
ជាផ្នែកមួយនៃការបើកដំណើរការសេវានេះក្រុមហ៊ុន TADA នឹងបើកបម្រើសេវាកម្មនេះជូនដល់អាជីវករប្រើប្រាស់ដោយឥតគិតថ្លៃរយៈពេល ១ ខែពេញ។
លោក ជីម ប៉ូលី ប្រធានចាត់ការទូទៅក្រុមហ៊ុន TADA CAMBODIA បានមានប្រសាសន៍ថា៖ «ហេតុផលដែលយើងបើកនូវសេវាកម្មដឹកជញ្ជូននេះគឺយើងចង់ធ្វើការគាំទ្រមិនត្រឹមតែ អ្នកបើកបរប៉ុណ្ណោះទេ គឺយើងចង់គាំទ្ររហូតទៅដល់អាជីវករ និងអាជីវកម្មក្នុងស្រុករបស់យើង ដែលកំពុងជួបការលំបាក នៅក្នុងពេលកូវីដ ១៩ ព្រោះអាជីវករភាគច្រើនមិនមានលទ្ធភាពក្នុងការជួលសេវាដឹកជញ្ជូនដោយផ្ទាល់ខ្លួននោះទេ។ យើងផ្ដល់ឱ្យគាត់ក្នុងរយៈពេល ១ ខែ ក្នុងការដឹកជញ្ជូនឱ្យគាត់ដោយឥតគិតថ្លៃក្នុងទីក្រុងភ្នំពេញ អ៊ីចឹងសង្ឈឹមថា ការផ្ដល់ជូនដោយឥតគិតថ្លៃនេះអាចជួយអាជីវកម្ម និងការទំនាក់ទំនងឡើងវិញជាមួយអតិថិជនរបស់គាត់»។
សេវា TADA Delivery ដំណើរការដោយប្រព័ន្ធគ្រប់គ្រងការដឹកជញ្ជូនតាមអនឡាញដ៏ទំនើបមិនធ្លាប់មាននៅកម្ពុជាព្រមទាំងអាចជួយឱ្យអាជីវករកក់ និងពិនិត្យមើលលំហូរនៃការដឹកជញ្ជូនទំនិញរបស់ពួកគាត់បានយ៉ាងងាយស្រួល។
ប្រព័ន្ធនេះក៏ជួយឱ្យអាជីវករអាចគ្រប់គ្រងការបង់ប្រាក់ថ្លៃទំនិញរបស់ខ្លួនបានផងដែរ ទាំងការទូទាត់ជាក្រដាសប្រាក់ និងទូទាត់តាមគណនីដោយថវិកានោះនឹងត្រូវទទួលជំនួសដោយអ្នកបើករ៉ឺម៉កកង់៣។
ក្រុមហ៊ុន TADA បានឱ្យដឹងថា ពីដំបូងឡើយក្រុមហ៊ុនគ្រោងនឹងដាក់ឱ្យដំណើរការនូវសេវាដឹកជញ្ជូននេះនៅ ២-៣ ខែខាងមុខឯណោះទេ។ ប៉ុន្តែដោយហេតុថា វីរុសកូវីដ១៩ បានរាតត្បាតពាសពេញពិភពលោក ក្រុមហ៊ុនក៏សម្រេចចិត្តពន្លឿនពេលបើកដំណើរការសេវានេះមុនផែនការវិញ ដើម្បីឆ្លើយតបទៅតាមសេចក្ដីត្រូវការដ៏ចាំបាច់របស់អាជីវករនៅក្នុងទីក្រុងភ្នំពេញ។
លោក ប៉ូលី បានបន្ថែមថា៖ «[នេះ] គឺជាផ្នែកមួយសំខាន់ក្នុងការចូលរួមចំណែកក្នុងការសម្រេចនូវចក្ខុវិស័យរបស់យើង ថាយើងមិនត្រឹមតែអាចជួយដៃគូបើកបររបស់យើងតែប៉ុណ្ណោះទេ យើងចង់ជួយដល់អាជីវកម្ម អាជីវករ ឬក៏ដៃគូរកស៊ីជាមួយយើងទាំងអស់គ្នា ជាពិសេសហ្នឹងគឺចង់បន្ថែមទៅលើកិច្ចខំប្រឹងប្រែងរបស់រដ្ឋាភិបាល ដើម្បីធ្វើម៉េច ស្ដារលទ្ធភាពសេដ្ឋកិច្ចយើងឱ្យដូចដើមវិញ។ មិនតែប៉ុណ្ណោះសេវាកម្មរបស់យើងនៅមានច្រើនទៀត ដែលយើងនឹងធ្វើការប្រកាសក្នុងពេលឆាប់ៗនេះ ហើយទាំងអស់ហ្នឹងគឺជាផ្នែកមួយដែលយើងព្យាយាមធ្វើដើម្បីរួមចំណែកក្នុងការសម្រេចបាននូវចក្ខុវិស័យរយៈពេលវែងរបស់យើង»៕
