.jpg)
សមាជិកនៃក្រុម Proud Boys ចូលរួមជាមួយអ្នកគាំទ្ររបស់លោក ដូណាល់ ត្រាំ ធ្វើបាតុកម្មនៅរដ្ឋធានីវ៉ាស៊ីនតោន។ AFP
ប្រទេសកាណាដា បានចាត់ទុកក្រុមស្តាំនិយម Proud Boys ថា «បង្កឱ្យមានការគំរាមកំហែងកាន់តែខ្លាំងឡើង» ហើយបានចាត់ទុកក្រុមនេះថា ជាអង្គការភេរវករដែលប្រហាក់ប្រហែលនឹងក្រុម Isis និង al-Qaida ខណៈមានការកើនឡើងនូវក្រុមរើសអើងពណ៌សម្បុរក្នុងប្រទេសកើនឡើងច្រើនគួរឱ្យព្រួយបារម្ភ។
កាលពីថ្ងៃពុធ លោក Bill Blair រដ្ឋមន្ត្រីក្រសួងសុវត្ថិភាពសាធារណៈបានប្រកាសថា រដ្ឋាភិបាលសហព័ន្ធនឹងចាត់តាំងក្រុមជាតិនិយមស្បែកស និងក្រុម neo-Nazi ដែលជាផ្នែកនៃបណ្ដាញ Atomwaffen Division និងក្រុមមូលដ្ឋាន និងចលនាអធិរាជរុស្ស៊ីថា ជាអង្គភាពភេរវករ។ រដ្ឋាភិបាលសហព័ន្ធក៏បានបន្ថែមក្រុម al-Qaida, Isis និង Hizbul Mujahedin ចូលទៅក្នុងបញ្ជីខ្លួនដូចគ្នា។
លោក Blair បានមានប្រសាសន៍ថា៖ «កាណាដានឹងមិនអត់ឱនចំពោះមនោគមន៍វិជ្ជាសាសនា ឬនយោបាយណា ដែលបង្កឱ្យមានអំពើហិង្សាកើតឡើងទេ»។
រដ្ឋមន្ត្រីរូបនេះ ក៏បានពណ៌នាក្រុម Proud Boys នេះថា «រួមចំណែកសំខាន់» ក្នុងការបង្កអំពើហិង្សានយោបាយនៅវិមានកាពីតូលអាមេរិកកាលពីខែមករា កន្លងទៅ។ ក្នុងអំឡុងពេលនៃការជជែកដេញដោលប្រធានាធិបតីនៅឆ្នាំ ២០២០ នៅពេលមានគេស្នើលោក Donald Trump ឱ្យថ្កោលទោសក្រុមរើសអើងពណ៌សម្បុរទាំងនេះ លោកបានប្រាប់ទៅក្រុម Proud Boys ថា «ឱ្យថយក្រោយ ១ ជំហានសិន តែត្រូវរក្សាជំហរដដែល»។
មុននឹងធ្វើសេចក្ដីប្រកាសបែបនេះមន្ត្រីកាណាដា បានប្រាប់អ្នកសារព័ត៌មានថា ពួកគេបានឃ្លាំមើលក្រុម Proud Boys នេះយូរមកហើយ តាំងពីមុនមានការវាយប្រហារនៅវិមានកាពីតូលទៅទៀត។ ឥឡូវនេះបន្ទាប់ពីព្រឹត្តិការណ៍នេះទៅកាណាដាក៏សម្រេចចិត្តដាក់ក្រុមនេះចូលបញ្ជីតែម្ដង។
ការដាក់ក្រុមនេះចូលក្នុងបញ្ជីបានន័យថា រាល់ធនាគារកាណាដា និងស្ថាប័នហិរញ្ញវត្ថុផ្សេងទៀតត្រូវតែបង្កកទ្រព្យសម្បត្តិដែលជាប់ទាក់ទងនឹងក្រុម Proud Boys ពោលគឺរាល់បុគ្គលណាដែលជាប់ពាក់ព័ន្ធ ឬធ្វើជំនួញជាមួយក្រុមនេះ នឹងត្រូវចាត់ទុកថា ខុសច្បាប់។ រដ្ឋាភិបាលបន្ថែមថា សូម្បីតែការផ្ដល់ការគាំទ្រដល់ក្រុមនេះ ដែលរួមមានការធ្វើដំណើរ និងការបណ្តុះបណ្តាលរហូតដល់ការជ្រើសរើសបុគ្គលិកក៏ចាត់ទុកថា ជាបទឧក្រិដ្ឋដែរ។
យ៉ាងណាមិញ មិនមានបទប្បញ្ញត្តិនៅក្នុងច្បាប់សហព័ន្ធសហរដ្ឋអាមេរិកណាមួយ ដែលកំណត់អត្តសញ្ញាណ និងដាក់ទោសក្រុមគ្រួសាររបស់ក្រុមភេរវករឡើយ ខណៈបញ្ហាផ្លូវច្បាប់នេះ នៅតែស្មុគស្មាញក្នុងការសម្រេច ដោយសារពាក់ព័ន្ធនឹងការធានាសេរីភាពក្នុងការបញ្ចេញមតិនៅអាមេរិក។
អ្នកស្រី Jessica Davis អតីតអ្នកវិភាគជាន់ខ្ពស់នៃទីភ្នាក់ងារស៊ើបការណ៍សម្ងាត់ ផ្នែកសន្តិសុខកាណាដា និងជាប្រធានសហគ្រាសស៊ើបអង្កេត Insight Threat Intelligence បានឱ្យដឹងថា៖ «ការចុះបញ្ជីនេះ ទំនងជានឹងមាន «ការឆ្លើយតបបន្តិចបន្តួច» ពីអ្នកផ្សេងទាក់ទិននឹងបញ្ហាក្រុម Proud Boys នេះ»។
អ្នកស្រី Davis បានមានប្រសាសន៍ថា៖ «សម្រាប់បុគ្គលមួយចំនួនការចុះក្រុមនេះចូល បញ្ជីអាចមានឥទ្ធិពលមួយចំនួន តែទោះយ៉ាងណាប្រហែលជាមានសមាជិកជ្រុលនិយមមួយចំនួន ដែលអាចនឹងត្រូវរងការរិះគន់បន្ថែមទៀតទាក់ទិននឹងបញ្ហានេះ»។
លោក Evan Balgord នាយកប្រតិបត្តិនៃបណ្តាញប្រឆាំងការស្អប់កាណាដាបាននិយាយថា លោកពិបាកកំណត់ថា តើមានសមាជិក Proud Boys ប៉ុន្មាននាក់ដែលរស់នៅប្រទេសកាណាដា»។
លោកបាននិយាយតាមទូរស័ព្ទថា៖ «មុនពេលប្រកាស ខ្ញុំឃើញមានឈ្មោះរបស់ក្រុម Proud Boys នេះប្រហែល ៨ ជំពូក។ ខ្ញុំគិតថាពួកគេចប់ហើយបើពួកគេរស់នៅទីនេះពេលមានឈ្មោះក្នុងនេះហើយពួកគេចប់តែម្ដង»។
បើតាមលោក Balgord ក្រុមនេះផងដែរ មិនមានកាន់ទ្រព្យសម្បត្តិហិរញ្ញវត្ថុសំខាន់ៗច្រើនប៉ុន្មានទេ។
លោក Leah West សាស្ត្រាចារ្យសន្តិសុខជាតិសាកលវិទ្យាល័យ Carleton នៃសាកលវិទ្យាល័យអូតាវ៉ា ប្រទេសកាណាដា បាននិយាយថា ការសម្រេចបែបនេះ គឺគូសបញ្ជាក់ពីការព្រួយបារម្ភរបស់រដ្ឋធម្មនុញ្ញអំពីសមត្ថភាពរបស់រដ្ឋាភិបាលកាណាដាក្នុងការចាត់តាំងក្រុមមួយជាអង្គភាពភេរវកម្ម។
លោកស្រីបាននិយាយតាមទូរស័ព្ទថា ការចាត់តាំងនេះ ពិបាកនឹងប្រឆាំង និងពិបាកក្នុងការដោះស្រាយជាពិសេសមេធាវីអាចនឹងមានការស្ទាក់ស្ទើរក្នុងការផ្តល់ប្រឹក្សាដល់សមាជិកក្រុមភេរវករ។
គួរបញ្ជាក់ផងដែរថា កាលពីឆ្នាំ ២០១៨ ផងដែរ ក្រុមស៊ើបអង្កេតអាមេរិក FBI បានចាត់ទុកក្រុម Proud Boysនេះថា ជាក្រុមជ្រុលនិយមដែលមានទំនាក់ទំនងជាមួយពួកជាតិនិយមស្បែកស ជាប្រភេទចំណាត់ថ្នាក់មួយ ដែលបានលេចចេញដំបូងតាមរយៈរបាយការណ៍ផ្ទៃក្នុងដែលទទួលបានពីការអនុវត្តច្បាប់នៅក្នុងរដ្ឋវ៉ាស៊ីនតោន។
មជ្ឈមណ្ឌលច្បាប់នៃភាពក្រីក្រភាគខាងត្បូង (Southern Poverty Law Center) ក៏បានចាត់ថ្នាក់ក្រុម Proud Boys នេះ ថាជាក្រុមដែលបង្កឱ្យមានការស្អប់ខ្ពើម ដែលការចាត់ទុកត្រូវបានផ្ទុះឡើងក្រោយមានបណ្តឹងបរិហារកេរ្តិ៍ឆ្នាំ ២០១៩ ដោយលោក Gavin McInnes ដែលបានបង្កើតអង្គការខាងស្តាំមួយកាលពីឆ្នាំ ២០១៦៕
