.jpg)
លោក ហាស្សាន រូហានី កំពុងថ្លែងសុន្ទរកថានៅក្នុងកិច្ចប្រជុំមួយ ជាមួយប្រជាជន នៅក្នុងទីក្រុងតេអេរ៉ង់ កាលពីថ្ងៃទី ១៤ ខែមករា។ AFP
ក្រុងតេអេរ៉ង់៖ ប្រទេស អ៊ីរ៉ង់ កាលពីថ្ងៃអង្គារ បានប្រកាសអំពីការចាប់បាតុករលើកដំបូងរបស់ខ្លួន ជុំវិញឧប្បត្តិហេតុការបាញ់ទម្លាក់យន្តហោះដឹកអ្នកដំណើររបស់អ៊ុយក្រែន ១ គ្រឿង ខណៈក្រុមអ្នកតវ៉ាបានបញ្ចេញកំហឹងរបស់ពួកគេចំពោះគ្រោះមហន្តរាយកំហុសឆ្គងរបស់ប្រទេស អ៊ីរ៉ង់ រយៈពេល ៤ ថ្ងៃជាប់ៗគ្នា។
រយៈពេលជិត ២ សប្តាហហ៍ ក្រោយពីអាមេរិកបានសម្លាប់មេបញ្ជាការកំពូលរបស់អ៊ីរ៉ង់ នៅក្នុងប្រទេស អ៊ីរ៉ាក់ ភាពតានតឹងជាមួយប្រទេសមហាអំណាចលោកខាងលិច បានកើនឡើងបន្ថែមទៀត ខណៈក្រុមប្រទេសអឺរ៉ុបកាលពីថ្ងៃអង្គារ បានដំណើរការពិភាក្សាចោទប្រកាន់ក្រុងតេអេរ៉ង់ ពីបទខកខានមិនបានប្តេជ្ញាគោរព តាមកិច្ចព្រមព្រៀងនុយក្លេអ៊ែរឆ្នាំ ២០១៥ ដោយបានព្រមានអ៊ីរ៉ង់អំពី «ផលវិបាកផ្សេងៗ» មិនបានបញ្ជាក់ឲ្យដឹងជាមុននោះ។
យន្តហោះជើងហោះហើរអន្តរជាតិអ៊ុយក្រែន ត្រូវបានបាញ់ទម្លាក់ដោយមីស៊ីលរយៈពេលដ៏ខ្លី ក្រោយពីបានហោះឡើងកាលពីថ្ងៃពុធ ដោយបានបណ្តាលឲ្យក្រុមអ្នកដំណើរ និងយានិកទាំងអស់ ១៧៦ នាក់ ដែលជិះក្នុងយន្តហោះស្លាប់។
ប្រទេស អ៊ីរ៉ង់ បានតស៊ូដើម្បីទប់ស្កាត់បញ្ហា ជុំវិញការដោះស្រាយរបស់ខ្លួនអំពីគ្រោះមហន្តរាយធ្លាក់យន្តហោះ ក្រោយពីធ្វើការបដិសេធលើកដំបូង ចំពោះការអះអាងរបស់ប្រទេសលោកខាងលិចថា ខ្លួនបានបាញ់ទម្លាក់យន្តហោះដោយគ្រាប់មីស៊ីល នៅមុនពេលដែលខ្លួនបានទទួលស្គាល់កាលពីថ្ងៃសៅរ៍។
សោកនាដកម្មនោះ ត្រូវបានគេមើលឃើញថា មានក្រុមអ្នកតវ៉ាហិង្សារាប់រយនាក់ ពួកគេភាគច្រើនជាក្រុមនិស្សិតបានចេញតាមដងផ្លូវនានា ដោយបានបង្ហាញថា ពួកគេបានស្រែកពាក្យស្លោកប្រឆាំងសាធារណរដ្ឋនេះ។
រូបភាពវីដេអូថ្មីៗមួយចំនួន ដែលបានចែករំលែកនៅលើបណ្តាញប្រព័ន្ធផ្សព្វផ្សាយសង្គម បានអះអាងបង្ហាញអំពីការតវ៉ាថ្មីៗកាលពីរសៀលថ្ងៃអង្គារ នៅតាមសាកលវិទ្យាល័យមួយចំនួននៅក្នុងទីក្រុងតេអេរ៉ង់ រួមមានការប៉ះទង្គិចជាច្រើនលើករវាងក្រុមនិស្សិត និងជីវពលបាសិចស្មោះត្រង់ជាមួយក្រុមអ្នកកាន់អំណាច។
មិនអាចមានលទ្ធភាព ដើម្បីផ្ទៀងផ្ទាត់រូបភាពវីដេអូទាំងអស់នោះបានភ្លាមៗនោះទេ៕ AFP/SK
