.jpg)
ទាហានអ៊ីស្រាអែល ប្រចាំការនៅតំបន់ Golan Heights។ AFP
ក្រុងហ៊្សេរុយសាឡិមៈ យោធាអ៊ីស្រាអែលបានថ្លែងថា ក្រុមពលរដ្ឋប៉ាឡេស្ទីននៅក្នុងតំបន់ហ្គាហ្សាបានបាញ់រ៉ុក្កែត ៣ គ្រាប់ ចូលទៅក្នុងទឹកដីអ៊ីស្រាអែលភាគខាងត្បូងកាលពីយប់ថ្ងៃសៅរ៍ ហើយជាការវាយប្រហារលើកទី២ នៅក្នុងរយៈពេល ២៤ ម៉ោង។
សេចក្តីថ្លែងការណ៍នៅក្នុង WhatsApp ជាភាសាអង់គ្លេសបានថ្លែងថា៖ «រ៉ុក្កែត ៣ គ្រាប់ ត្រូវបានគេទទួលស្គាល់ថាបានបាញ់ចេញពីតំបន់ហ្គាហ្សាចូលទៅក្នុងទឹកដីអ៊ីស្រាអែល» «ហើយរ៉ុក្កែត ២ គ្រាប់ ត្រូវបានបាញ់ទម្លាក់ដោយប្រព័ន្ធការពារជាតិ Iron Dome»។
មិនមានរបាយការណ៍និយាយអំពីចំនួនអ្នកស្លាប់ និងរងបួសនោះទេ ប៉ុន្តែប៉ូលិសបានថ្លែងថា រ៉ុក្កែតមួយគ្រាប់បានធ្លាក់ទៅលើផ្ទះមួយខ្នងនៅក្រុង Sderot ភាគខាងត្បូង។
សេចក្តីថ្លែងការណ៍របស់កងទ័ពអ៊ីស្រាអែល មិនបាននិយាយអ្វីដែលបានកើតឡើងអំពីគ្រាប់រ៉ុក្កែតទី៣ នោះទេ។
គ្រាប់រ៉ុក្កែត ដែលបានធ្លាក់ចូលទៅក្នុងតំបន់គ្មានមនុស្សរស់នៅ ក្រោយពេលយប់ងងឹតជាញឹកញាប់មិនត្រូវបានគេកំណត់ទីតាំងវាយប្រហាររហូតដល់ពេលភ្លឺ៕ SK
