រដ្ឋមន្ត្រីការបរទេសសហរដ្ឋអាមេរិកលោក Mike Pompeo បានសម្រេចចិត្តនៅនាទីចុងក្រោយកាលពីថ្ងៃសុក្រ ទី ០២ ខែកញ្ញា ដោយលុបចោលផែនការដំណើរទស្សនកិច្ចទៅម៉ុងហ្គោលី និងកូរ៉េខាងត្បូង។ ការលុបចោលទស្សនកិច្ចធ្វើឡើងក្រោយពីប្រធានាធិបតីសហរដ្ឋអាមេរិកលោក Donald Trump និងមន្ត្រីសេតវិមានមួយចំនួនបានឆ្លងជំងឺកូវីដ ១៩។
យ៉ាងណាក៏ដោយ ថ្វីដ្បិតលុបចោលទស្សនកិច្ចទៅម៉ុងហ្គោលី និងកូរ៉េខាងត្បូង តែលោក Pompeo មិនបានលុបចោលទស្សនកិច្ចទៅក្រុងតូក្យូឡើយ។ កាលពីថ្ងៃអង្គារ ទី ៦ តុលា លោកបានចូលរួមកិច្ចប្រជុំនៃវេទិកាយុទ្ធសាស្ត្រ Quad ជាមួយប្រទេសជប៉ុន ឥណ្ឌា និងអូស្ត្រាលី។ អ្នកការទូតជាន់ខ្ពស់រូបនេះ បានយកឱកាសនៃការប្រជុំ ដើម្បីវាយប្រហារប្រទេសចិន ហើយបានអំពាវនាវឱ្យសមាជិកទាំង ៤ សហការគ្នាដើម្បីប្រឆាំងអំពើ «កេងប្រវ័ញ្ចពុករលួយ និងបង្ខិតបង្ខំ» របស់ប្រទេសចិន នៅក្នុងតំបន់សមុទ្រចិនខាងត្បូង សមុទ្រចិនខាងកើត ទន្លេមេគង្គជួរភ្នំហិមាល័យ និងច្រកសមុទ្រតៃវ៉ាន់។
ពាក់ព័ន្ធនឹងការលុបចោលទស្សនកិច្ចទៅម៉ុងហ្គោលី និងកូរ៉េខាងត្បូងវិញ អ្នកវិភាគមួយចំនួនយល់ថា លោក Pompeo បានធ្វើឱ្យខកខានឱកាសដើម្បីទាញយកផលចំណេញពីព្រឹត្តិការណ៍មួយចំនួនដែលកំពុងកើតឡើងនៅម៉ុងហ្គោលី និងកូរ៉េខាងត្បូង។
ជាក់ស្តែងនៅប្រទេសម៉ុងហ្គោលី ឥរិយាបថប្រឆាំងចិនបានកើនឡើងជាបន្តបន្ទាប់ ក្រោយពីចិនចាប់ផ្ដើមបំបាត់ការអប់រំជាភាសាម៉ុងហ្គោលនៅក្នុងប្រទេសចិន គ្រាដែលតំបន់ម៉ុងហ្គោលខាងក្នុង គឺជាតំបន់ស្វយ័តមួយក្នុងដែនដីចិន និងមានប្រជាជនភាគច្រើនជាជនជាតិម៉ុងហ្គោល។
កាលពីដើមខែមុនរដ្ឋាភិបាលចិនបានចាប់ផ្ដើមកែប្រែ ការអប់រំក្នុងតំបន់នេះ ឱ្យឈប់ប្រើភាសាម៉ុងហ្គោលទៅប្រើភាសាចិនវិញ។ សកម្មភាពនេះបានធ្វើឱ្យប្រជាជនប្រទេសម៉ុងហ្គោលី ប្រតិកម្ម និងបានដាក់សម្ពាធទៅរដ្ឋាភិបាលរបស់ពួកគេឱ្យចាត់វិធានការតបតវិញ។
ប្រតិកម្មរបស់ប្រជាជនម៉ុងហ្គោលីក៏បានស្តែងចេញផងដែរ នៅក្នុងដំណើរទស្សនកិច្ចរបស់រដ្ឋមន្ត្រីការបរទេសចិនលោក Wang Yi កាលពីខែមុន។ គ្រាន់តែលោកទៅដល់រដ្ឋធានីអ៊ូឡង់បាទ័រ នៃប្រទេសម៉ុងហ្គោលី ក្រុមបាតុករបានស្វាគមន៍លោកដោយសម្រែកថា៖ «Wang Yi ចេញឱ្យឆ្ងាយ»។
ទស្សនាវដ្ដី The Diplomat បានលើកឡើងថា សហរដ្ឋអាមេរិកមានឱកាសទទួលការគាំទ្រពីប្រជាជនម៉ុងហ្គោលតាមរយៈការធ្វើអត្ថាធិប្បាយអំពីការគាបសង្កត់ជនជាតិម៉ុងហ្គោលីនៅក្នុងប្រទេសចិន ជាសារមួយបន្ទរដោយមន្ត្រីការបរទេសអាមេរិកលោក David Stilwel ដោយលោកបាននិយាយអំពីកិច្ចខិតខំប្រឹងប្រែងរបស់សហរដ្ឋអាមេរិក ដើម្បី «ជួយអភិរក្សបេតិកភណ្ឌវប្បធម៌របស់ប្រទេសម៉ុងហ្គោលី»។
រីឯនៅឧបទ្វីបកូរ៉េវិញ កូរ៉េខាងជើងនឹងប្រារព្ធខួបលើកទី៧៥ នៃគណបក្សកាន់អំណាចរបស់ខ្លួននៅថ្ងៃទី ១០ ខែតុលា ខាងមុខនេះ។ ទីក្រុងព្យុងយ៉ាងត្រូវបានគេរំពឹងថា នឹងបង្ហាញពីបច្ចេកវិទ្យាយោធាថ្មីៗ។ វត្តមានរបស់លោក Pompeo នៅទីក្រុងសេអ៊ូលតែប៉ុន្មានថ្ងៃមុនការប្រារព្ធខួបនេះ អាចនឹងបង្ហាញភាពរឹងមាំនៃសាមគ្គីភាពរវាងអាមេរិក និងប្រទេសកូរ៉េខាងត្បូង។
យ៉ាងណាមិញ ដំណើរទស្សនកិច្ចរបស់លោក Pompeo ទៅកាន់ប្រទេសម៉ុងហ្គោលី និងកូរ៉េខាងត្បូង ត្រូវបានរើកាលវិភាគទៅចុងខែនេះវិញ។
ជាការកត់សម្គាល់ដំណើរទស្សនកិច្ចដែលបានគ្រោងទុកទាំងនេះត្រូវបានគេមើលឃើញថា ជាវិធីមួយសម្រាប់សហរដ្ឋអាមេរិកពង្រឹងឥរិយាបថប្រឆាំងចិនក្នុងតំបន់អាស៊ីបូព៌ា ដោយប្រព្រឹត្តទៅ ១ ខែក្រោយ លោក Wang Yi ធ្វើទស្សនកិច្ចទៅរុស្ស៊ី កាហ្សាក់ស្ថាន កៀហ្ស៊ីស៊ីស្ថាន និងម៉ុងហ្គោលី។
លោក Wang Yi នឹងធ្វើទស្សនកិច្ចនៅប្រទេសជប៉ុន ចុងខែនេះ ហើយត្រូវគេគិតថានឹងជួបជាមួយនាយករដ្ឋមន្ត្រីថ្មីលោក Yoshihide Suga។
ភាគីទាំង ២ ត្រូវបានគេរំពឹងទុកថា នឹងបញ្ជាក់ជាថ្មីពីសារៈសំខាន់នៃការរក្សាទំនាក់ទំនងទ្វេភាគី និងពិភាក្សាអំពីប្រធានបទដូចជាកោះសេនកាគូ និងច្បាប់សន្តិសុខថ្មីរបស់ហុងកុង។
ជាមួយគ្នានេះលោក Wang Yi ក៏នឹងធ្វើទស្សនកិច្ចនៅប្រទេសកម្ពុជា ម៉ាឡេស៊ី ឡាវ និងថៃ ពីថ្ងៃទី ១១ ដល់ ១៥ ខែតុលា។
គួរបញ្ជាក់ថា ដំណើរទស្សនកិច្ចរបស់រដ្ឋមន្ត្រីការបរទេសរបស់មហាអំណាចទាំង ២ នេះ គឺបានធ្វើឡើងនៅពេលដែលភាពតានតឹងបានកើនឡើងលើបញ្ហាជាច្រើនដូចជា កូវីដ ១៩ ពាណិជ្ជកម្ម នយោបាយជាដើម៕