.jpg)
កាលពីថ្ងៃសៅរ៍ ទី ២៤ មេសា មេបញ្ជាការឥណ្ឌូនេស៊ី លោក Hadi Tjahjanto បានថ្លែងនៅក្នុងសន្និសីទកាសែតមួយថា៖ «កងនាវាចរណ៍បានរកឃើញមានការកំពប់ប្រេង និងផ្នែកខ្លះនៃវត្ថុដែលជាភ័ស្ដុតាង បញ្ជាក់ថា KRI Nanggala បានលិច»។ នេះបើយោងតាមសារព័ត៌មាន CNA ។
លោកឧត្តមនាវី Yudo Margono បាននិយាយថា ការស្គែន បានរកឃើញនាវាមុជទឹកនោះនៅជម្រៅ ៨៥០ ម៉ែត្រ។ នាវានោះអាចទប់ទល់នឹងជម្រៅទឹកបានត្រឹមតែ ៥០០ ម៉ែត្រប៉ុណ្ណោះ។
នាវាមុជទឹក KRI Nanggala 402 បានបាត់ខ្លួនកាលពីថ្ងៃទី ២១ មេសា ដោយមានមនុស្ស ៥៣ នាក់នៅលើនាវានោះ នៅពេលចូលរួមក្នុងសមយុទ្ធនៅភាគខាងជើងកោះបាលី។ នាវានោះបានបាត់ទំនាក់ទំនងនៅម៉ោង ៤ ទៀបភ្លឺ បន្ទាប់ពីបានសុំការអនុញ្ញាតនៅម៉ោង ៣ ព្រឹក។
ក្រសួងការពារជាតិឥណ្ឌូនេស៊ីបាននិយាយថា សមាជិកនាវិកសរុប ៤៩ នាក់ មេបញ្ជាការនាវាម្នាក់ និងអ្នកជំនាញខាងអាវុធ ៣ នាក់បានស្ថិតនៅក្នុងនាវាមុជទឹកនោះ។
យោធាសន្មតថា នាវាមុជទឹកបានដាច់ចរន្តអគ្គិសនី។ ក្នុងលក្ខខណ្ឌនោះ នាវាមុជទឹកអាចនឹងអស់អុកស៊ីហ្ស៊ែននៅម៉ោង ៣ ព្រឹកថ្ងៃទី ២៤ មេសា។ ប្រសិនបើគ្មានការដាច់ចរន្តអគ្គិសនីទេនោះ នាវានោះអាចផ្ទុកអុកស៊ីហ្ស៊ែនរយៈពេល ៥ ថ្ងៃ៕
