កាលពីថ្ងៃពុធ ទី៩ ធ្នូ និយតករចក្រភពអង់គ្លេសបានណែនាំជនដែលមានប្រវត្តិអាល្លែកហ្ស៊ីធ្ងន់ធ្ងរមិនឱ្យចាក់វ៉ាក់សាំង Covid-19 ផលិតដោយក្រុមហ៊ុន Pfizer និង BioNTech ក្រោយពីបុគ្គលិកសុខាភិបាល ២ រូប បានរាយការណ៍ថា ពួកគេបានចេញរោគសញ្ញាប្រតិកម្មអាល្លែកហ្ស៊ី បន្ទាប់ពីបានទទួលវ៉ាក់សាំងមុន ១ ថ្ងៃ។
លោក Stephan Powis នាយកផ្នែកវេជ្ជសាស្ត្រនៃសេវាសុខាភិបាលជាតិអង់គ្លេស (NHS) បាននិយាយថា៖ «ជាធម្មតាក្នុងវ៉ាក់សាំងថ្មី ភ្នាក់ងារនិយតកម្មឱសថ និងផលិតផលថែទាំសុខភាព (MHRA) បានណែនាំដោយប្រុងប្រយ័ត្នជាមុនថា អ្នកដែលមានប្រវត្តិអាល្លែកហ្ស៊ីធ្ងន់ធ្ងរមិនឱ្យចាក់វ៉ាក់សាំងនេះទេ បន្ទាប់ពីមនុស្ស ២ នាក់ ដែលមានប្រវត្តិអាល្លែកហ្ស៊ីធ្ងន់ធ្ងរបានប្រតិកម្មមិនល្អកាលពីម្សិលមិញ»។
បុគ្គលិកទាំង ២ រូបនេះបានរងប្រតិកម្មអាល្លែកហ្ស៊ីប្រភេទអាណាហ្វីឡាក់តូអ៊ីត (anaphylactoid reaction) ដែលមានរោគសញ្ញាទូទៅដូចជាកន្ទួលលើស្បែកការពិបាកដកដង្ហើម និងតាមពេលមានការធ្លាក់សម្ពាធឈាម ហើយបើមិនមានការព្យាបាលអាចឈានដល់ការបាត់បង់ជីវិតផងដែរ។ អ្នកទាំង ២ បានទទួលការព្យាបាលហើយឥឡូវពួកគេបានធូរស្បើយ។
ការណែនាំរបស់ MHRA គឺអនុវត្តទៅលើបុគ្គលណាដែលធ្លាប់ប្រតិកម្មទៅនឹងវ៉ាក់សាំងឱសថ ឬម្ហូបអាហារណាមួយ ធ្លាប់មានប្រវត្តិប្រតិកម្មអាណាហ្វីឡាក់តូអ៊ីត ឬត្រូវបានវេជ្ជបណ្ឌិតណែនាំឱ្យយកថ្នាំ Adrenaline តាមខ្លួនជានិច្ច។ MHRA ក៏បានបញ្ជាក់ថា ការចាក់វ៉ាក់សាំងត្រូវតែធ្វើនៅកន្លែងដែលមានឧបករណ៍ជួយសង្គ្រោះ។
គួរបញ្ជាក់ផងដែរថា ប្រតិ កម្មនេះ គឺផ្សេងពីប្រតិកម្មប្រភេទអាណាហ្វីឡាក់ទិក (anaphylactic reaction) ត្រង់ចំណុចថា ប្រតិកម្មអាណាហ្វីឡាក់ទិក គឺជាប្រតិកម្មហួសហេតុនៃប្រព័ន្ធភាពស៊ាំរបស់រាងកាយ ហើយប្រតិកម្មអាណាហ្វីឡាក់តូអ៊ីត គឺមិនទាក់ទងនឹងប្រព័ន្ធភាពស៊ាំទេ តែប្រតិកម្មទាំង ២ នេះ គឺមានរោគសញ្ញាដូចគ្នា។
ករណីអាល្លែកហ្ស៊ីទាំង ២ គឺស្ថិតក្រោមការស៊ើបអង្កេតដោយអ្នកនាំពាក្យ MHRA ១ រូបបាននិយាយថា៖ «យើងកំពុងស៊ើបអង្កេតយ៉ាងពេញលេញចំពោះរបាយការណ៍ទាំង ២ ដែលត្រូវបានរាយការណ៍មកយើងដែលជាបញ្ហាអាទិភាព»។
អ្នកនាំពាក្យបានបន្តទៀតថា៖ «នៅពេលដែលព័ត៌មានទាំងអស់ត្រូវបានពិនិត្យយើងនឹងចេញផ្សាយការណែនាំថ្មី»។
ក្រុមហ៊ុន Pfizer និង BioNTech បានឱ្យដឹងថា ពួកគេគាំទ្រការស៊ើបអង្កេតនេះដោយសរសេរក្នុងសេចក្ដីថ្លែងការណ៍មួយថា៖ «ក្នុងវិធានការប្រុងប្រយ័ត្នជាមុន MHRA បានចេញសេចក្ដីណែនាំបណ្ដោះអាសន្នដល់ NHS ខណៈពេលដែលពួកគេកំពុងធ្វើការស៊ើបអង្កេតដើម្បីស្វែងយល់ឱ្យបានពេញលេញអំពីករណីនីមួយៗ និងមូលហេតុបង្ក។ Pfizer និង BioNTech កំពុងគាំទ្រ MHRAក្នុងការស៊ើបអង្កេត»។
Pfizer និង BioNTech បានបន្តទៀតថា៖ «នៅក្នុងការសាកល្បងដំណាក់កាលសំខាន់ទី៣ វ៉ាក់សាំងនេះជាទូទៅត្រូវបានទទួលដោយគ្មានការព្រួយបារម្ភធ្ងន់ធ្ងរអំពីសុវត្ថិភាពដែលត្រូវបានរាយការណ៍ដោយគណៈកម្មាធិការត្រួតពិនិត្យទិន្នន័យឯករាជ្យ។ ការសាកល្បងនេះមានអ្នកចូលរួមជាង ៤៤ ០០០ នាក់ ហើយមកដល់ពេលនេះមានអ្នកចូលរួមច្រើនជាង ៤២ ០០០ នាក់ បានចាក់វ៉ាក់សាំងដូសទី ២»។
ក្នុងឯកសាររបស់រដ្ឋបាលម្ហូបអាហារ និងឱសថអាមេរិក (FDA) បញ្ចេញកាលពីថ្ងៃអង្គារ ទី ៨ បានបង្ហាញថា ទិន្នន័យការសាកល្បងរបស់ Pfizer និង BioNTech បានឱ្យឃើញថា កម្រិតប្រតិកម្មអាល្លែកហ្ស៊ីក្នុងចំណោមក្រុមទទួលវ៉ាក់សាំង គឺខ្ពស់ជាងក្រុមប្រើ Placebo បន្តិចដោយ ០,៦៣% ក្នុងក្រុមវ៉ាក់សាំងធៀបនឹង ០,៥១% ក្នុងក្រុម Placebo។
តែនៅក្នុងឯកសារស្ដីពីវិធីសាស្ត្រការសាកល្បងរបស់ Pfizer បានបង្ហាញថា បុគ្គលដែលមានប្រវត្តិអាល្លែកហ្ស៊ីធ្ងន់ធ្ងរ (ធ្លាប់ប្រតិកម្មអាណាហ្វីឡាក់តូអ៊ីត ឬអាណាហ្វីឡាក់ទិក) គឺមិនបានអនុញ្ញាតឱ្យចូលរួមការសាកល្បងនេះទេ។
គណៈកម្មាធិការពិគ្រោះយោបល់របស់ FDA បានធ្វើការជួបប្រជុំនៅថ្ងៃព្រហស្បតិ៍ ទី ១០ ដើម្បីពិភាក្សាថា តើគួរអនុញ្ញាតឱ្យប្រើប្រាស់វ៉ាក់សាំងនេះជាបន្ទាន់ដែរឬទេ? ហើយអ្នកវិភាគមួយចំនួនគិតថា គណៈកម្មាធិការ និងពិភាក្សាលើបញ្ហាអាល្លែកហ្ស៊ីនេះ។
យ៉ាងណាមិញចក្រភពអង់គ្លេសបានអនុញ្ញាតឱ្យប្រើប្រាស់វ៉ាក់សាំងនេះ កាលពីថ្ងៃទី ២ ធ្នូ ដោយចាប់ចាក់នៅថ្ងៃអង្គារ ទី ៨។ លើកលែងតែជនដែលមានប្រវត្តិអាល្លែកហ្ស៊ីធ្ងន់ធ្ងរការចាក់វ៉ាក់សាំង គឺនៅបន្តក្នុងមន្ទីរពេទ្យទូទាំងប្រទេសដែលមកដល់ពេលនេះបានផ្ដល់ជូនដល់ក្រុមវេជ្ជបណ្ឌិតជំងឺទូទៅ។គេរំពឹងថា ការផ្ដល់វ៉ាក់សាំងដូសទី២ នឹងចាប់ផ្ដើមនៅថ្ងៃទី ២៩ ខែធ្នូ៕