ក្រុងគូឡាឡាំពួៈ ក្រុមអាជ្ញាធរ បាននិយាយកាលពីថ្ងៃអង្គារថា មនុស្សរាប់សិបនាក់បានធ្លាក់ខ្លួនឈឺ ហើយសាលារៀនរាប់រយត្រូវបានបិទទ្វារនៅក្នុងប្រទេស ម៉ាឡេស៊ី ដោយសារផ្សែងពុល ដែលត្រូវបានគេជឿថាចេញមកពីរោងចក្រគីមីមួយ។
នេះ គឺជាឧប្បត្តិហេតុធ្ងន់ធ្ងរទី២ ដែលពាក់ព័ន្ធនឹងឧស្ម័នពុលនៅក្នុងសង្កាត់ Pasir Gudang នៅក្នុងរដ្ឋជោហ៊រភាគខាងត្បូងក្នុងរយៈពេល ៣ ខែ ក្រោយពីប្រជាជនរាប់ពាន់នាក់ បានធ្លាក់ខ្លួនឈឺកាលពីខែមីនា នៅពេលដែលកាកសំណល់ត្រូវបានចាក់ចូលក្នុងទន្លេមួយ និងបានបញ្ចេញផ្សែងពុលមកវិញ។
ពីដំបូង ក្រុមអ្នកស្រុកបានកត់សម្គាល់ឃើញថា ផ្សែងបានហើរពាសពេញតំបន់ឧស្សាហកម្មកាលពីចុងសប្តាហ៍មុន ហើយប្រជាជនជាច្រើននៅក្នុងនៅនោះ មានក្មេងសិស្សសាលា បានចាប់ផ្តើមក្អួតចង្អោរ និងពិបាកដកដង្ហើម។
យោងតាមទីភ្នាក់ងារព័ត៌មាន Bernama បានឲ្យដឹងថា រដ្ឋមន្ត្រីជាន់ខ្ពស់នៃរដ្ឋជោហ៊រ លោក Sahruddin Jamal បានថ្លែងថា រហូតមកទល់ពេលនេះ មនុស្ស ៧៥ នាក់ ត្រូវបានគេបញ្ជូនទៅមន្ទីរពេទ្យ ដើម្បីព្យាបាល។
ឥឡូវនេះ ក្រុមអាជ្ញាធរនៃប្រទេស ម៉ាឡេស៊ី បានបញ្ជាឲ្យបិទគ្រឹះស្ថានអប់រំ ៤៧៥ កន្លែង នៅក្នុងតំបន់នោះរហូតដល់ថ្ងៃព្រហស្បតិ៍ នៅក្នុងនោះមានវិទ្យាស្ថានឧត្តមសិក្សាចំនួន ៣ សាលារដ្ឋ ១១១ និងសាលាឯកជន ១៤ និងសាលាមត្តេយ្យចំនួន ៣៤៧ កន្លែង។
ឧប្បត្តិហេតុថ្មីនេះ មិនត្រូវបានគេជឿថាទាក់ទងនឹងលើកដំបូងទេ។
លោកនាយករដ្ឋមន្ត្រី ម៉ាហាធៀ ម៉ូហាម៉ាដ បានប្តេជ្ញាចាត់វិធានការប្រឆាំងនឹងអ្នកដែលទទួលខុសត្រូវ។
លោកបានថ្លែងថា មានរោងចក្រច្រើនហាក់ដូចជាមិនព្រួយបារម្ភអំពីសុវត្ថិភាព និងសុខភាពរបស់ប្រជាជនទាល់តែសោះ៕ AFP/PSA