.jpg)
មន្ត្រីយោធាអារ៉ាប៊ី សាអ៊ូឌីតម្នាក់ ដើរក្បែររបងព្រលានយន្តហោះ Abha។ រូប AFP
ក្រុងរីយ៉ាដៈ ក្រុមចម្រុះដឹកនាំដោយក្រុងរីយ៉ាដ បាននិយាយថា ការវាយប្រហាររបស់ក្រុមឧទ្ទាមយេម៉ែនទៅលើព្រលានយន្តហោះស៊ីវិលមួយនៅអារ៉ាប៊ី សាអ៊ូឌីត បានបណ្តាលឲ្យជនជាតិស៊ីរីម្នាក់ស្លាប់ និងជនស៊ីវិល ២១ នាក់ផ្សេងទៀតរងរបួស ជាការឡើងកម្តៅថ្មីបន្ទាប់ពីមានការវាយប្រហារជាបន្តបន្ទាប់ទៅលើទីតាំងនោះមក។
ការវាយប្រហារទៅលើព្រលានយន្តហោះ Abha ដែលក្រុមចម្រុះបាននិយាយថា បានបង្កឲ្យហាងនំដូណាត់មួយពោរពេញដោយអំបែងកញ្ចក់ និងរថយន្ត ១៨ គ្រឿង ខូចខាត បានកើតឡើងស្របពេលមានភាពតានតឹងនៅក្នុងតំបន់ជាមួយអ៊ីរ៉ង់។
ការវាយប្រហាររបស់ក្រុមឧទ្ទាមហ៊ូធីមានសម្ព័ន្ធមិត្តជាមួយអ៊ីរ៉ង់ ទៅលើក្រុងជាច្រើន បានគំរាមកំហែងដល់កិច្ចព្រមព្រៀងឈប់បាញ់គាំទ្រដោយអង្គការសហប្រជាជាតិសម្រាប់កំពង់ផែហូដេដា ជាកំពង់ផែមួយសម្រាប់ដឹកជញ្ជូនជំនួយមនុស្សធម៌ដ៏សំខាន់ សម្រាប់ប្រទេសដែលហែកហួរទៅដោយសង្គ្រាមមួយនេះ។
នៅក្នុងសេចក្តីថ្លែងការណ៍មួយដែលទីភ្នាក់ងារសារព័ត៌មានអារ៉ាប៊ី សាអ៊ូឌីត ទទួលបាន ក្រុមចម្រុះបាននិយាយថា៖ «ការវាយប្រហារភេវកម្មរបស់កងជីវពលហ៊ូធី ដឹកនាំដោយអ៊ីរ៉ង់ទៅលើព្រលានយន្តហោះ Abha បានបណ្តាលឲ្យអ្នកស្រុកស៊ីរីម្នាក់ និងជនស៊ីវិល ២១ នាក់ទៀតស្លាប់»។
ក្រុមចម្រុះនោះ បានបន្ថែមថា ក្រុមអ្នករងរបួសមកពីប្រទេស អារ៉ាប៊ី សាអ៊ូឌីត អេហ្ស៊ីប ឥណ្ឌា និងបង់ក្លាដែស ដែលក្នុងនោះមានស្ត្រី ៣ នាក់ និងក្មេង ២ នាក់ ត្រូវបានបញ្ជូនទៅព្យាបាលនៅមន្ទីរពេទ្យ។
ក្រុមចម្រុះមិនបានផ្តល់ព័ត៌មានលម្អិតអំពីថា តើព្រលានយន្តហោះ ត្រូវវាយប្រហារបែបណាទេ ប៉ុន្តែក្រុមឧទ្ទាមហ៊ូធីបានធ្វើការវាយប្រហារដោយដ្រូន និងមីស៊ីល៕ AFP/PSA
