ក្រុងប៉េកាំង៖ លោកប្រធានាធិបតីចិន ស៊ី ជីនភីង កាលពីថ្ងៃពុធបានជួបជាមួយលោកនាយករដ្ឋមន្ត្រីប៉ាគីស្ថាន អ៊ីមរ៉ាន ខាន់ ដោយបានប្តេជ្ញាធ្វើការរួមគ្នា ដើម្បីពង្រឹងការសម្របសម្រួលជាយុទ្ធសាស្ត្រ និងកិច្ចសហប្រតិបត្តិការប្រាកដនិយម ដើម្បីបង្កើតសហគមន៍ចិន-ប៉ាគីស្ថាន ដែលមានអនាគតរួមនៅក្នុងសករាជថ្មី។
ដោយកំណត់ថា ប្រទេសទាំង ២ ជាដៃគូសហការជាយុទ្ធសាស្ត្រគ្រប់ស្ថានភាពនោះ លោក ស៊ី បានថ្លែងថាទោះជាមានការផ្លាស់ប្តូរក្នុងតំបន់ និងអន្តរជាតិក៏ដោយ ក៏ចំណងមិត្តភាពរវាងចិន និងប៉ាគីស្ថាន ជានិច្ចកាលរឹងមាំ និងមិនអាចបំបែកបានទេ ហើយកិច្ចសហប្រតិបត្តិការចិន-ប៉ាគីស្ថាន ជានិច្ចកាលមានសារៈសំខាន់ ដោយមានការរីកចម្រើនជាបន្តបន្ទាប់។
លោក ស៊ី បាននិយាយថា ប្រទេស ចិន ជានិច្ចកាលចាត់ទុកទំនាក់ទំនងជាមួយប៉ាគីស្ថាន ជាអាទិភាពការទូតហើយនឹងបន្តគាំទ្រប៉ាគីស្ថានយ៉ាងពេញទំហឹងលើបញ្ហានានា ដែលទាក់ទងនឹងផលប្រយោជន៍សំខាន់ៗរបស់ខ្លួន និងកង្វល់ចម្បងទាក់ទងនឹងប្រទេសនេះ។
ឆ្នាំនេះ គឺជាខួបលើកទី ៧០ នៃការបង្កើតសាធារណរដ្ឋប្រជាមានិតចិន។
លោក ស៊ី បានថ្លែងថា៖ «យើងបានរៀបចំសកម្មភាពសប្បាយរីករាយជាបន្តបន្ទាប់ដែលជាឱកាសមួយសម្រាប់ការអប់រំស្នេហាជាតិដ៏ទូលំទូលាយ។ ប្រជាជនចិនសរុបជិត ១,៤ ពាន់លាននាក់ បានបង្កើតកម្លាំងយ៉ាងរឹងមាំដោយមានគំនិតសេ្នហាជាតិដែលមិនធ្លាប់មានពីមុន ដោយបានបង្កើនទំនុកចិត្ត និងការប្តេជ្ញាចិត្តរបស់ពួកគេបន្តដើរតាមមាគ៌ានៃសង្គមនិយមជាមួយចរិតលក្ខណៈរបស់ចិនប្រឆាំងនឹងការខ្វែងគំនិតនានា គ្រប់គ្រងកិច្ចការរបស់យើងផ្ទាល់ និងឈររឹងមាននៅក្នុងសហគមន៍របស់ប្រជាជាន»។
លោកបានថ្លែងថា កាលពីអតីតកាល ប្រទេស ប៉ាគីស្ថាន បានផ្តល់ជំនួយដល់ប្រទេស ចិន នៅក្នុងពេលវេលាលំបាកៗ ហើយបច្ចុប្បន្ននេះ ប្រទេស ចិន មានការរីកចម្រើន ខ្លួនមានក្តីសង្ឃឹមយ៉ាងមុតមាំថា នឹងជួយប្រទេស ប៉ាគីស្ថាន ឲ្យមានការរីកចម្រើនប្រសើរឡើង។
លោកបានអំពាវនាវឲ្យភាគីទាំង ២ បន្តការផ្តល់ព័ត៌មានគ្នាទៅវិញទៅមកក្នុងកម្រិតខ្ពស់ បង្កើតទំនាក់ទំនងជាយុទ្ធសាស្ត្ររក្សាគោលជំហរដោះស្រាយបញ្ហាធំៗឲ្យទាន់ពេលវេលា។
ចំពោះទំនាក់ទំនងសេដ្ឋកិច្ចចិន-ប៉ាគីស្ថាន ( CPEC) លោក ស៊ី ថ្លែងថា ភាគីទាំង ២ គួរតែបង្កើតស្តង់ដាកម្រិតខ្ពស់ បង្កើត និងគ្រប់គ្រងគម្រោងថាមពលចាស់ ហេដ្ឋារចនាសម្ព័ន្ធ ដឹកជញ្ជូន សួនឧស្សាហកម្ម និងគម្រោងដែលទាក់ទងជីវភាពរបស់ប្រជាជនឲ្យមានប្រសិទ្ធភាព និង CPEC ជាគំរូមួយសម្រាប់ការបង្កើតគំនិតផ្តួចផ្តើមផ្លូវ និងខ្សែក្រវាត់។
លោក ស៊ី ថ្លែងថា ចិនសរសើរ និងគាំទ្រកិច្ចប្រឹងប្រែងរបស់ប៉ាគីស្ថានក្នុងការប្រយុទ្ធប្រឆាំងភេរវកម្ម៕ Xinhua