កាលពីថ្ងៃទី ២៧ វិច្ឆិកា លោក Carter Page អតីតទីប្រឹក្សាឃោសនាយុទ្ធនាការ Trump បានដាក់ពាក្យបណ្ដឹងទាមទារសំណង ៧៥ លានដុល្លារ ពីក្រសួងយុត្ដិធម៌ និងការិយាល័យសហព័ន្ធស៊ើបអង្កេតអាមេរិក (FBI) ទាក់ទិននឹងការដាក់ឧបករណ៍ឃ្លាំមើលខុសច្បាប់។
ពាក្យបណ្តឹងសំដៅស្វែងរកការបន្ធូរបន្ថយចំពោះ «ការរំលោភបំពានជាច្រើនប្រភេទ» នៃ «សិទ្ធិរដ្ឋធម្មនុញ្ញ និងសិទ្ធិស្របច្បាប់ដទៃទៀត របស់លោក Page ទាក់ទិននឹងការឃ្លាំមើល និងស៊ើបអង្កេតខុសច្បាប់របស់រដ្ឋាភិបាលអាមេរិកទៅលើរូបលោក»។
លោក Page បានអះអាងថា FBI កំណត់គោលដៅលោក ដោយសារតែលោកធ្វើការងារជាមួយយុទ្ធនាការឃោសនាបោះឆ្នោតរបស់លោក Trump កាលពីឆ្នាំ ២០១៦។ បណ្តឹងនេះ បានលើកឡើងទៀតថា ដីកាចំនួន ៤ ដែលអនុញ្ញាតឱ្យស៊ើបអង្កេតតាមអេឡិចត្រូនិកពីលោក គឺជា «ឯកសារមិនពិត និងបំភាន់»។
កាលពីដើមឆ្នាំនេះ ក្រសួងយុត្តិធម៌បានទទួលស្គាល់ថា ក្រសួងមិនមានមូលហេតុគ្រប់គ្រាន់ក្នុងការបន្តតាមដានខ្សែទូរស័ព្ទរបស់ Page ទៀតទេ ដែលការស៊ើបអង្កេតនេះ ដើមឡើយ គឺជាការស៊ើបអង្កេតមួយដែលជឿជាក់ថា ការបោះឆ្នោតឆ្នាំ ២០១៦ មានការលូកដៃពីសំណាក់រុស្ស៊ី។ ក្រសួងក៏បានរកឃើញថា យ៉ាងហោចណាស់មានដីកា ២ ក្នុងចំណោមដីកាទាំង ៤ ដែលធ្វើឡើងចំពោះលោក Page គឺជាដីកាដែលខ្វះ «មូលហេតុច្បាស់លាស់» ដើម្បីគាំទ្រការចោទប្រកាន់ថា លោក Page ជាភ្នាក់ងារធ្វើការឱ្យរុស្ស៊ី។
របាយការណ៍ចេញឆ្នាំមុន ដោយ លោកMichae Horowitz នៃអគ្គនាយកដ្ឋានយុត្តិធម៌បានរកឃើញភាពមិនត្រឹមត្រូវជាច្រើនករណីនៅក្នុងដីកាសុំឃ្លាំមើល ដោយនិយាយបំផ្លើសអំពីការចោទប្រកាន់ ដើម្បីបានឃ្លាំមើលលោក Page។ ទោះបីជាមានភាពមិនត្រឹមត្រូវដែលត្រូវបានរកឃើញក៏ដោយ លោក Horowitz បានប្តេជ្ញាថា FBI នៅតែមានសិទ្ធិក្នុងការបើកការស៊ើបអង្កេតរបស់ខ្លួនលើកិច្ចការជ្រៀតជ្រែករបស់ប្រទេសរុស្ស៊ី។
លោក Page បានចោទប្រកាន់ FBI ថា ការចោទប្រកាន់ គឺពឹងផ្អែកព័ត៌មាន និងឯកសារទាំងស្រុងពីលោក Christopher Steele អតីតចារកម្មរបស់អង់គ្លេស។
ពាក្យបណ្តឹងនោះបានបញ្ជាក់ថា FBI បានពឹងផ្អែកលើការអះអាងរបស់លោក Steele ទាំងដែលលោក «ជាបុគ្គលដែលត្រូវបានគណបក្សប្រជាធិបតេយ្យ និងយុទ្ធនាការឃោសនាបោះឆ្នោតរបស់អ្នកស្រី Hillary Clinton ជាអ្នកជួល» ដើម្បីស្រាវជ្រាវ និងជីកកកាយរឿងអាក្រក់ៗ ពីខាងគណបក្សប្រឆាំង គឺទំនាក់ទំនងនៃយុទ្ធនាការ Trump និងរុស្ស៊ី ដើម្បីបង្វែរការចាប់អារម្មណ៍ពីការស៊ើបអង្កេតអ៊ីមែលរបស់អ្នកស្រី Clinton ខណៈពេលដែលអ្នកស្រីនៅជារដ្ឋលេខាធិការនៅឡើយ។
បណ្តឹងរបស់ Page បានចោទប្រកាន់ FBIទៀតថា FBI បានបដិសេធទំនាក់ទំនងរបស់លោក ជាមួយភ្នាក់ងារស៊ើបការណ៍សម្ងាត់ (CIA) មុននឹងទទួលបានដីកា។ លោក Page គឺជាអ្នក «ទំនាក់ទំនងប្រតិបត្ដិការ» ចន្លោះឆ្នាំ ២០០៨ និង ២០១៣ ដោយជួយ CIA ក្នុងការប្រយុទ្ធប្រឆាំងនឹងសកម្មភាពផ្សេងៗធ្វើឡើងដោយប្រទេសរុស្ស៊ី និងប្រទេសដទៃទៀត ដើម្បីប្រឆាំងនឹងសហរដ្ឋអាមេរិក»។
កាលពីខែសីហា អតីតមេធាវីរបស់ FBI លោក Kevin Clinesmith ត្រូវបានតុលាការរកឃើញ និងកាត់ទោសពីបទក្លែងបន្លំអ៊ីមែលរបស់រដ្ឋាភិបាល ដោយនិយាយថា លោក Page មិនមែនជាភ្នាក់ងារសហការគ្នាជាមួយ CIA ទេ។
ក្រៅពីក្រសួងយុត្តិធម៌ និង FBI លោក Page ក៏បានប្ដឹងអតីតនាយក FBI លោក James Comey អតីតអនុប្រធាន FBI លោក Andrew McCabe លោក Clinesmith និងមន្ត្រីផ្សេងទៀតផងដែរ។
ទោះបីជាមានករណីចេញដីកាខុសច្បាប់ក៏ដោយ ការតាមដានលោក Page (ដែលជាបុគ្គលមិនដែលជាប់ចោទពីបទអ្វីសោះ) ត្រូវបានគេចាត់ទុកថា ជាប្រភពតូចបំផុតនៃការស៊ើបអង្កេតទូទៅលើទំនាក់ទំនងរវាងយុទ្ធនាការ Trump និងប្រទេសរុស្ស៊ី។
របាយការណ៍ដដែលបានបង្ហាញពីបញ្ហាលម្អិតនៅក្នុងការដាក់ដីកា ក៏បានសន្និដ្ឋានថា FBI គឺមានមូលដ្ឋានស្របច្បាប់សម្រាប់បើកការស៊ើបអង្កេតរុស្ស៊ី ហើយក៏មិនមានភ័ស្តុតាងណាដែលបានបង្ហាញថា សកម្មភាពរបស់អង្គភាព FBI ជាការលម្អៀងនយោបាយខាងណានោះឡើយ៕