កាលពីថ្ងៃអង្គារ កន្លងទៅ សហរដ្ឋអាមេរិកបានដាក់ទណ្ឌកម្មលើមេដឹកនាំយោធាចលនា Houthi ចំនួន ២ នាក់ នៅប្រទេសយេម៉ែន ពីបទកាន់កាប់អាវុធពីអ៊ីរ៉ង់ និងរៀបចំការវាយប្រហារ ដែលនេះជាការដាក់ទណ្ឌកម្មដំបូងរបស់រដ្ឋបាលលោកប្រធានាធិបតី Joe Biden ប្រឆាំងនឹងក្រុមនេះ។
ទណ្ឌកម្មនេះ មានលក្ខណ:ផ្ទុយពីសេចក្តីសម្រេចរបស់ក្រសួងការបរទេសកាលពីខែមុន អំពីការលុបចោលនៃការកំណត់ក្រុមភេរវករដែលបានដាក់ចេញដោយរដ្ឋបាល Donald Trump នៅថ្ងៃកាន់តំណែងចុងក្រោយរបស់លោកជុំវិញការព្រួយបារម្ភថា ពួកគេនឹងធ្វើឱ្យវិបត្តិមនុស្សធម៌កាន់តែយ៉ាប់យ៉ឺនឡើងនៅប្រទេសយេម៉ែន។
រដ្ឋបាល Joe Biden បានព្រមានចលនា Houthi ដែលគាំទ្រដោយអ៊ីរ៉ង់ថា ទីក្រុងវ៉ាស៊ីនតោន នឹងរក្សាការដាក់សម្ពាធលើការដឹកនាំរបស់ក្រុមនេះបន្តទៀត។
នាយកការិយាល័យគ្រប់គ្រងទ្រព្យសម្បត្តិបរទេសលោក Andrea Gacki បានថ្លែងក្នុងសេចក្តីថ្លែងការណ៍របស់នាយកដ្ឋានរតនាគារអាមេរិកថា៖ «សហរដ្ឋអាមេរិកនៅតែប្តេជ្ញាធើ្វយ៉ាងណាឱ្យចលនា Houthi ទទួលខុសត្រូវចំពោះសកម្មភាពរបស់ពួកគេ ដែលបានរួមចំណែកធ្វើឱ្យប្រជាជនយេម៉ែនរងទុក្ខជាទម្ងន់»។
ចំណាត់ការកាលពីថ្ងៃអង្គារនោះបានដាក់ឈ្មោះបុគ្គលមួយចំនួនក្នុងចលនាហ៊ូធីចូលក្នុងបញ្ជីខ្មៅ ដែលក្នុងនោះរួមមានដូចជា លោក Mansur Al-Sa''adi មេបញ្ជាការកងទ័ពជើងទឹកហ៊ូធី និងលោក Ahmad ''Ali Ahsan al-Hamzi មេបញ្ជាការកងទ័ពអាកាស និងកងការពារដែនអាកាសរបស់យេម៉ែន។
រតនាគារអាមេរិកបានចោទប្រកាន់មេដឹកនាំទាំង ២ ថា រៀបចំការវាយប្រហារដែលបានធ្វើឱ្យជះឥទ្ធិពលដល់ប្រជាជនយេម៉ែន ប្រទេសជិតខាង និងនាវាពាណិជ្ជកម្មនៅក្នុងដែនទឹកអន្តរជាតិនៅក្នុងសកម្មភាពមួយដែលធ្វើឡើង ដើម្បី «ជំរុញរបៀបវារៈប្រកបដោយស្ថិរភាពរបស់របបអ៊ីរ៉ង់»។
ប្រភពដដែលបានបន្តថា សហរដ្ឋអាមេរិកថ្កោលទោសក្រុមចលនាហ៊ូធី ដែលគ្រោងនឹងបង្កឱ្យមានការបំផ្លិចបំផ្លាញដល់តំបន់ប្រជាជនស៊ីវិលដោយពួកសកម្មប្រយុទ្ធ និងកំណត់ការថ្កោលទោសនេះចាប់ពីថ្ងៃនេះតទៅ។ បុគ្គលទាំងនេះបញ្ជាកម្លាំងដែលធ្វើឱ្យមានវិបត្តិមនុស្សធម៌កាន់តែអាក្រក់នៅក្នុងប្រទេសយេម៉ែន។ សង្គ្រាមបានធ្វើឱ្យប្រទេសក្រីក្រមួយនេះ ធ្លាក់ខ្លួនទៅជាប្រទេស ដែលមានវិបត្តិមនុស្សធម៌ដ៏ធំបំផុតរបស់ពិភពលោក។ នេះបើតាមអង្គការសហប្រជាជាតិ។
ទណ្ឌកម្មថ្មីនេះ ធ្វើឡើងក្រោយពេលលោក Biden ដកកម្លាំងយោធាជំនួយ ដែលគាំទ្រដោយអារ៉ាប៊ី សាអ៊ូឌីត នៅយេម៉ែន ដោយប្រកាសថា សង្គ្រាមរយៈពេល ៦ ឆ្នាំ ដែលត្រូវបានគេមើលឃើញថា ជាជម្លោះរវាងអារ៉ាប៊ី សាអ៊ូឌីត និងអ៊ីរ៉ង់ «ត្រូវតែបញ្ចប់»។
រតនាគារ បានបន្តថា អ៊ីរ៉ង់បានបង្កើនជម្លោះកាន់តែខ្លាំងឡើងតាមរយៈ ការផ្តល់ជំនួយហិរញ្ញវត្ថុ និងសម្ភារដោយផ្ទាល់ដល់ក្រុម Houthi រួមមានអាវុធតូចៗ មីស៊ីល គ្រឿងផ្ទុះ និងយានគ្មានមនុស្សបើក ឬដ្រូន ដែលត្រូវបានប្រើប្រាស់ប្រឆាំងទៅនឹងរដ្ឋាភិបាលយេម៉ែន។
ប្រភពដដែលបន្តថា លោក Al-Sa''adi បានទទួលការបណ្តុះបណ្តាលយ៉ាងទូលំទូលាយនៅក្នុងប្រទេសអ៊ីរ៉ង់ និងបានជួយរត់ពន្ធអាវុធចូលទៅក្នុងប្រទេសយេម៉ែន ខណៈលោក al-Hamzi បានទិញអាវុធ ដែលផលិតដោយអ៊ីរ៉ង់សម្រាប់ប្រើប្រាស់នៅក្នុងសង្គ្រាមស៊ីវិលរួមទាំងការវាយប្រហារដោយយន្តហោះដ្រូនទៀតផង។
ទណ្ឌកម្មកាលពីថ្ងៃអង្គារ ត្រូវបានដាក់នៅក្រោមបទបញ្ជាប្រតិបត្តិ ដែលមានគោលបំណងបង្កកទ្រព្យសម្បត្តិរបស់ប្រជាជនដែលគំរាមកំហែងដល់សន្តិភាពសន្តិសុខ ឬស្ថិរភាពនៃប្រទេសយេម៉ែន រារាំងរាល់ទ្រព្យសម្បត្តិ អ្នកដែលត្រូវបានចុះក្នុងបញ្ជីខ្មៅអាចមាននៅក្រោមយុត្តាធិការរបស់សហរដ្ឋអាមេរិក ហើយជាទូទៅរារាំងជនជាតិអាមេរិកមិនឱ្យទាក់ទងពួកគេឡើយ។
យ៉ាងណាមិញ ក្រុមឧទ្ទាមមកពីប្រទេសក្រីក្រមួយនេះ ទំនងជាមិនមានគណនីធនាគារអាមេរិកឡើយ ដូចនេះផលប៉ះពាល់មិនសូវខ្លាំងប៉ុន្មានទេ ប៉ុន្តែការធ្វើដូចនេះកាន់តែធ្វើឱ្យមានការរិះគន់ដល់លោក Joe Biden កាន់តែខ្លាំងពីសំណាក់ភាគីអ៊ីរ៉ង ខណៈដែលលោកបើកទ្វារការទូតជាមួយនឹង អារ៉ាប៊ី សាអ៊ូឌីត ដែលបាននិងកំពុងបំផ្លិចបំផ្លាញក្រុមហ៊ូធីនេះ។
កាលពីខែមុនសហរដ្ឋអាមេរិកបានដកហូតក្រុមហ៊ូធីចេញពីអង្គការភេរវកម្មបរទេសជាការចាត់វិធានការរបស់លោកឧត្តមសេនីយ៍ Frank McKenzie ប្រធានកងកម្លាំងអាមេរិកនៅមជ្ឈិមបូព៌ា និងបានហៅចំណាត់ការនេះថា ជា «ឆន្ទៈល្អ» ដើម្បីបញ្ចុះបញ្ចូលក្រុមឧទ្ទាមឱ្យចូលរួមក្នុងកិច្ចចរចាសន្តិភាព ដើម្បី «បញ្ចប់សង្គ្រាម»៕