.jpg)
អ្នកធ្វើការផ្នែកសុខភាពរៀបចំចាក់វ៉ាក់សាំង Sinopharm របស់ចិនឱ្យអ្នកស្ម័គ្រចិត្ត។ AFP
កាលថ្ងៃអាទិត្យ ទី ១៣ ធ្នូ ប្រទេសបារ៉ែន ដែលស្ថិតនៅតំបន់មជ្ឈិមបូព៌ា និងឈូងសមុទ្រពែរ្ស បានអនុញ្ញាតឱ្យប្រើប្រាស់ជាទូទៅនូវវ៉ាក់សាំង BBIBP-CorV ដែលវ៉ាក់សាំងនេះ គឺផលិតដោយក្រុមហ៊ុនរបស់រដ្ឋចិន Sinopharm/Beijing Institute of Biological Products។
សេចក្ដីថ្លែងការណ៍របស់អាជ្ញាធរនិយតកម្មសុខាភិបាលជាតិបារ៉ែនវ៉ាក់សាំងនេះ ត្រូវបានអនុញ្ញាតឱ្យប្រើប្រាស់ដោយផ្អែកលើទិន្នន័យការសាកល្បងដំណាក់កាលទី៣ របស់ប្រទេសអារ៉ាប់រួម ដែលបង្ហាញថាប្រសិទ្ធភាព ៨៦% និងមិនមានផលប៉ះពាល់ធ្ងន់ធ្ងរ។
រីឯក្រសួងសុខាភិបាលបារ៉ែនវិញ បានប្រកាសថា ពួកគេបានបង្កើតការចុះឈ្មោះតាមអ៊ីនធឺណិតសម្រាប់ពលរដ្ឋ និងជនមានសិទ្ធិរស់នៅ ដែលមានអាយុលើសពី ១៨ ឆ្នាំ ដើម្បីទទួលបានវ៉ាក់សាំង។
កាលពីខែកក្កដា អារ៉ាប់រួមបានពង្រីកការធ្វើការសាកល្បងដំណាក់កាលទី៣ របស់ពួកគេទៅកាន់បារ៉ែន ហ្ស៊កដានី និងអេហ្ស៊ីប។ អារ៉ាប់រួមបានអនុញ្ញាតឱ្យប្រើប្រាស់វ៉ាក់សាំងនេះក្នុងគ្រាអាសន្នកាលពីខែកញ្ញា ហើយបានអនុញ្ញាតឱ្យប្រើប្រាស់ពេញលេញនៅថ្ងៃទី ៩ ខែធ្នូ ក្រោយពីបានរកឃើញថា មានប្រសិទ្ធភាព ៨៦%។
មកដល់ពេលនេះមានតែបារ៉ែន និងអារ៉ាប់រួមទេ ដែលបានអនុញ្ញាតឱ្យប្រើប្រាស់វ៉ាក់សាំងនេះពេញលេញ។ ប្រទេសចិន បានអនុញ្ញាតឱ្យប្រើប្រាស់ក្នុងគ្រាអាសន្នប៉ុណ្ណោះ ហើយមិនទាន់បានអនុញ្ញាតពេញលេញនៅឡើយ។
ការប្រកាសឱ្យប្រើប្រាស់នៅបារ៉ែន គឺកើតឡើងស្របពេលនឹងការប្រកាសរបស់រដ្ឋាភិបាលប៉េរូថា នឹងផ្អាកការសាកល្បងវ៉ាក់សាំង Sinopharm ក្រោយពីអ្នកស្ម័គ្រចិត្តម្នាក់បានប្រតិកម្មមិនល្អនឹងវ៉ាក់សាំងនេះ ដោយមានរោគសញ្ញាបាត់បង់កម្លាំងនៅជើង និងរោគសញ្ញាជាច្រើនទៀត។ ដោយសារ Sinopharm មានការសាកល្បងវ៉ាក់សាំងចំនួន ២ នៅពេលតែមួយ ដែលវ៉ាក់សាំង ១ ទៀតផលិតជាមួយ Wuhan Institute of Biological Products ហើយរួមជាមួយរដ្ឋាភិបាលប៉េរូ មិនបានធ្វើការបញ្ជាក់ធ្វើឱ្យគេមិនទាន់ដឹងថា ជនស្ម័គ្រចិត្ត ១ រូបនេះទទួលវ៉ាក់សាំងមួយណាទេ។
ក្រសួងសុខាភិបាលប៉េរូ បានសរសេរក្នុងសេចក្ដីថ្លែងការណ៍មួយថា៖ «ការសម្រេចចិត្តផ្អាកការសាកល្បងជាបណ្ដោះអាសន្ន គឺជាវិធានការសុវត្ថិភាពដែលបានចែងនៅក្នុងបទប្បញ្ញត្តិសម្រាប់ការសាកល្បង និងពិធីសារដែលបានបង្កើតឡើង ដើម្បីការពារសុខភាពរបស់ជនស្ម័គ្រចិត្តស្រាវជ្រាវ»។
ក្រសួងសុខាភិបាលប៉េរូក៏បានប្រកាសថា ព្រឹត្តិការណ៍នេះគឺស្ថិតក្រោមការស៊ើបអង្កេតដើម្បីកំណត់ថា តើមានទាក់ទងនឹងវ៉ាក់សាំង ឬមានហេតុផលអ្វីផ្សេងទៀត។
យ៉ាងណាមិញក្រៅពីវ៉ាក់សាំង Sinopharm បារ៉ែនក៏បានអនុញ្ញាតឱ្យប្រើប្រាស់វ៉ាក់សាំងរបស់ Pfizer/BioNTech ពេញលេញផងដែរ។ ប្រទេសជិតខាងរបស់បារ៉ែន អារ៉ាប៊ី សាអ៊ូឌីត ក៏បានអនុញ្ញាតឱ្យប្រើប្រាស់វ៉ាក់សាំងនេះពេញលេញ។
នៅពេលបច្ចុប្បន្នវ៉ាក់សាំង Pfizer គឺជាវ៉ាក់សាំងពេញនិយមជាងគេដែលរួមមានទាំងប្រទេសខាងលើ អាមេរិក កាណាដា ម៉ិកស៊ិក ចក្រភពអង់គ្លេស គុយវ៉ែត និងថ្មីៗនេះសិង្ហបុរី។ នៅសហរដ្ឋអាមេរិកការចាក់វ៉ាក់សាំងដំបូងបានប្រព្រឹត្តទៅនៅថ្ងៃចន្ទទី ១៤ ធ្នូ ដោយផ្ដល់អាទិភាពដល់វេជ្ជបណ្ឌិត និងបុគ្គលិកសុខាភិបាលដែលប្រឈមមុខនឹងហានិភ័យឆ្លងខ្ពស់៕
