ភ្នំពេញៈ ទំហំប្រាក់កម្ចី និង ប្រាក់បញ្ញើនៅតាមគ្រឹះស្ថាន មីក្រូហិរញ្ញវត្ថុ ទាំង ៣៥ មានការកើនឡើងព្រមគ្នាក្នុងអំឡុង ៦ខែឆ្នាំនេះ បើប្រៀបធៀបទៅកាលពីដំណាច់ខែធ្នូឆ្នាំ ២០១២។ នេះបើតាមរបាយការណ៍ ហិរញ្ញវត្ថុរបស់សមាគមមីក្រូ ហិរញ្ញវ កម្ពុជា (CMA)។
គិតមកត្រឹមដំណាច់ឆមាសទីមួយឆ្នាំនេះ ទំហំប្រាក់កម្ចីសរុបមាន ១ ០៨៨ លានដុល្លារ កើនឡើងពី ៨០៨ លានដុល្លារកាលពីដំណាច់ឆ្នាំ២០១២។ ទំហំប្រាក់បញ្ញើក្នុងចំណោមគ្រឹះស្ថាន ៧ ដែលបានអាជ្ញាប័ណ្ណទទួលប្រាក់បញ្ញើបានកើនដល់ ៣៧៧,៧ លានដុល្លារគឺកើនឡើងពី ២២៤,៧ លានដុល្លារកាលពីដំណាច់ឆ្នាំមុន។
យោងតាមអ្នកជំនាញក្នុងវិស័យមីក្រូ ហិរញ្ញវត្ថុ សកម្មភាពអាជីវកម្មនៅតាមតំបន់ជនបទក្នុងអំឡុង ៦ ខែដំបូងឆ្នាំនេះនៅបន្តមានស្ថិរភាព។ លើសពីនេះភាពប្រសើរឡើងនៃការយល់ដឹងពីអត្ថប្រយោជន៍នៃការប្រើប្រាស់សេវាហិរញ្ញវត្ថុផ្លូវការក្នុងចំណោមប្រជាជនតាមតំបន់ជនបទ ក៏បានជំរុញឲ្យប្រាក់កម្ចី និងប្រាក់បញ្ញើនៅតាមស្ថាប័នមីក្រូ ហិរញ្ញវត្ថុនៅកម្ពុជាកើនឡើងយ៉ាងខ្លាំងក្នុងឆមាសទី១ឆ្នាំនេះផងដែរ។
លោក ប៊ុន មុនី ប្រធានសមាគម មីក្រូ ហិរញ្ញវត្ថុកម្ពុជា និងជានាយកគ្រប់គ្រងទូទៅគ្រឹះស្ថាន មីក្រូ ហិរញ្ញវត្ថុ ស្ថាបនា លីមីធីតមានប្រសាសន៍ថា ការធ្វើជំនួញក្នុងអំឡុងឆមាសទីមួយឆ្នាំនេះនៅបន្តដំណើរការល្អ ហើយការផ្តល់កម្ចីសម្រាប់អាជីវកម្មខ្នាតតូចនិងកម្ចីផ្នែក កសិកម្មក៏រួមចំណែកយ៉ាងសំខាន់ក្នុងការគាំទ្រកំណើននេះ។
លោកបន្តថា៖ «ស្ថានភាពសេដ្ឋកិច្ចនៅតាមតំបន់ជនបទនៅតែបន្តមានស្ថិរភាព ល្អ ហើយតម្រូវការដើមទុនដើម្បីវិនិយោគក៏កាន់តែមានកំណើន។ យើងមានការភ្ញាក់ផ្អើលយ៉ាងខ្លាំងចំពោះអត្រាកំណើនដ៏ខ្ពស់នេះ»។ លោកអះអាងថា កំណើនទំនុកចិត្តក្នុងការដាក់ប្រាក់សន្សំនៅតាមស្ថាប័នមីក្រូ ហិរញ្ញវត្ថុក៏ជាចំណែកយ៉ាងសំខាន់ដែលធ្វើឲ្យប្រាក់បញ្ញើសន្សំ កើនឡើងផងដែរ»។
តាមរបាយការណ៍ពី CMA គ្រឹះស្ថានទាំងអស់នៅតែរក្សាបានការសងត្រឡប់ទៀងទាត់ពីអតិថិជនបានល្អ។ ទំហំប្រាក់កម្ចីដែលប្រឈមនឹងហានិភ័យសងត្រឡប់មកវិញមានត្រឹម តែ ៤ លានដុល្លារ ពោលគឺ ០,៣ ភាគរយប៉ុណ្ណោះធៀបនឹងទំហំប្រាក់កម្ចីសរុប។
របាយការណ៍បង្ហាញថា គ្រឹះស្ថានមីក្រូ ហិរញ្ញវត្ថុ ប្រាសាក់ បានផ្តល់ប្រាក់កម្ចីសរុប ៣០១ លានដុល្លារ បន្ទាប់មកអម្រឹតមីក្រូ ហិរញ្ញវត្ថុមានសរុប ១៧៤ លានដុល្លារ ខណៈស្ថាបនា លីមីធីតមាន ១៣៩ លានដុល្លារ។ ហត្ថាកសិករ លីមីធីតមាន ១១៣ លានដុល្លារ ស្របពេលគ្រឹះស្ថានធំជាងគេទីប្រាំគឺ អេ អឹម ខេ មានចំនួន ៦៩ លានដុល្លារ។
លោក ឌិន វីរៈ ស្ថាបនិក និង នាយកវិទ្យាស្ថាន វី ឃែភីថល ដែលជាវិទ្យាស្ថានផ្តល់សេវាប្រឹក្សាធុរកិច្ចធ្លាប់ឲ្យភ្នំពេញ ប៉ុស្តិ៍ដឹងថា ការទទួលបានទំនុកចិត្តពីអតិថិជនក្នុងការដាក់ប្រាក់បញ្ញើសន្សំកាន់តែច្រើននឹងជួយរក្សាស្ថិរភាពប្រភពទុនរបស់គ្រឹះស្ថានមីក្រូ ហិរញ្ញវត្ថុ។ លោកអះអាងថា៖ «ការប្រមូលប្រាក់សន្សំបានកាន់តែច្រើននិងអាចធ្វើឲ្យគ្រឹះស្ថានមីក្រូ ហិរញ្ញវត្ថុមានលទ្ធភាពផ្តល់ប្រាក់កម្ចីទៅវិញកាន់តែច្រើនដែរ។ បើនិន្នាការនេះនៅបន្តល្អ វានឹងរួមចំណែកធ្វើឲ្យអត្រាការប្រាក់កាន់តែទាប»។
លោក ស៊ឹម សេនាជាតិ អគ្គនាយកគ្រឹះស្ថានមីក្រូ ហិរញ្ញវត្ថុ ប្រាសាក់ បានឲ្យដឹងថា ទំហំប្រាក់បញ្ញើក្នុងគ្រឹះស្ថាន ប្រាសាក់ បានកើនឡើងយ៉ាងខ្លាំង ក្នុងអំឡុងឆមាសទីមួយឆ្នាំនេះ ដែលនេះបានមកពីកត្តារួមផ្សំសំខាន់ៗជាច្រើនដូចជាទំនុកចិត្តរបស់អតិថិជនលើប្រព័ន្ធមីក្រូ ហិរញ្ញវត្ថុ និងការធ្វើទំនើបកម្មតាមរយៈការបំពាក់បច្ចេកវិទ្យាខ្ពស់ដូចជាម៉ាស៊ីន ATM ជាដើម។
លោកបញ្ជាក់ថា៖ «ទាំងទំហំប្រាក់កម្ចី និងបញ្ញើកើនឡើងលឿនមែនទែន។ អតិថិជនចាស់បានបង្កើនទំហំកម្ចីរបស់ពួកគេធំជាងមុន ហើយអតិថិជនថ្មីក៏មានចំនួនច្រើនជាងមុន»។ លោកបានបន្តថា ការផ្តល់កម្ចីទៅវិស័យសំខាន់ៗសម្រាប់កំណើនសេដ្ឋកិច្ចដូចជា កសិកម្ម អាជីវកម្មខ្នាតនៅបន្តកើនឡើងព្រមគ្នាក្នុងរង្វង់ ៣០ ភាគរយនៃទំហំប្រាក់កម្ចីសរុប៕
