.jpg)
ផ្សែងហុយទ្រលោមចេញពីទីប្រជុំជនឌូម៉ាត្រួតត្រាដោយក្រុមឧទ្ទាមនៅតំបន់ជាយក្រុងភាគខាងកើតទីក្រុងដាម៉ាស។ AFP
ក្រុងដាម៉ាស: សារព័ត៌មានរដ្ឋបានរាយការណ៍ឲ្យដឹងកាលពីថ្ងៃចន្ទថា ព្រលានយន្តហោះយោធានៅស៊ីរីបានរងការវាយប្រហារដោយកាំជ្រួចមីស៊ីលដ៏ធ្ងន់ធ្ងរមួយបន្ទាប់ពីអាមេរិក និងបារាំងបានព្រមានធ្វើការឆ្លើយតបដ៏ខ្លាំងក្លាទៅនឹង «ការវាយប្រហារដោយអាវុធគីមីដ៏គួរឲ្យរន្ធត់» មួយទៅលើតំបន់ត្រួតត្រាដោយក្រុមឧទ្ទាមនៅក្បែរទីក្រុងដាម៉ាស។
ក្រុងវ៉ាស៊ីនតោន បានធ្វើការបដិសេធចំពោះការបង្កការវាយប្រហារនោះទៅលើមូលដ្ឋានកងទ័ពអាកាសនៅ Tayfur ភាគកណ្តាលនៅស៊ីរី ដែលបានកើតឡើងរយៈពេលជាច្រើនម៉ោងមុនពេលបើកកិច្ចប្រជុំបន្ទាន់របស់អង្គការសហប្រជាជាតិ (UN) កាលពីថ្ងៃចន្ទជុំវិញបញ្ហាអំពីរបាយការណ៍ពាក់ព័ន្ធការប្រើប្រាស់ឧស្ម័នជាតិពុលលើទីប្រជុំជនឌូម៉ា។
សេតវិមានបានឲ្យដឹងកាលពីថ្ងៃអាទិត្យថា ប្រធានាធិបតីអាមេរិក លោកដូណាល់ ត្រាំ និងសមភាគីបារាំងគឺ លោក អេម៉ានុយអែល ម៉ាក្រុង បានសន្ទនាតាមទូរស័ព្ទ និងបានប្តេជ្ញា «ធ្វើការឆ្លើយតបដ៏ខ្លាំងក្លា» មួយទៅនឹងបទសង្ស័យធ្វើការវាយប្រហារដោយអាវុធគីមីដែលបានសម្លាប់មនុស្សរាប់សិបនាក់។
សេតវិមាន បានបន្ថែមទៀតថា របបប្រធានាធិបតីស៊ីរី លោក បាសារ អាល់អាសាដ ត្រូវតែមានការទទួលខុសត្រូវចំពោះការរំលោភបំពានសិទ្ធិមនុស្សដែលបានបង្កកើតមាននៅក្នុងទឹកដីស៊ីរី៕
