ក្រុងយ៊ាំងហ្គោន៖ ប្រទេស មីយ៉ាន់ម៉ា បានអំពាវនាវសុំជំនួយបរិក្ខារពេទ្យ និងជំនួយផ្គត់ផ្គង់ផ្សេងៗពីសហគមន៍អន្តរជាតិ ខណៈប្រទេសនេះបង្កើនកិច្ចប្រឹងប្រែង ដើម្បីទប់ស្កាត់ការឆ្លងរាលដាលនៃជំងឺកូវីដ ១៩។
ក្រសួងការបរទេសកាលពីថ្ងៃសុក្រថ្លែងនៅក្នុងសេចក្តីថ្លែងការណ៍មួយទៅកាន់ស្ថានទូតបរទេសនានាថា ក្រៅពីបរិក្ខារ និងគ្រឿងផ្គត់ផ្គង់ផ្នែកពេទ្យនោះ ក្រសួងសុខាភិបាលត្រូវការឧបករណ៍តេស្តជំងឺកូវីដ ១៩ ជាច្រើនថែមទៀត ដើម្បីបង្កើនសមត្ថភាពស៊ើបអង្កេតរបស់ខ្លួន ក្នុងការតាមដានមនុស្សដែលត្រូវបានសង្ស័យថា មានជំងឺផ្លូវដង្ហើម ជាជំងឺដែលបានបណ្តាលឲ្យមនុស្សជិត ៦ ម៊ឺននាក់ស្លាប់ នៅក្នុងប្រទេសចំនួន ១៨១។
យោងតាមសេចក្តីថ្លែងការណ៍បានឲ្យដឹងថា៖ «ក្រសួងសូមសម្តែងការអរគុណយ៉ាងខ្ពង់ខ្ពស់បំផុត ប្រសិនបើស្ថានទូត និងកុងស៊ុលនានា និងការិយាល័យនានារបស់អង្គការសហប្រជាជាតិ និងក្រុមទីភ្នាក់ងារឯកទេសរបស់ខ្លួនប្រចាំនៅប្រទេស មីយ៉ាន់ម៉ា អាចកៀរគរម្ចាស់ជំនួយនៅក្នុងការផ្តល់បរិក្ខារ និងជំនួយផ្គត់ផ្គង់ផ្នែកពេទ្យដល់ប្រទេសនេះ»។
ប្រទេស មីយ៉ាន់ម៉ា បានកត់ត្រាករណីឆ្លងថ្មីចំនួន ២០ នាក់ចាប់តាំងពីខ្លួនបានរាយការណ៍អ្នកជំងឺកូវីដ ១៩ លើកទី ១ កាលពីថ្ងៃទី ២៣ ខែមីនា ដោយមានអ្នកស្លាប់ម្នាក់។
ក្រសួងនេះបានបញ្ជាក់ថា រដ្ឋាភិបាលនឹងប្រឹងប្រែងឲ្យអស់ពីសមត្ថភាព ដើម្បីទប់ស្កាត់វីរុសនេះមិនឲ្យឆ្លងនៅក្នុងនោះ មានការទប់ស្កាត់ប្រជាជនមិនឲ្យធ្វើដំណើរនៅក្នុងបុណ្យThingyan មាន រយៈពេល ១០ ថ្ងៃ ជាពិធីបុណ្យពិសេសបំផុតនៅក្នុងប្រទេសនេះ ដើម្បីផ្សព្វផ្សាយពីពិធីបុណ្យចូលឆ្នាំ នៅមីយ៉ាន់ម៉ាដែលចាប់ផ្តើមនៅថ្ងៃទី ១៧ ខែមេសា ក្នុងឆ្នាំនេះ។
លោកប្រធានាធិបតីមីយ៉ាន់ម៉ា យូវីន មីអ៊ីនធ៍ កាលពីថ្ងៃសៅរ៍ បានណែនាំឲ្យរដ្ឋាភិបាល និងរដ្ឋាភិបាលក្នុងតំបន់ទាំងអស់មិនឲ្យអនុញ្ញាតឲ្យមន្ត្រីរាជការ ធ្វើដំណើរទៅណាមកណានៅក្នុងអំឡុងពិធីបុណ្យចូលឆ្នាំ លើកលែងតែបុណ្យសព៕ My.Times/PSA