ភ្នំពេញៈ លោកហេង ពិសិដ្ឋបានបញ្ចប់ថ្នាក់បរិញ្ញាបត្រវិទ្យាសាស្ត្រសេដ្ឋកិច្ចនៅចុងឆ្នាំ២០០៩ ហើយពីរខែក្រោយមកលោកក៏បានទទួលការងារដំបូងនៅគ្រឹះស្ថានមីក្រូហិរញ្ញវត្ថុមួយដែលមានប្រតិបត្តិការនៅស្រុកកំណើតរបស់លោកក្នុងខេត្តកំពង់ធំ។
លោកបានចាប់ផ្តើមជាបុគ្គលិកផ្នែកមន្ត្រីឥណទាន (Credit Officer)ដែលគិតមកទល់ពេលនេះមានរយៈពេល៣ឆ្នាំហើយ។ ពិសិដ្ឋបាននិយាយថា៖«ខ្ញុំសម្លឹងឃើញឱកាសក្នុងការឡើងតំណែងកាន់តែចង្អៀតទៅៗ។ សម្ពាធនៃការប្រកួតប្រជែងពីបុគ្គលិកមានសមត្ថភាពក៏កាន់តែខ្លាំងជាងមុន ស្របពេលតំណែងខ្ពស់កាន់តែមានតិចទៅជាងមុន»។ លោកបន្តថា អ្វីៗហាក់ខុសគ្នាច្រើនជាងកាលពីដើមទសវត្សរ៍ឆ្នាំ២០០០ដែលលោកបានឃើញគំរូពីសាច់ញាតិលោកអាចទទួលបានតំណែងធំក្នុងរយៈពេលខ្លី បន្ទាប់ពីចូលបម្រើកាងារដោយសារបរិយាកាសប្រកួតប្រជែងងាយស្រួលជាងពេលបច្ចុប្បន្ន។
ដំណើរការងាររបស់លោកពិសិដ្ឋហាក់កំពុងឆ្លុះបញ្ចាំងពីស្ថានភាពការងាររបស់បុគ្គលិករាប់រយនាក់ផ្សេងទៀតដែលទើបចាប់ផ្តើមការងារក្នុងវិស័យនេះដោយប្រឈមនឹងការប្រកួតប្រជែងកាន់តែខ្លាំងឡើងៗក្នុងការសម្រេចគោលបំណងដើម្បីទទួលតំណែងខ្ពស់ជាងមុននោះ។
បន្ថែមពីការពឹងផ្អែកលើសមត្ថភាពផ្ទាល់ខ្លួនអ្នកដែលឈានចូលធ្វើការក្នុងវិស័យនេះត្រូវសម្លឹងពីកត្តាប្រឈមដ៏មិនអាចមើលរំលងបានមួយទៀតនោះគឺឱកាស។
ខណៈដែលគ្រឹះស្ថានហិរញ្ញវត្ថុបានពង្រីកប្រតិបត្តិការរបស់ខ្លួនស្ទើរពាសពេញផ្ទៃប្រទេសរួចទៅហើយការស្រូបយកធនធានមនុស្សដើម្បីបម្រើការក្នុងវិស័យនេះជាពិសេសឱកាសការងារសម្រាប់តួនាទីជាអ្នកគ្រប់គ្រងថ្នាក់កណ្តាល និងអ្នកគ្រប់គ្រងជាន់ខ្ពស់កាន់តែតិចតួចជាងមុន។
លោកស្រី វីរៈស៊ីសុជាតា ប្រធានផ្នែកពាណិជ្ជកម្មក្រុមហ៊ុន Great Allianceជាក្រុមហ៊ុនភ្នាក់ងារផ្តល់ប្រឹក្សានិងជ្រើសរើសធនធានមនុស្សសម្រាប់ក្រុមហ៊ុនឯកជនបានប្រាប់ភ្នំពេញប៉ុស្តិ៍កាលពីម្សិលមិញថា តម្រូវការបុគ្គលិកថ្មីក្នុងតំណែងជាបុគ្គលិកចាប់ផ្តើមការងារដំបូងមានការកើនឡើងជារៀងរាល់ឆ្នាំប្រហែល៣០ ទៅ៣៥ ភាគរយប្រចាំឆ្នាំ។
តែការស្វែងរកបុគ្គលិកក្នុងតំណែងប្រធានផ្នែក ឬតំណែងអ្នកទទួលខុសត្រូវខ្ពស់ជាងនេះមានតិចតួច នឹងមានការប្រកួតប្រជែងខ្លាំង។ អ្នកស្រីបន្តថា៖ «បើយើងក្រឡេកទៅមើលកាលពី២០០៥ ចំនួនបុគ្គលិកដែលមានសក្តានុពលនៅមានកម្រិត ហើយកាលនោះឱកាសការងារក្នុងតំណែងសំខាន់ៗមានច្រើន។ ប៉ុន្តែនាពេលនេះការប្រកួតប្រជែងមានភាពតឹងតែងជាងមុន»។
លោកស្រីងួន សុខា អគ្គនាយកធនាគារជាតិនៃកម្ពុជា បានទទួលស្គាល់ថា គ្រឹះស្ថានហិរញ្ញវត្ថុបានរួមចំណែកយ៉ាងសំខាន់ក្នុងការ ផ្តល់ការងារដល់និសិ្សតដែលបញ្ចប់ការសិក្សាពីសាកលវិទ្យាល័យ តែយ៉ាងណាក៏ដោយលោកស្រីអះអាងថានិសិ្សតដែលកំពុងសិក្សាក៏គួរសម្លឹងមើលឱកាសការងារក្នុងវិស័យផ្សេងជាជាងការពឹងអាស្រ័យតែទៅលើវិស័យមួយ។លោកស្រីបន្តថា៖ «ពិតណាស់គ្រឹះស្ថានធនាគារ និងមីក្រូហិរញ្ញវត្ថុ បានស្រូបយកបុគ្គលិកជាច្រើនក្នុងមួយឆ្នាំៗតែទោះយ៉ាងនេះក្តីវិស័យនេះមិនអាចទ្រទ្រង់កំណើនតម្រូវការងារដ៏ច្រើនដែលនិស្សិតបានបញ្ចប់ការសិក្សាត្រូវការនោះទេ»។
របាយការណ៍ថ្មីៗចេញដោយសមាគមមីក្រូហិរញ្ញវត្ថុកម្ពុជា(CMA)បង្ហាញថា ចំនួនបុគ្គលិកបម្រើការនៅគ្រឹះស្ថានមីក្រូហិរញ្ញវត្ថុទាំង៣៥និងធនាគារអេស៊ីលីដាមានចំនួនសរុប២៣ ១៦៥នាក់នៅចុងខែមិថុនាឆ្នាំ២០១៣ដោយកើនពី២១ ៧១៦នាក់ចុងខែធ្នូឆ្នាំ២០១២។
លោក ស៊ឹម សេនាជាតិអគ្គនាយកគ្រឹះស្ថានមីក្រូហិរញ្ញវត្ថុប្រាសាក់បាននិយាយថាដើម្បីទទួលបានការងារធ្វើក្នុងតំណែងល្អនិស្សិតត្រូវតែផ្ដោតលើគុណភាពចំណេះដឹងឲ្យបានច្រើនប្រសើរជាងការផ្តោតតែលើការមានសញ្ញាបត្រ។ លោកបន្តថា៖«មាននិស្សិតទើបនឹងបញ្ចប់ការសិក្សាជាច្រើនកំពុងស្វែងរកការងារនៅពេលនេះ។វាមានការពិបាកបន្តិចក្នុងការជ្រើសរើសបុគ្គលិកដែលមានបទពិសោធខាងធនាគារសម្រាប់មុខតំណែងខ្ពស់ៗ»។លោកលើកឧទាហរណ៍ថាបើយើងប្រកាសជ្រើសរើសមន្រ្តីឥណទាន១០០នាក់នឹងមានអ្នកដាក់ពាក្យជាង២ ០០០នាក់ ។
លោក Grant Knuckey អគ្គនាយកធនាគារANZ Royalបានថ្លែងថាវិស័យធនាគារកម្ពុជាមានបញ្ហាខាងធនធានមនុស្សខណៈទីផ្សារនេះតាមពិតគឺកំពុងកើនឡើងយ៉ាងខ្លាំង។ លោកបន្ថែមថា៖ «នៅធនាគារ ANZ Royalយើងតែងតែដំឡើងតួនាទីដល់បុគ្គលិកដែលសមនឹងទទួលបានតំណែងជាជាងរយៈពេលនៃការបម្រើការងារ»៕PB
