.jpg)
លោក នីកូឡាស ម៉ាឌូរ៉ូ (កណ្តាល) ថ្លែងពាក់ព័ន្ធលោក Guaido នៅវិមានប្រធានាធិបតី។ AFP
ក្រុងការ៉ាកាសៈ មេដឹកនាំគណបក្សប្រឆាំងលោក Juan Guaido កាលពីថ្ងៃអង្គារ បានប្តេជ្ញាដណ្តើមយកកន្លែងរបស់លោក នីកូឡាស ម៉ាឌូរ៉ូនៅក្នុងវិមានប្រធានាធិបតី នៅពេលឆាប់ៗនេះ ខណៈមនុស្សរាប់ពាន់នាក់បានឡើងទៅតាមដងផ្លូវនានានៅក្នុងក្រុងការ៉ាកាស ដើម្បីធ្វើការតវ៉ា។
លោក Juan Guaido បានថ្លែងប្រាប់ក្រុមអ្នកគាំទ្រដែលស្រែកគាំទ្រៈ «Yes, you can!» ថា៖ «យើងត្រូវការការិយាល័យមួយសម្រាប់ធ្វើការនៅពេលឆាប់ៗនេះ និងនៅពេលដែលយើងមានកងកម្លាំងប្រដាប់អាវុធទាំងអស់នៅខាងយើងយើងនឹងទៅរកការិយាល័យរបស់យើងនៅទីនោះ នៅក្នុងក្រុង Miraflores»។
ក្រុមអ្នកតវ៉ាបានគោះឆ្នាំង និងចុចស៊ីភ្លេរថយន្ត នៅពេលធ្វើការតវ៉ានៅក្នុងទីលានមួយនៅភាគខាងកើតនៃរដ្ឋធានី។ ភាគច្រើនគ្រវីបដាផ្ទាំងធំៗដោយបានអំពាវនាវឲ្យលោក ម៉ាឌូរ៉ូ ចុះពីតំណែង។
អ្នកតវ៉ាម្នាក់ឈ្មោះ Miguel Gonzalez បាននិយាយថា៖ «ស្ថានភាពនេះ ពិបាកណាស់ យើងសង្ឃឹមថា រដ្ឋាភិបាលនេះ នឹងផ្លាស់ប្តូរ។ យើងមានការបះបោរគ្រប់គ្រាន់ហើយ»។
លោក Juan Guaido ដែលត្រូវបានទទួលស្គាល់ថា ជាប្រធានាធិបតីបណ្តោះអាសន្នដោយប្រទេសជាង ៥០ បានថ្លែងថា៖ «ដោយមានភាពអង់អាចក្លាហាន និងកម្លាំងខ្លាំងក្លា ខ្ញុំសុំឲ្យអ្នកជឿលើខ្លួនអ្នកថា វ៉េណេស៊ុយអេឡា នឹងរួចផុតពីភាពងងឹតឈឹងបែបនេះ ហើយការដណ្តើមយកអំណាចជិតឈានដល់ទីបញ្ចប់ដែរ»។
_1.jpg)
លោក Guaido (កណ្តាល ក្រោម ) ថ្លែងនៅក្នុងអំឡុងការតវ៉ាកាលពីថ្ងៃទី ១២ ខែ មីនា។ AFP
លោករដ្ឋអាជ្ញា Tarek William Saab បានថ្លែងប្រាប់ក្រុមអ្នកកាសែតថា លោកនឹងដាក់លោក Guaido ក្រោម ការស៊ើបអង្កេតពីបទពាក់ព័ន្ធនៅក្នុងការបំផ្លាញប្រព័ន្ធអគ្គិសនីរបស់វ៉េណេស៊ុយអេឡា។
នេះ គឺជាកិច្ចប្រឹងប្រែងដំបូងរបស់រដ្ឋាភិបាលប្រឆាំងនឹងមេដឹកនាំបក្សប្រឆាំង លោក Guaido គាំទ្រដោយអាមេរិក ចាប់តាំងពីលោកវិលត្រឡប់ចូលវ៉េណេស៊ុយអេឡាកាលពីសប្តាហ៍មុន ក្រោយពីផ្គើននឹងបម្រាមធ្វើដំណើរទៅជួបមេដឹកនាំជាច្រើននៅអាមេរិកខាងត្បូងជាសម្ព័ន្ធមិត្ត។
លោក ម៉ាឌូរ៉ូ បានស្តីបន្ទោសការដាច់អគ្គិសនីជាច្រើនថ្ងៃដែលញាំញីវ៉េណេស៊ុយអេឡា ទៅលើក្រុងវ៉ាស៊ីនតោន និងបានប្រកាសជ័យជម្នះទៅលើអ្វីដែលលោកហៅថា សង្គ្រាមអគ្គិសនីបង្កឡើងដោយមន្ទីរបញ្ចកោណ៕ AFP/PSA
