.jpg)
អនុប្រធានប្រតិបត្តិនៃគណៈកម្មការអឺរ៉ុប លោក Valdis Dombrovskis។ AFP
គណៈកម្មការអឺរ៉ុប បាននិយាយថា កិច្ចប្រឹងប្រែងក្នុងការផ្តល់សច្ចាប័នលើកិច្ចព្រមព្រៀងវិនិយោគដ៏ធំមួយជាមួយប្រទេសចិន ត្រូវបានបញ្ឈប់ជាធរមាន ក្រោយប្រទេសចិនត្រូវទទួលរងការដាក់ទណ្ឌកម្មលើបញ្ហាសិទ្ធិមនុស្សនៅក្នុងតំបន់អ៊ុយហ្គ័ររបស់ខ្លួនកាលពីខែមីនាកន្លងទៅ។
លោក Valdis Dombrovskis អនុប្រធានប្រតិបត្តិនៃគណៈកម្មការ បាននិយាយកាលពីថ្ងៃអង្គារថា៖ « ឥឡូវនេះ យើងបានផ្អាកសកម្មភាពផ្សព្វផ្សាយនយោបាយពីខាងសហគមន៍អឺរ៉ុប។ លោកបានឱ្យដឹងទៀតថា ស្ថានភាពទំនាក់ទំនងរវាងក្រុងប្រ៊ុចសែល (បែលហ្ស៊ិក) និងទីក្រុងប៉េកាំង គឺមិនអំណោយផលសម្រាប់ការផ្តល់សច្ចាប័នលើកិច្ចព្រមព្រៀងស្តីពីការវិនិយោគរវាងសហភាពអឺរ៉ុប និងចិនទេ។
ទោះបីជាលោក Dombrovskis មិនបានលើកឡើងថា កតិកាសញ្ញានេះ ត្រូវបានផ្អាកជាផ្លូវការឬយ៉ាងក៏ដោយ ក៏ប៉ុន្តែពួកគេបានលើកឡើងថា ភាពតានតឹងរវាងទីក្រុងប្រ៊ុចសែល និងទីក្រុងប៉េកាំងបានធ្វើឱ្យសហភាពអឺរ៉ុបមិនពេញចិត្តចំពោះកិច្ចព្រមព្រៀងបែបនេះទេ។
គួរបញ្ជាក់ផងដែរថា កាលពីខែ មីនាកន្លងទៅ សហភាពអ៊ឺរ៉ុបបានដាក់ទណ្ឌកម្មលើមន្ត្រីចិន ៤ រូប ដែលពាក់ព័ន្ធនឹងគោលនយោបាយរបស់ទីក្រុងប៉េកាំងទៅលើតំបន់ស៊ីនជាំង។ ជាការឆ្លើយតបប្រទេសចិន ក៏បានដាក់ទណ្ឌកម្មលើសមាជិកជាន់ខ្ពស់នៃសហភាអ៊ឺរ៉ុបចំនួន ៣ រូប គណៈកម្មាធិការអឺរ៉ុប ២ រូប និងអ្នកសិក្សាអឺរ៉ុប ដែលផ្តោតលើប្រទេសចិនផងដែរ៕
