The Phnom Penh Post Search

Search form

Logo of Phnom Penh Post newspaper Phnom Penh Post - គុណ​តម្លៃ​សំបុត្រ​អាពាហ៍​ពិពាហ៍​ចំពោះ​ស្វាមី​ភរិយា




គុណ​តម្លៃ​សំបុត្រ​អាពាហ៍​ពិពាហ៍​ចំពោះ​ស្វាមី​ភរិយា

គុណ​តម្លៃ​សំបុត្រ​អាពាហ៍​ពិពាហ៍​ចំពោះ​ស្វាមី​ភរិយា

គេ​មិន​ទាន់​អាច​និយាយ​ថា​ជា​គូ​ស្វាមី​ភរិយា​ស្រប​ច្បាប់​ទេ ប្រសិន​បើ​សហព័ន្ធន៍​ទាំងពីរ​មិន​បាន​ធ្វើ​សំបុត្រ​អាពាហ៍​ពិពាហ៍​ស្រប​តាម​ច្បាប់​កំណត់​ទេនោះ។ សំបុត្រ​អាពាហ៍​ពិពាហ៍​នេះ មាន​ប្រយោជន៍​យ៉ាងច្រើន​សម្រាប់​គូភរិយា ដើម្បី​ឲ្យ​ការ​រួមរស់​ជាមួយ​គ្នា​សុខ​ក្សេមក្សាន្ត។

wed_10
គូស្វាមីភរិយាថ្មីជូនភ័ស្តុភារ បណ្ណាការជូនដល់មាតាបិតារបស់ខ្លួន បន្ទាប់ពីមង្គលការ គូស្វាមីភរិយាគួរទៅធ្វើសំបុត្រអាពាហ៍ពិពាហ៍

គូ​ស្វាមី​ភរិយា​ថ្មី​ជូន​ភ័ស្តុភារ បណ្ណាការ​ជូន​ដល់​មាតា​បិតា​របស់​ខ្លួន។ បន្ទាប់​ពី​មង្គលការ គូ​ស្វាមី​ភរិយា​គួរទៅ​ធ្វើ​សំបុត្រ​អាពាហ៍​ពិពាហ៍។ រូបថត សុវណ្ណ ភីឡុង

សំបុត្រ​អាពាហ៍​ពិពាហ៍ ជា​ការ​បញ្ជាក់ថា សហព័ន្ធន៍​ទាំងពីរ បាន​សុខចិត្ត​ព្រមព្រៀង​គ្នា​ជា​ឱឡារិក​ទទួល​យក​គ្នា​ធ្វើ​ជា​គូស្វាមី​ភរិយា ទៅតាម​ផ្លូវ​ច្បាប់។

គ្រប់​គូស្វាមី​ភរិយា​ទាំងអស់ ក្រោយពី​ពួកគេ​រៀប​អាពាហ៍​ពិពាហ៍​រួចហើយ ត្រូវ​បំពេញ កាតព្វកិច្ច​មួយ​សំខាន់​ទៀតគឺ ការ​ធ្វើ​សំបុត្រ​អាពាហ៍​ពិពាហ៍​ពីព្រោះ​សំបុត្រ​នេះមាន​អត្ថ​ប្រយោជន៍​ច្រើន​ណាស់ សម្រាប់​គូ ស្វាមី​ភរិយា​និង​ក្រុម​គ្រួសារ​របស់​គេផងដែរ។

អ្វី​ជា​សំបុត្រ​អាពាហ៍​ពិពាហ៍ ឬអេតាស៊ីវិល?

លោក សេង ឡឹង ជា​ទី​ប្រឹក្សា​ផ្នែក​ច្បាប់​នៅ​ក្រុមហ៊ុន ឌីហ្វែស ឌីអែល (DFDL) បាន​និយាយ​ឲ្យដឹងថា នៅ​ក្នុង​អត្រានុកូលដ្ឋាន​មាន​លិខិត​សំខាន់​ចំនួនបី គឺ លិខិត​កំណើត លិខិត​អាពាហ៍ពិពាហ៍ និង​លិខិត​មរណៈ។ លោក​ទីប្រឹក្សា​ផ្នែក​ច្បាប់​រូបនេះ បាន​មាន​ប្រសាសន៍​ប្រាប់​អំពី​និយមន័យ​នៃ​លិខិត​អាពាហ៍​ពិពាហ៍ ឬ សំបុត្រ​អាពាហ៍ពិពាហ៍ ឬ​បញ្ជី​អាពាហ៍​ពិពាហ៍ ថា ៖ «វា​គឺជា​លិខិត​មួយ​ដែល​សហព័ទ្ធន៍​ទាំងពីរ (ប្តីប្រពន្ធ) បាន​សុខចិត្ត​ព្រមព្រៀង​គ្នា​ជា​ឱឡារិក​ទទួល​យក​គ្នា​ជា​គូ​ស្វាមី​ភរិយា​ទៅតាម​ផ្លូវច្បាប់»។

បើ​និយាយ​ពី​សំបុត្រ ឬ បញ្ជី​អាពាហ៍​ពិពាហ៍ មាន​ប្រជាជន​កម្ពុជា​ជាច្រើន​នាក់​នៅមាន​ចម្ងល់​ថា ស្អីទៅ​ជា​សំបុត្រ​អាពាហ៍​ពិពាហ៍ ឬ​បញ្ជី​អាពាហ៍​ពិពាហ៍? ប៉ុន្តែ ប្រសិន​បើ​និយាយ​ថា អេតាស៊ីវិល នោះ​ប្រាកដ​ណាស់​ថា ប្រជាជន​កម្ពុជា​ភាគច្រើន​នឹង​ស្គាល់ថា វាជាអ្វី។

គុណ​តម្លៃ​នៃ​សំបុត្រ ឬ​បញ្ជី​អាពាហ៍​ពិពាហ៍

លោក គង់ ថេម ប្រធាន​ភូមិ​អង្គតាសោម ឃុំ​អង្គតាសោម ស្រុក​ត្រាំកក់ ខេត្ត​តាកែវ បាន​មាន​ប្រសាសន៍​ឲ្យដឹងថា ការ​ចុះ​បញ្ជី​អាពាហ៍​ពិពាហ៍​នេះ​មាន​អត្ថប្រយោជន៍​ណាស់​សម្រាប់​ភរិយា​ស្វាមី​ដែល​បាន​រៀប​អាពាហ៍​ពិពាហ៍​រួចហើយ។ ហេតុអ្វី​បាន​ស្វាមី​ភរិយា​ទាំងអស់​ត្រូវ​ធ្វើ​សំបុត្រ អាពាហ៍​ពិពាហ៍? លោក​ប្រធាន​ភូមិ​រូបនេះ​បាន​មាន​ប្រសាសន៍​ថា៖ «សំបុត្រ​អាពាហ៍​ពិពាហ៍ នេះ​មាន​អត្ថប្រយោជន៍​ណាស់​សម្រាប់​ពួកគេ​ជា​ប្តីប្រពន្ធ និង​កូនចៅ​របស់​គេ​ផងដែរ ដូចជា​ការ​សម្គាល់​ឈ្មោះ​បុរស​ស្ត្រី​ជា​ប្តីប្រពន្ធ ជា​ភស្តុតាង​សម្រាប់​ធ្វើការ​លែងលះ​គ្នា សម្រាប់​ទាមទារ​ប្រាក់​អាហារ​កិច្ច​ដល់​កូន​ពួកគេ សម្រាប់​ប្រើប្រាស់​ចំពោះ​មុខ​ច្បាប់​ជាដើម»។

លោកគង់ ថេម បាន​ពន្យល់​បន្តថា អត្ថ​ប្រយោជន៍ របស់​វា​មួយទៀត​នោះ​គឺ​កូន​ដែល​កើតមក នោះ​ជា​កូន​មាន​ខាន់ស្លា ព្រោះ​ឪពុក​ម្តាយ​របស់​ពួកគេ​មាន​សំបុត្រ​អាពាហ៍​ពិពាហ៍​ត្រឹមត្រូវ ប៉ុន្តែ​ចំពោះ​គូស្វាមី​ភរិយា​ណា​មិន​បាន​ចុះ​បញ្ជី​អាពាហ៍​ពិពាហ៍ ឬ​អេតាស៊ីវិល​តាម​ផ្លូវ​ច្បាប់​នោះទេ កូន​ដែល​កើត​មក​គេ​ហៅថា «កូន​ឥត​ខាន់​ស្លា»។

ដូចគ្នា​ទៅ​នឹង​លោក​ប្រធាន​ភូមិ​ខាង​លើនេះ លោក​មេធាវី ពុទ្ធ ធាវី មាន​ប្រសាសន៍​ថា ការ​ចុះ​សំបុត្រ​អាពាហ៍ ពិពាហ៍​ពិត​ជាមាន​សារៈ​សំខាន់​ណាស់ សម្រាប់​ក្រុម​គ្រួសារ ក្នុង​ការ​បញ្ជាក់​ថា ពួកគេ​រៀប​អាពាហ៍​ពិពាហ៍​ស្រប​ទៅតាម​អ្វី​ដែល​ច្បាប់​បាន​ចែង។ ម៉្យាង​វិញទៀត វាមាន​សារៈ​ប្រយោជន៍​សម្រាប់​កូនៗ មរតក ទ្រព្យ​សម្បត្តិ​រួម រួម​ទាំង​អត្ថ​ប្រយោជន៍​ផ្សេងៗ ជាច្រើន​ទៀត។

នៅ​ក្នុង​ការ​ទទួល​បាន​នូវ​សំបុត្រ​អាពាហ៍​ពិពាហ៍​នេះ​មិនមែន​មនុស្ស​ទាំងអស់​ចង់បាន​ហើយ ពួកគេ​ទទួលបាន​នោះទេ ។ វាមាន​លក្ខខ័ណ្ឌ​ជាច្រើន​ដែល​ពួកគេ​ត្រូវ​បំពេញ​មុនពេល​ទទួល​បាន​សំបុត្រ​អាពាហ៍​ពិពាហ៍នេះ។

លោក​គង់ ថេម​មាន​ប្រសាសន៍​ឲ្យដឹង​ពី​ចំណុច​នេះថា៖ «លក្ខខ័ណ្ឌ​ក្នុង​ការ​ចុះ​បញ្ជី​អាពាហ៍​ពិពាហ៍ បុរស​ត្រូវមាន​អាយុ ២០ ឆ្នាំ និង​ស្ត្រី​មាន​អាយុ ១៨ ឆ្នាំ ដែល​ពួកគេ​ស្ម័គ្រចិត្ត​ទទួល​យក​គ្នា​ជា​ប្តីប្រពន្ធ ទើប​ពួកគេ​ត្រូវបាន​អនុញ្ញាត​ឲ្យ​ចុះបញ្ជី អាពាហ៍​ពិពាហ៍ ឬ​សំបុត្រ​អាពាហ៍​ពិពាហ៍។ គូ​ស្វាមី​ភរិយា​អាច​ធ្វើ​សំបុត្រ​អាពាហ៍​ពិពាហ៍ បាន​នៅ​សាលា​ឃុំ-សង្កាត់ ដោយ​ពួកគេ​ត្រូវ​នាំ​សាក្សី​ពីរនាក់​មក​ជាមួយ​ផង ដើម្បី​មើល និង ធ្វើ​ជា​សាក្សី​បញ្ជាក់​ថា គូស្វាមី​ភរិយា​នេះ​ពិតជា​បាន​ធ្វើ​សំបុត្រ​អាពាហ៍​ពិពាហ៍​ប្រាកដ​មែន»។

ទាក់ទង​ទៅនឹង​វ័យ ឬ​អាយុ​នេះ​ផងដែរ លោក​ប្រធាន​ភូមិ​បាន​បញ្ជាក់​ឲ្យដឹង​ថា ចំពោះ​ស្ត្រី ដែល​មាន​អាយុ​ក្រោម ១៨ ឆ្នាំ ក៏​អាច​ធ្វើ​សំបុត្រ​អាពាហ៍​ពិពាហ៍នេះ​បានដែរ ក្នុង​ករណី ដែល ស្ត្រីនោះ​បាន​រួមរស់​ជាមួយ​បុរស​ជាដៃគូ​រហូត​មាន​ផ្ទៃពោះ នោះ​ពួកគេ​ក៏​អាច​ទៅ​ធ្វើ​សំបុត្រ​អាពាហ៍​ពិពាហ៍​បានដែរ។

ការ​ចុះ​សំបុត្រ​អាពាហ៍​ពិពាហ៍​មិនបាន​កំណត់​ថ្ងៃទេថា គូស្វាមី​ដែល​ទើប​តែរៀបការ​រួច​ហើយ ត្រូវតែ​ទៅ​ធ្វើ​បែបបទ​ចុះ​បញ្ជី​អាពាហ៍​ពិពាហ៍​នោះទេ។ ស្វាមី​ភរិយា​អាច​ទៅ​ធ្វើ​សំបុត្រ អាពាហ៍​ពិពាហ៍ ពេលណា​ក៏បាន ឬ​នៅ​ពេល​ដែល​ពួកគេ​មាន​កូនពីរ ឬ​បីនាក់​ហើយ​ក៏ដោយ ក៏​អាច​ទៅ​ធ្វើ​សំបុត្រ​អាពាហ៍​ពិពាហ៍​នេះបាន​ដែរ។ នេះ​បើ​យោង​ទៅតាម​ប្រសាសន៍​ដូចគ្នា របស់​លោក គង់ ថេម និង​លោក​មេធាវី ពុទ្ធ ធាវី។

គួរ​បញ្ជាក់​ថា ការ​ចុះ​សំបុត្រ​អាពាហ៍​ពិពាហ៍ នេះ ពួកគេ​អាច​ធ្វើ​បាន​នៅ​ឃុំ-សង្កាត់​ខាងប្តី ឬ​នៅ​ឃុំសង្កាត់​ខាង​ប្រពន្ធ​ក៏​បានដែរ។

សំបុត្រ​អាពាហ៍​ពិពាហ៍​អស់​សុពលភាព​នៅ​ពេល​ណា?

សំបុត្រ​អាពាហ៍​ពិពាហ៍​ដែល​ធ្វើ​ហើយ​មិន​អាច​លុបចោល ឬ​ហែក​ចោល​តាម​ទំនើង​ចិត្តបាន នោះទេ។ អ្នក​ដែល អាច​លុប​ចោល​ឬអស់​សុពល​ភាព​បាន គឺ​មាន​តែ​តុលាការទេ ដែល​មាន សិទ្ធិ​គ្រប់គ្រាន់​ក្នុង​ការ​ចេញ​សាលក្រម​រំសាយ​ចោល។

លោក​ប្រធាន​ភូមិ គង់ ថេម បាន មាន​ប្រសាសន៍​ថា៖ «ក្នុង​ករណី​ដែល​គូភាគី​ទាំងពីរ​សុំធ្វើ ការលែងលះគ្នា គូ ស្វាមី​ភរិយា​ទាំងពីរ​ត្រូវ​ប្តឹងទៅ​តុលាការ ដើម្បី​ឲ្យ​តុលាការ​សម្រេច និងចេញ សេចក្តី​ប្រកាស​ថា ពួកគេ​លែង​ជាប្តី ប្រពន្ធ​តទៀត​ហើយ ពេល​នោះ​សំបុត្រ​អាពាហ៍​ពិពាហ៍ របស់​ពួកគេ គឺ​គ្មាន​សុពលភាព​បញ្ជាក់​ថា ពួកគេ​ជា​គូ​ស្វាមី​ភរិយា​នឹងគ្នា​ទៀតទេ»។ សាលក្រម​សម្រេច​ឲ្យ​ស្ត្រី​មេម៉ាយ ឬ​បុរស​ពោះម៉ាយ បាន​ក្នុង​រយៈ​ពេល ៣០០ ថ្ងៃ បន្ទាប់ពី នោះគឺ​ពួកគេ​អាច​រៀបការ​ជាមួយ​ស្ត្រី ឬ​បុរស​ផ្សេងទៀត​បាន។

លោក​បាន​ធ្វើការ​បញ្ជាក់ថា បើពួកគេ​គ្រាន់តែ​ធ្វើជា​ពិធី​ភ្ជាប់ពាក្យ ជប់លៀង ឬរៀបការ តែ ពួកគេ​មិនបាន​ធ្វើ​សំបុត្រ​អាពាហ៍​ពិពាហ៍​នោះ នៅពេល​ដែល​ពួកគេ​ប្តឹង​សុំ​ធ្វើការ​លែងលះ គឺ តុលាការ​នឹង​មិន​ចេញ​សាលក្រម​ឲ្យ​ពួកគេ​បានទេ ព្រោះ​ពួកគេ​គ្មាន​សំបុត្រ​អាពាហ៍​ពិពាហ៍។ ប៉ុន្តែ​ពួកគេ​អាច​សម្រេច​លែងលះ​គ្នា​ដោយ​ចិត្ត​របស់​គេ បាន​ដោយ​ទៅឃុំសង្កាត់​ដើម្បី ប្រកាស​ឲ្យ​ដឹងថា ពួកគេ​សុំ​ធ្វើការ​លែងលះ​គ្នា​ចំណែក​ទ្រព្យសម្បត្តិ​របស់​ពួកគេ​ គឺ​មិនមាន​ នរណា​អាច​សម្រេច​បែងចែក​ឲ្យ​ពួកគេ​បានទេ។

ពួកគេ​ជា​អ្នក​ចាត់ចែង​ដោយ​ខ្លួនឯង។ ប៉ុន្តែ ប្រសិនបើ​ពួកគេ​មាន​សំបុត្រ​អាពាហ៍​ពិពាហ៍ នោះ​តុលាការ​មាន​សិទ្ធិ​បែងចែក​ទ្រព្យសម្បត្តិ ឲ្យ​ពួកគេ​បាន​ដោយ​តុលារ​នឹង​ធ្វើ​ការ​សាកសួរ តើ​ប្តី​ធ្វើអ្វី ប្រពន្ធ​ធ្វើអ្វី។ ដូចនោះ តុលាការ​នឹង ធ្វើ​ការ​បែងចែក​ទៅ​តាម​នោះ​តែម្តង។

លោក ជា សុវណ្ណ អាយុ ៤០ឆ្នាំ ជា​បុគ្គលិក​ក្រុមហ៊ុន​មួយ ដែល​បាន​បែកបាក់​គ្នា​ជាមួយ ភរិយា​បាន​រៀបការ​និង​រួមរស់​ជាមួយ​គ្នា​ជាង១០ ឆ្នាំ រហូត​មាន​កូន​ចំនួន​បីនាក់​នៅក្នុង​បន្ទុក ទៀត តែ​លោក​មិនទាន់​មាន​សំបុត្រ​អាពាហ៍​ពិពាហ៍​នៅឡើយទេ។

លោក​បាន​មាន​ប្រសាសន៍ ថា៖ «ខ្ញុំ​គិតថា វា​មិន​សំខាន់​សម្រាប់​ខ្ញុំទេ ហើយ​មួយ​វិញទៀត​វា​មាន​ភាព​ងាយស្រួល​សម្រាប់ ខ្ញុំផង​ដែរ​នៅពេល​ខ្ញុំ​បែកបាក់​គ្នា គឺ​ខ្ញុំ​មិន​ចាំបាច់​ចំណាយ​ពេល​ច្រើន​ក្នុង​ការ​ឡើង​តុលាការ​សុំ ធ្វើ​ការ​លែងលះ​គ្នា»។

លោក សុវណ្ណ បន្តថា លោក​ដឹងថា សំបុត្រ​អាពាហ៍​ពិពាហ៍ មាន​សារៈ​សំខាន់ ប៉ុន្តែ​ការដែល​ មិន​ធ្វើ​ក៏​មាន​គុណ​សម្បត្តិ​ម្យ៉ាងដែរ​សម្រាប់​លោក។ លោក​និយាយ​ថា៖«សំខាន់​គឺ​ស្ថិត​នៅ​លើខ្លួន​ខ្ញុំ​ទេ ថា​មួយ​ណាល្អ និង​មួយ​ណា​ងាយស្រួល​ជាង»៕

អត្ថបទគួរចាប់អារម្មណ៍