.jpg)
លោកហ្គុយតឺរេស (កណ្តាល) មកដល់ដើម្បីចូលរួមសន្និសីទស្តីពីការប្រែប្រួលអាកាសធាតុនៅក្រុងម៉ា្រឌីដ។ AFP
ក្រុងម៉ាឌ្រីដ៖ អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស បានព្រមានកាលពីថ្ងៃអាទិត្យនៅមុនសន្និសីទសំខាន់ស្តីពីអាកាសធាតុថា ផលប៉ះពាល់យ៉ាងខ្លាំងនៃកម្តៅភពផែនដីដែលគំរាមកំហែងមនុស្សជាតិ គឺជាការរុញច្រានពីធម្មជាតិដែលត្រូវរងការវាយប្រហារពីមនុស្សនោះ។
លោកបានថ្លែងថា៖ «អស់រយៈពេលជាច្រើនទសវត្សរ៍ហើយដែលមនុស្សជាតិបានធ្វើសង្គ្រាមជាមួយនឹងភពផែនដី ហើយបច្ចុប្បន្ននេះ ភពផែនដីនេះ កំពុងវាយបកមកវិញ ដោយធ្វើឲ្យប៉ះពាល់ដល់កិច្ចប្រឹងប្រែងមិនគ្រប់គ្រាន់របស់ក្រុមប្រទេសមហាអំណាចសេដ្ឋកិច្ចរបស់ពិភពលោក ដើម្បីទប់ស្កាត់ការបំពុលដោយឧស្ម័នកាបូន»។
លោកថា៖ «យើងបានប្រឈមនឹងវិបត្តិអាកាសធាតុពិភពលោក និងចំណុចគ្មានការវិលត្រឡប់មករកភាពដើមនោះ គឺលែងមានលទ្ធភាពតទៅទៀតហើយ។ យើងអាចមើលឃើញ វាកំពុងបង្កមហន្តរាយចំពោះយើងទាំងអស់គ្នា»។
លោក ហ្គុយតឺរេស បានបង្ហាញរបាយការណ៍របស់ UN ដែលត្រូវចេញផ្សាយនៅថ្ងៃអង្គារនេះ ដោយបានអះអាងថា រយៈពេល ៥ ឆ្នាំចុងក្រោយនេះ ក្តៅបំផុតបើតាមរបាយការណ៍នោះ ដោយឆ្នាំ ២០១៩ ទំនងជាក្តៅបំផុតទី ២ ដែលមិនធ្លាប់មានពីមុនមក។
លោកបានថ្លែងនៅមុនកិច្ចពិភាក្សាអំពីការប្រែប្រួលអាកាសធាតុ COP25 ដែលមានប្រទេស ១៩៦ ចូលរួមនៅក្នុងក្រុងម៉ា្រឌីដ ថា៖ «មហន្តរាយទាក់ទងនឹងអាកាសធាតុកើតឡើងជាញឹកញាប់ បណ្តាលឲ្យមនុស្សស្លាប់ច្រើន និងកាន់តែបំផ្លិចបំផ្លាញ»។
លោកបានបន្ថែមថា សុខភាពរបស់មនុស្ស និងសន្តិសុខស្បៀងប្រឈមនឹងភាពគ្រោះថ្នាក់ ដោយបានបញ្ជាក់ថា ការបំពុលបរិយាកាសទាក់ទងជាមួយការប្រែប្រួលអាកាសធាតុនាំឲ្យមនុស្សស្លាប់ ៧ លាននាក់ ជារៀងរាល់ឆ្នាំ។
កិច្ចព្រមព្រៀងក្រុងប៉ារីស អំពាវនាវឲ្យកាត់បន្ថយកម្តៅនៅលើភពផែនដីនៅក្រោម ២ អង្សារសេ ប៉ុន្តែអ្នកវិទ្យាសាស្ត្រនាពេលថ្មីៗនេះ បានបញ្ជាក់ច្បាស់ថា គោលបំណងជំរុញរបស់កិច្ចព្រមព្រៀងត្រឹម ១,៥ អង្សារសេ គឺជាការកំណត់ថាមានសុវត្ថិភាពច្រើនជាង។
របាយការណ៍របស់កម្មវិធីបរិស្ថានអង្គការសហប្រជាជាតិកាលពីសប្តាហ៍មុន បានសន្និដ្ឋានថា ការបញ្ចេញឧស្ម័នកាបូន នឹងត្រូវការធ្វើឲ្យថយចុះត្រឹម ៧,៦ ភាគរយ ក្នុង ១ ឆ្នាំ នៅទសវត្សរ៍ក្រោយ ដើម្បីឲ្យស្ថិតនៅក្នុងការកំណត់មួយ។
លោកអគ្គលេខាធិការអង្គការសហប្រជាជាតិបញ្ជាក់ថា គោលបំណងត្រឹម ១,៥ អង្សារសេនេះ អាចធ្វើបាន៕ AFP/PSA
