.jpg)
ក្រុងកាប៊ុលៈ មន្ត្រីបានថ្លែងថា ជនស៊ីវិលយ៉ាងតិច ១៤ នាក់ នៅក្នុងនោះរួមមានស្ត្រី និងក្មេងបានស្លាប់កាលពីថ្ងៃអង្គារ ដោយសារបំផ្ទុះគ្រាប់បែកនៅតាមផ្លូវមួយ នៅកណ្តាលប្រទេសអាហ្វហ្គានីស្ថាន ខណៈអំពើហិង្សា បានបន្តកើតឡើង ទោះបីជាកិច្ចពិភាក្សាសន្តិភាព រវាងក្រុមតាលីបង់ និងរដ្ឋាភិបាលអាហ្វហ្គានីស្ថានក្តី។
អ្នកនាំពាក្យក្រសួងមហាផ្ទៃ គឺលោ កតារិហ្គ អារៀន បានថ្លែងនៅក្នុងសេចក្តីថ្លែងការណ៍មួយថា ស្ត្រី ៧ នាក់ ក្មេង ៥ នាក់ និងបុរស ២ នាក់បានស្លាប់ នៅពេលក្រុមភេរវករ បានចុចបំផ្ទុះគ្រាប់បែក នៅក្នុងរថយន្តរបស់ពួកគេ នៅក្នុងខេត្តដៃគុនឌី។
លោកបានបន្ថែមថា ក្មេង ៣ នាក់ ក៏បានរងរបួសផងដែរ ដោយបានស្តីបន្ទោសទៅលើក្រុមតាលីបង់ជុំវិញការបំផ្ទុះនោះ។
លោក ណាស្រាល់ឡាហ៍ ហ្គូរី ជាអ្នកនាំពាក្យអភិបាលខេត្តដៃគុនឌី បានថ្លែងប្រាប់កាសែត AFP ថា ក្រុមជនរងគ្រោះទាំងនោះ បានកំពុងធ្វើដំណើរទៅកាន់ទីសក្ការបូជាមួយកន្លែង នៅពេលរថយន្តក្រុងតូចមួយគ្រឿងរបស់ពួកគេ បានរងការវាយប្រហារ ដោយសារការបំផ្ទុះនៅទីនោះ។
គ្មានក្រុមណាមួយបានអះអាងទទួលខុសត្រូវ ចំពោះការបំផ្ទុះគ្រាប់បែកនោះទេ ប៉ុន្តែការបំផ្ទុះគ្រាប់បែកនៅតាមផ្លូវ បានក្លាយជាអាវុធជម្រើសមួយ របស់ក្រុមតាលីបង់វាយប្រហារ៕ SK
