ក្រុងសេអ៊ូល៖ កាសែតផ្លូវការរបស់កូរ៉េខាងជើងកាលពីថ្ងៃចន្ទបានចោទប្រកាន់អាមេរិក ពីបទប្រើប្រាស់ការដាក់ទណ្ឌកម្មនានា ដើម្បីបំផ្លាញប្រទេសមួយចំនួនដែលមិនស្តាប់បង្គាប់់ ដោយបានបញ្ជាក់ថា ប្រទេសទាំងនោះគួរតែក្រោកឈរឡើង ដើម្បីប្រឆាំងការប៉ុនប៉ងដោយមិនចុះចាញ់នឹងសម្ពាធនោះ។
កូរ៉េខាងជើងបានរិះគន់អាមេរិកកាន់តែខ្លាំងឡើង ចាប់តាំងពីកិច្ចពិភាក្សាបញ្ហាការលុបបំបាត់កម្មវិធីអាវុធនុយក្លេអ៊ែរកម្រិតការងារនៅទីក្រុង Stockholm បានបរាជ័យនៅដើមខែនេះ។ កូរ៉េខាងជើងបានបង្កើនការអំពាវនាវឲ្យពង្រឹង «ដោយខ្លួនឯង» នៅក្នុងការប្រឈមមុខនឹងការដាក់ទណ្ឌកម្មដឹកនាំដោយអាមេរិក។
កាសែត Rodong Sinmun បាននិយាយនៅក្នុងបទអត្ថាធិប្បាយមួយថា៖ «ក្រុមប្រទេសមហាអំណាចលោកខាងលិច នៅក្នុងនោះមានអាមេរិក កំពុងដាក់សម្ពាធបណ្តាប្រទេសដែលមិនស្តាប់បង្គាប់ ដោយការដាក់ទណ្ឌកម្ម»។ «ការសម្របសម្រួល ១ ដំណាក់កាលនឹងឈានដល់ ១០ ដំណាក់កាល រាប់រយដំណាក់កាល និងទីបញ្ចប់នៅតែបរាជ័យ»។
ដោយលើកឡើងករណីអំពីប្រទេស អ៊ីរ៉ាក់ និងលីប៊ី កាសែតនោះបាននិយាយថា ប្រទេសទាំងនោះបានដួលរលំដោយសារ «ការបំផ្លិចបំផ្លាញដោយខ្លួនឯង» ជាមួយការរំលោភអធិបតេយ្យភាពរបស់ពួកគេ ជាការបង្ហាញឲ្យឃើញថា ចេញពីទង្វើដែលបានធ្វើឲ្យឈឺចាប់ដោយខ្លួនឯងទៅវិញ។
ជាការច្បាស់ណាស់ កាសែតនោះកំពុងនិយាយសំដៅទៅលើមេដឹកនាំប្រទេស អ៊ីរ៉ាក់ គឺលោក សាដដាម ហ៊ូសសេន ដែលបានអនុញ្ញាតឲ្យក្រុមអធិការកិច្ចរបស់អង្គការសហប្រជាជាតិចូលទៅត្រួតពិនិត្យមើលកម្មវិធីអាវុធរបស់ខ្លួន ចាប់តាំងពីឆ្នាំ ២០០២ រហូតដល់ ២០០៣ ប៉ុន្តែក្រោយមកត្រូវបានកាត់ទោសប្រហារជីវិត បន្ទាប់ពី US ចូលឈ្លានពាន។
ប្រទេស លីប៊ី វិញ បានប្រគល់កម្មវិធីអាវុធមហាប្រល័យលោករបស់ខ្លួននៅក្នុងឆ្នាំ ២០០៣ ប៉ុន្តែមេដឹកនាំរបស់ខ្លួន គឺលោក មួម៉ា ហ្គាដាហ្វី ត្រូវបានទម្លាក់ចេញពីតំណែង ហើយត្រូវបានសម្លាប់ដោយកងកម្លាំងឧទ្ទាមដែលបានគាំទ្រដោយអង្គការណាតូនៅឆ្នាំ ២០១១។
កាសែតនោះបាននិយាយថា គោលដៅនៃការដាក់ទណ្ឌកម្ម គឺធ្វើឲ្យជ្រួលច្របល់សេដ្ឋកិច្ច ជំរុញឲ្យផ្លាស់ប្តូររបប និងទីបញ្ចប់ទទួលបានជោគជ័យទាំងស្រុង៕ Yonhap/SK