.jpg)
ក្រុងចាឡាឡាបាដៈ មន្ត្រីបានថ្លែងថា ការវាយប្រហារអត្តឃាតមួយបានកំណត់គោលដៅទៅលើអភិបាលខេត្តអាហ្វហ្គានីស្ថានម្នាក់ បានបណ្តាលឲ្យមនុស្សយ៉ាងតិច ៨ នាក់ស្លាប់កាលពីថ្ងៃចន្ទ ខណៈប្រធានាធិបតីអាហ្វហ្គានីស្ថាន បានធ្វើដំណើរទៅកាន់ប្រទេសកាតា ដែលជាកន្លែងកិច្ចពិភាក្សាសន្តិភាព ជាមួយក្រុមតាលីបង់បានជាប់គាំង។
មនុស្ស ២៨ នាក់បានរងរបួស នៅពេលដែលអ្នកវាយប្រហារ បានបើករថយន្តពោរពេញដោយគ្រឿងផ្ទុះទៅបំបុកក្បួនរថយន្តរបស់លោក រ៉ហ៍ម៉ាតុលឡាហ៍ យ៉ារម៉ាល់ ជាអភិបាលខេត្តឡាហ្គម៉ែនភាគខាងកើត។
អ្នកនាំពាក្យអភិបាលខេត្ត គឺលោក អាស់សាឌុលឡាហ៍ ឌូឡាតហ្ស៊ៃ បានថ្លែងប្រាប់កាសែត AFP ថា៖ «លោកអភិបាលខេត្តបានកំពុងបើករថយន្តទៅការិយាល័យរបស់លោកនៅពេលរថយន្តរបស់លោក ត្រូវបានរងការវាយប្រហារ។ អង្គរក្ស ៤ នាក់របស់លោក និងជនស៊ីវិល ៤ នាក់បានស្លាប់ និង ២៨ នាក់ផ្សេងទៀតរងរបួស» ដោយបានបន្ថែមថា លោកអភិបាលខេត្តរូបនោះ មិនបានរងរបួសនោះទេ។
អ្នកនាំពាក្យក្រសួងមហាផ្ទៃ លោក តារិហ្គ អារៀន បានអះអាងអំពីការវាយប្រហារ ហើយបានថ្លែងថា អ្នករងរបួសភាគច្រើនបំផុត គឺជាជនស៊ីវិល៕ SK
