តំបន់បាហ្គូៈ កងកម្លាំងគាំទ្រដោយអាមេរិក បានថ្លែងកាលពីថ្ងៃពុធថា ក្រុមរដ្ឋអ៊ិស្លាមកំពុងរស់នៅ «ទីតាំងឈរជើងចុងក្រោយ» របស់ខ្លួន ក្រោយពីរងការវាយប្រហារយ៉ាងខ្លាំងក្លាទៅលើទឹកដីចុងក្រោយរបស់ខ្លួននៅស៊ីរីភាគខាងកើត បានធ្វើឲ្យយុទ្ធជនជីហាដ ៣ ពាន់នាក់ប្រគល់ខ្លួន។
យោងតាមកងកម្លាំងប្រជាធិបតេយ្យស៊ីរីដឹកនាំដោយឃើដ (SDF) បានឲ្យដឹងថា ក្រុមយុទ្ធជនសកម្មប្រយុទ្ធ IS ក្បាលរឹងដែលនៅតែក្រាញននៀលការពារតំបន់ទឹកដី «កាលិហ្វ» នៅសល់ចុងក្រោយរបស់ពួកគេនោះ បានធ្វើការវាយបកវិញជាមួយនឹងរលកនៃការបំផ្ទុះគ្រាប់បែកអត្តឃាត ជាបន្តបន្ទាប់។
ក្រុម IS ធ្លាប់បានគ្រប់គ្រងទឹកដីជាងរាប់លានគីឡូម៉ែត្រការ៉េនៅក្នុងទឹកដីស៊ីរី និងអ៊ីរ៉ាក់ ប៉ុន្តែបានបាត់បង់ទឹកដីនោះទាំងអស់ លើកលែងតែនៅតាមទន្លេមួយផ្នែកតូចនៅភូមិបាហ្គូ ក្បែរព្រំដែនប្រទេស អ៊ីរ៉ាក់ ប៉ុណ្ណោះ។
នៅក្នុងរយៈពេលប៉ុន្មានសប្តាហ៍ថ្មីៗនេះ មានបុរស និងស្ត្រីរាប់ពាន់នាក់ បានរត់ចេញពីទីតាំងឈរជើងចុងក្រោយដែលត្រូវបានឡោមព័ទ្ធដោយកងកម្លាំងគាំទ្រដោយឃើដ ដែលបានផ្អាកការវាយប្រហារជាទ្រង់ទ្រាយធំរបស់គេជាច្រើនដង ដើម្បីអនុញ្ញាតឲ្យប្រជាជនទាំងនោះ រត់ភៀសខ្លួនចេញពីទីនោះ។
ដោយបានគាំទ្រដោយការវាយប្រហារផ្លូវអាកាសរបស់ក្រុមចម្រុះដឹកនាំដោយអាមេរិកប្រឆាំងក្រុមជីហាដជ្រុលនិយមនោះ កងកម្លាំង SDF បន្តវាយប្រហារដោយកាំភ្លើងធំដើម្បីបង្ខំឲ្យយុទ្ធជន IS ជាច្រើននាក់ប្រគល់ខ្លួន៕ AFP