.jpg)
ប៉ូលិសប្រឆាំងកុបកម្មប៉ះទង្គិចជាមួយក្រុមបាតុករដែលពួកគេធ្វើការតវ៉ាប្រឆាំង ការសាងសង់ជំរំជនចំណាកស្រុកដ៏ចម្រូងចម្រាស។ AFP
ក្រុងអាថែនៈ មន្ត្រីបានថ្លែងថា ប៉ូលិសប្រឆាំងកុបកម្មត្រូវបានគេបញ្ជូនទៅកាន់កោះឡេសប៊ូស និងជីអូរបស់ប្រទេសក្រិកកាលពីថ្ងៃអង្គារ ខណៈដែលរដ្ឋាភិបាលបានបន្តការសាងសង់ជំរំជនចំណាកស្រុកថ្មីដ៏ចម្រូងចម្រាសនៅទីនោះ។
ប្រភពប៉ូលិសបានថ្លែងប្រាប់ AFP ថានៅកំពង់ផែកោះទាំង ២ ជាទីដែលក្រុមពលរដ្ឋប្រចាំតំបន់រាប់រយនាក់បានប្រមូលផ្តុំគ្នា ប៉ូលិសបានប្រើឧស្ម័នបង្ហូរទឹកភ្នែក ដើម្បីបើកផ្លូវសម្រាប់ពង្រឹងកម្លាំងសន្តិសុខបន្ថែមទៀត និងសាងសង់ជំរំសម្រាប់ជនចំណាកស្រុកទាំងនោះ។
ទូរទស្សន៍បានបង្ហាញរូបភាពវីដេអូនៅឯកន្លែងកំពង់ផែកោះជីអូនៅភូមិមីស្តា ហើយក្រុមអ្នកតវ៉ាមានកន្សែងរុំក្បាលខ្លះបានគប់ដុំថ្ម នៅពេលប៉ូលិសប្រឆាំងកុបកម្មមួយចំនួនបានចូលទៅជំរំនោះ។
ក្រុមពលរដ្ឋបានចតរថយន្ត និងរថយន្តដឹកទំនិញនៅតាមដងផ្លូវខ្លះរហូតដល់កន្លែងជំរំទាំងនោះដែលជាកន្លែងជំរំនីមួយៗអាចដាក់មនុស្សបានរហូតដល់ ៧០០០ នាក់នៅក្នុងការព្យាយាម ដើម្បីរារាំងការសាងសង់របស់ពួកគេ។
ប្រភពប៉ូលិសបានថ្លែងប្រាប់ AFP ថា៖ «មានការបិទផ្លូវជាច្រើនកន្លែង ហើយយើងនឹងធ្វើអន្តរាគមន៍នៅកន្លែងដែលចាំបាច់ប៉ុណ្ណោះ»។
បន្ទាប់ពីការចរចាមិនទទួលបានផ្លែផ្កាអស់ជាច្រើនសប្តាហ៍ជាមួយអាជ្ញាធរក្នុងតំបន់ នាយករដ្ឋមន្ត្រីលោក គីរៀកូស មីតស៊ូតាគីស កាលពីចុងសប្តាហ៍មុន បានអះអាងថា ផែនការនោះអាចដំណើរការសាងសង់បន្តទៅទៀត ទោះបីជាមានការប្រឆាំងពីពួកគេក្តី។
លោកបានថ្លែងប្រាប់កម្មាភិបាលគណបក្សអភិរក្សកាលពីថ្ងៃអាទិត្យថា៖ «ការងារសាងសង់នឹងចាប់ផ្តើមនៅពេលឆាប់ៗនេះ និងត្រូវបានបញ្ចប់ទាំងស្រុង ហើយគ្មានការផ្លាស់ប្តូរនោះទេ»។
គណបក្សប្រឆាំងសំខាន់ឆ្វេងនិយមស៊ីរីហ្សាបានចោទប្រកាន់រដ្ឋាភិបាលពីបទមិនគោរពប្រជាធិបតេយ្យ។
អ្នកនាំពាក្យគណបក្សស៊ីរីហ្សាលោក អាលីស៊ីស ឆែរីតស៊ីស បានថ្លែងថា៖ «យើងនឹងមិនអនុញ្ញាតឲ្យលោក មីតស៊ូតាគីស និងរដ្ឋាភិបាលរបស់លោក ប្រែក្លាយកោះនោះឲ្យទៅជាសមរភូមិប្រយុទ្ធមួយទេ»។
ជនចំណាកស្រុកជាង ៣៨០០០ នាក់បានចូលទៅរស់នៅក្នុងជំរំជាច្រើននៅលើកោះឡេសប៊ូស សាមូស ជីអូ លីរូស និងកោះកូសរបស់ប្រទេសក្រិក ទោះបីជាជំរំផ្លូវការមួយមានសមត្ថភាពដាក់មនុស្សបានត្រឹមតែ ៦២០០ នាក់ក្តី។
មន្ត្រីនៅកោះទាំងនោះនិងពលរដ្ឋខ្លះបានថ្លែងប្រាប់រដ្ឋាភិបាលក្រិកថា ក្រោយពី ៥ ឆ្នាំនៅសមរភូមិជួរមុខនៃវិបត្តិជនចំណាកស្រុកអឺរ៉ុប ពួកគេលែងរៀបចំទទួលយកអ្នកស្វែងរកសិទ្ធិជ្រកកោនរាប់ពាន់នាក់ទៀត។
រដ្ឋាភិបាលអភិរក្សនិយមដែលបានចូលកាន់តំណែងកាលពីខែកក្កដា បានប្រកាសថា ជំរំជាច្រើននៅលើកោះឡេសប៊ូស សាមូស និងជីអូនឹងត្រូវបានបិទទ្វារនៅឆ្នាំនេះ ហើយត្រូវបានជំនួសមកវិញជាមួយជំរំថ្មី ជាកន្លែងតូចជាងមុនដែលត្រូវធ្វើប្រតិបត្តិការសាងសង់ចប់នៅត្រឹមពាក់កណ្តាលឆ្នាំ ២០២០ នេះ។
ប៉ុន្តែចំណែកឯរដ្ឋការរបស់លោក មីតស៊ូតាគីស បានព្យាយាមបន្ធូរបន្ថយបញ្ហាតាមរយៈការផ្លាស់ប្តូរទីកន្លែងរបស់ក្រុមជនចំណាកស្រុករាប់ពាន់នាក់ឲ្យពួកគេទៅរស់នៅកន្លែងខ្លះផ្សេងទៀតរបស់ប្រទេសក្រិក និងឲ្យរស់នៅសហគមន៍ជាច្រើនទៀតនៅលើដីគោក៕ SK
