.jpg)
លោក Salvador Cienfuegos អតីតរដ្ឋមន្ត្រីការពារជាតិម៉ិកស៊ិក ដែលត្រូវសហរដ្ឋអាមេរិកចាប់ខ្លួនពីបទជួញដូរគ្រឿងញៀន។ រូបថត AFP
អតីតរដ្ឋមន្ត្រីក្រសួងការពារជាតិម៉ិកស៊ិក ត្រូវបានអាជ្ញាធរសហរដ្ឋអាមេរិកចាប់ខ្លួន។ ការចាប់ខ្លួននេះកើតឡើងកាលពីយប់ថ្ងៃព្រហស្បតិ៍ ទី ១៦ តុលា នៅពេលលោកធ្វើដំណើរទៅដល់អាកាសយានដ្ឋានអន្តរជាតិ ទីក្រុងឡូសអេនជឺលេស រដ្ឋកាលីហ្វ័រនីញ៉ា។
យោងតាមរដ្ឋអាជ្ញាអាមេរិកប្រចាំនៅទីក្រុងញូវយ៉កបានឱ្យដឹងថា នាយឧត្ដមសេនីយ៍ Salvador Cienfuegos ដែលមានតួនាទីជារដ្ឋមន្ត្រីការពារជាតិម៉ិកស៊ិក ពីឆ្នាំ ២០១២ ដល់ឆ្នាំ ២០១៨ ត្រូវបានចាប់ខ្លួនតាមការស្នើសុំរបស់រដ្ឋបាលប្រឆាំងការជួញដូរគ្រឿងញៀន (DEA)។ លោក Cienfuegos ត្រូវប្រឈមនឹងការចោទប្រកាន់ពីបទឃុបឃិតចែកចាយគ្រឿងញៀនទៅកាន់សហរដ្ឋអាមេរិក និងពីបទលាងលុយកខ្វក់នៅក្នុងដែនដីអាមេរិក បទល្មើសទាំង ២ នេះបានកើតឡើងនៅអំឡុងខែធ្នូ ឆ្នាំ ២០១៥ និងខែ មករា ឆ្នាំ ២០១៧។ លោក Cienfuegos អាចជាប់ពន្ធនាគាររហូតដល់ ៣០ ឆ្នាំ ប្រសិនជាតុលាការរកឃើញថា លោកពិតជាបានប្រព្រឹត្តបទល្មើសទាំងនេះមែន។
ក្នុងពាក្យបណ្ដឹងបញ្ជូនទៅតុលាការរដ្ឋអាជ្ញាបានសរសេរថា៖ «ជាថ្នូរនឹងការបង់ប្រាក់សំណូក គាត់ (លោក Cienfuegos) បានអនុញ្ញាតឱ្យក្រុមជួញដូរគ្រឿងញៀន H-2 ដែលជាក្រុម ១ តែងតែប្រព្រឹត្តអំពើហិង្សារួមមានទាំងការធ្វើទារុណកម្ម និងឃាតកម្ម អាចធ្វើសកម្មភាពដោយមិនចាំបាច់ខ្លាចការចាប់ខ្លួន»។
ឯកសារពាក្យបណ្ដឹងក៏បានលើកឡើងនូវភ័ស្តុតាងប្រមូលបានពីការឃ្លាំមើល ទំនាក់ទំនងតាមប្រព័ន្ធអេឡិចត្រូនិកដែលបង្ហាញថា លោក Cienfuegos បានណែនាំក្រុម H-2 ឱ្យស្គាល់មន្ត្រីពុករលួយផ្សេងទៀត និងបានបញ្ចេញអត្តសញ្ញាណរបស់សាក្សីមួយចំនួន ជាហេតុនាំឱ្យមានការសម្លាប់សាក្សីទាំងនោះទៀតផង។
លោក Cienfuegos នឹងបង្ហាញខ្លួនជាលើកដំបូងចំពោះមុខតុលាការ តាមរយៈការទំនាក់ទំនងតាមវីដេអូ នៅល្ងាចថ្ងៃសុក្រ ទី ១៧ តុលា ហើយបន្ទាប់មក លោកនឹងត្រូវបញ្ជូនទៅទីក្រុងញូវយ៉ក ជាទីកន្លែងផ្ដើមការស៊ើបអង្កេត។
ការចាប់ខ្លួនលោក Cienfuegos បានធ្វើឱ្យមានការសង្ស័យ លើសុចរិតភាពរបស់កងយោធាម៉ិកស៊ិកនៅក្នុងសង្គ្រាមកម្ចាត់ក្រុមជួញដូរគ្រឿងញៀន។ កាលពីមុនកងយោធា ម៉ិកស៊ិកត្រូវបានប្រជាជន និងដៃគូអន្តរជាតិចាត់ទុកថា ជាស្ថាប័នរដ្ឋាភិបាលតែ ១ គត់ ដែលមិនស្ថិតក្រោមឥទ្ធិពលរបស់ក្រុមជួញដូរគ្រឿងញៀន ហើយមានអំពើពុករលួយតិចតួចបំផុត។
ជាក់ស្តែងក្នុងរយ:ពេលជាង ១ ទសវត្សរ៍ចុងក្រោយមកនេះ កងយោធាម៉ិកស៊ិកបានដើរតួនាទីចម្បងនៅក្នុងសង្គ្រាមកម្ចាត់ក្រុមជួញដូរគ្រឿងញៀន ពីព្រោះកងកម្លាំងប៉ូលិសម៉ិកស៊ិកនៅមានលក្ខណ:ប្រមូលផ្តុំនៅឡើយ ហើយពោរពេញទៅដោយអំពើពុករលួយ និងខ្វះសមត្ថភាពនៅក្នុងការប្រយុទ្ធជាមួយនឹងក្រុមប្រដាប់អាវុធទាំងនេះ។
កាលពី ២ ឆ្នាំមុនលោក Cienfuegos ត្រូវបានមន្ទីរបញ្ចកោណផ្តល់កិត្តិយសសម្រាប់ឧត្តមភាពរបស់លោក។ តែឆ្នាំនេះ សកម្មភាពឧក្រិដ្ឋរបស់លោក បើសិនបង្ហាញថា ជាការពិតមែននោះ គឺនឹងក្លាយជាសញ្ញា ១ ទៀតនៃគុណវិបត្តិនៅក្នុងសង្គ្រាមកម្ចាត់ក្រុមជួញដូរគ្រឿងញៀន ដែលសង្គ្រាមនេះមានការគាំទ្រពីសហរដ្ឋអាមេរិក។
ប្រធានាធិបតីម៉ិកស៊ិក លោក Andres Manuel Lopez-Obrador បានឆក់ឱកាសនៃការចាប់ខ្លួនលោក Cienfuegos ដើម្បីវាយប្រហាររដ្ឋបាលមុនរបស់អតីតប្រធានាធិបតី Enrique Pena Nieto ថា ពោរពេញទៅដោយអំពើពុករលួយ។
លោក Lopez Obrador បាននិយាយថា៖ «នេះគឺ ជាឧទាហរណ៍ ដែលមិនអាចប្រកែកបាននៃការរលំរលាយរដ្ឋាភិបាល និងជាឧទាហរណ៍អំពីរបៀបដែលរដ្ឋបាលសាធារណៈ និងសេវាសាធារណៈរបស់រដ្ឋាភិបាល ត្រូវបានបន្ទាបបន្ថោកក្នុងសម័យសេរីនិយមថ្មី (Neo-Liberal Period)»។
ប្រធានាធិបតីម៉ិកស៊ិករូបនេះក៏បានអះអាងផងដែរថា ថ្នាក់ដឹកនាំយោធាបច្ចុប្បន្នគឺ «មិនងាយពុករលួយនោះទេ» ហើយបានសន្យាថា នឹងព្យួរការងារ មន្ត្រីណាមួយនៅក្នុងរដ្ឋាភិបាលរបស់លោក ប្រសិនបើរកឃើញថា ពួកគេបានជាប់ទាក់ទងទៅនឹងអំពើពុករលួយមែននោះ។
គួរបញ្ជាក់ថា លោក Cienfuegos មានងារថា «El Padrino» ឬជាភាសាអង់គ្លេសថា «The Godfather» គឺជាអតីតរដ្ឋមន្ត្រីម៉ិកស៊ិកទី ២ ដែលត្រូវបានចាប់ខ្លួនដោយសហរដ្ឋអាមេរិកជាប់ពាក់ព័ន្ធទៅនឹងការជួញដូរគ្រឿងញៀន។ មុននេះ លោក Genaro Garcia Luna ជាអតីតរដ្ឋមន្ត្រីសន្តិសុខសាធារណៈ មានតួនាទីគ្រប់គ្រងប៉ូលិស ចាប់ពីឆ្នាំ ២០០៦ រហូតដល់ឆ្នាំ ២០១២ ត្រូវបានចាប់ខ្លួននៅរដ្ឋតិចសាស់កាលពីឆ្នាំមុន ពីបទឃុបឃិត ចែកចាយគ្រឿងញៀនជាមួយនឹងការចោទប្រកាន់ថា បានទទួលសំណូកសូកប៉ាន់រាប់លានដុល្លារពីស្ដេចជួញដូរគ្រឿងញៀនឈ្មោះ Joaquin«El-Chapo» Guzman៕
